馬六甲。馬六甲古城﹑雞場街﹑娘惹博物館

 < 新加坡﹑馬來西亞8天遊 >

第四天（續）

由新山北上，好快就去到今日既目的地馬六甲啦！


未到馬六甲古城，已經可以感受到古舊氣息，馬路兩旁全都係舊建築，望見騎樓有一種熟悉感覺，冇錯啦香港舊區都可以搵到好多相類似既舊建築


可能置身外國，呢道既舊建築感覺帶有外國feel


「2008年被列入世界文化遺產的馬六甲，英文名稱為Malacca，馬來文為Melaka。於西元1511年淪為葡萄牙殖民地，1641年後改由荷蘭人接管，1785 年起則為英國所統治，1957 年時脫離殖民統治，成為馬來西亞第一個宣告獨立的地區。」

馬六甲受過咁多國家管治，唔多唔少都可以反映出唔同國家特色，係建築上就可以睇得比較清楚，紅色建築就係當年由荷蘭人興建


遊馬六甲古城最輕鬆就係坐三輪車，古城周圍都可以見到遊人坐住三輪車到處遊覽




但我覺得三輪車裝飾得太誇張啦，成部粉紅色都唔好意思坐上去，而且車頭掛個大花圈，中間放隻公仔係道，唔知大家係唔係同我諗緊同一樣野呢？




好多美女來到馬六甲古城




遇見有位外國人由歐洲開電單車來到馬來西亞，一邊玩一邊賣小飾物籌集旅費，唔可以唔佩服佢既毅力，加油！




THIS IS MY DREAM！四個字已經講出左重點，人冇夢想同條鹹魚有咩分別！人唔單只要有夢想，實踐夢想先係最重要，佢已經做到啦，好厲害！


來到馬六甲首要任務就係搵食，見到呢隻大船就知道我已經到左華人居住既社區Jonker Street雞場街（雞場街個名好似奇怪左少少，不過真係有雞食架^^）




由朋友帶領之下，直衝去一間又出名又好食既餐廳「古城雞飯粒」午餐，呢道連旅遊節目都有介紹過，我相信一定好好食！


間屋已經過百歲


有好多好野食


傳說中既雞飯粒出現啦，只有馬六甲先可以食到架
飯同雞融合一齊變成雞飯粒，一啖就可以食到雞同飯，口感都幾特別！因為佢圓圓地成個波咁我地幫佢改左個名做「波波雞飯」（不過呢個名唔可以亂講，比人聽到會笑死，哈哈）


仲叫左好多餸，好好味！之前我話過新加坡天天海南雞飯啲雞唔好食，呢道隻雞就好食好多啦，比起天天好食100倍！


食飽後就係古城漫遊，呢道建築色彩繽紛好靚










隻Hello Kitty好假


對上一次見到福建會館係四川，估唔到係馬六甲都可以見到


路過一間特產店，大家就入去shopping一下；A1肉骨茶包好出名，幾位馬來西亞朋友都推薦，我都買左兩包返香港，煲出來好香藥材味道，應該係真材實料


買完野就到甜品時間，食呢個馬六甲先有既珍多冰


我地叫左原味珍多冰同榴槤珍多冰（Durian Cendol）


呢個睇上去就好似一碗普通刨冰，咁當然冇咁普通啦！刨冰上啡色既係馬六甲先有既馬六甲椰糖（Gula Melaka），食落口好香好香椰子味，一碗普通刨冰因為椰糖就變成好好食既椰糖珍多冰啦^^而珍多冰入面仲有紅豆、仙草等等配料，好特別！


食完珍多冰叫多碗娘惹叻沙，都幾好好食




係古城隨意參觀，古城建築又特別又靚




















街上見有人賣榴槤就買左個來試試，不過唔好食既


好快就係古城行左一圈，行到返出去入口位置lu；我地出返去，先去酒店返低行李，然後再出發晚餐，今日好多時間都係食食食！馬來西亞最出名就係食野ma，哈哈^^






呢間就係全個旅程最靚既酒店Hatten Hotel Melaka，比起琴晚個間靚好多；一間房大約港幣640一晚，唔算好貴






梳化呢道都有電視可以睇，不過都睇唔晒兩部


房間下面就係泳池，可惜冇準備衫褲游水，係熱帶地方游水應該好正


房間向外望


呢間酒店實在太舒服啦，大家係道休息左好耐，到出去既時候已經天黑，而家就去搵晚餐既地方


成架車都發光，洗唔洗整到咁型丫


今晚去食既就係馬六甲其中一樣特色美食沙爹串燒火鍋，就係好出名既沙爹碌碌（Satay Celup），而沙爹碌碌之中最名就係老字號佳必多，長期都排滿人！我地落左車穿過黑暗既街道，尋找佳必多蹤影


搵左一陣終於去到佳必多啦，不過去到門口見到咁既樣...唉...六合彩又唔見中竟然撞中佢冇開門......




佢冇開門都冇辦法...見對面有另一間沙爹碌碌咁就入去啦...一場去到唔通咩都唔食就走人咩...不過呢間冇咩人心諗都唔方好食......




食沙爹碌碌方法好簡單，先出去雪櫃揀自己想食既串燒，拎返來然後放入中間沙爹湯底碌熟就ok，最後埋單時點算竹籤數目來比錢（個個都食咁多心諗數少幾枝老闆都唔會發覺架啦，哈哈^^不過我唔會咁衰既）


呢個沙爹湯底唔係我地平時打邊爐用既沙爹湯底，而係沙爹醬湯底，睇上去唔係咁好睇，但就香噴噴，食起來有好香沙爹味道；有沙爹醬啲野食當然好食啦，不過食咁多沙爹醬會非常口喝，飲多幾枝可樂都補唔返


拎左好多野食


原來沙爹串燒呢道係小印度地區


食完沙爹又到甜品時間，去到酒店附近一間Secret Recipe食cake




啲cake好好食架


慢慢歎左半個鐘cake，離開時見到有張告票係車頭
好多人都話馬來西亞警察出名工作效率低，今日又會咁勤力抄牌......


食完甜品仲未返酒店住，仲有生果時間，今晚又去到食榴槤啦




今晚試左兩個唔同品種，食左D24同紅蝦，都係好好食架




剩返好多榴槤皮


食完榴槤就返酒店訓覺啦^^今日係馬六甲食左好多餐，又重左幾磅，哈哈^^

第五天

呢間酒店訓得好舒服^^訓醒時見到出面落緊雨，今日天氣唔多好




酒店包左早餐，我都有幾耐冇食過酒店既早餐啦，所以就去試下


一般早餐有既野都有齊，算係唔錯








拎左少少野食咋，幾好食架


食完就返上房拎行李check out，見到天氣好似好返啲，冇落雨，好野！


首先去到紅屋附近落車，有部舊飛機同火車








繼續向前行就到A'FAMOSA（聖地牙哥城堡），呢座葡萄牙城堡係1511年興建，可惜荷蘭人來到馬六甲時破壞左城堡，而家只係得返見到呢小部份咋...




大砲係荷蘭人修補城堡時加上去


城堡旁邊停左啲車比人參觀






睇完城堡就返到去雞場街旁邊既馬六甲河


馬六甲既屋真係好大間，雖然門面唔闊，但就好長


呢間賣咩雞架？


沿馬六甲河河邊行


前面有隻鄭和寶船，記念鄭和下西洋時多次去到馬六甲（真既鄭和寶船比呢隻大得多）




有班小朋友坐船遊馬六甲河，來回都好開心同我揮手


馬六甲河美景






離開馬六甲河進入古城區








目的地係呢間「峇峇娘惹古跡博物館」；峇峇﹑娘惹係明朝中國移民同馬來族人通婚混血既後裔，男叫峇峇，女叫娘惹；峇峇娘惹除左帶有傳統中國文化色彩之外，又帶有馬來西亞文化，將馬來人既語言﹑服飾﹑飲食等等習慣融入自己日常生活，所以呢個文化幾特別架


博物館呢道係以前有錢人住既屋，融合左中國、英國維多利亞同荷蘭風格；不過博物館唔可以影相，只係唔小心影左幾張咋...




參觀完博物館，又到開餐時間


去到一間好靚既餐廳，電影「夏日的麼麼茶」都係呢道取過景（不過我未睇過@@）；呢道設計得好有特色，環境好舒服^^而且時間尚早人唔多好寧靜呢




叫左一個椰青，第一次飲呢種綠色椰青咋
不過呢個椰青唔太好飲，酸酸地飲落去好怪，唔岩我口味...




其他野食賣相唔錯，不過我冇食，唔知味道點啦


食飽後馬六甲之旅亦都去到尾聲，我地要起程向吉隆坡機場出發；由馬六甲去機場有百幾公里路程，所以要早啲起程，再見啦馬六甲！


馬來西亞油價比香港平好多




吉隆坡呢道好好天，藍天白雲陽光普照


我地來到吉隆坡最新既KLIA2，當時只係用左三個幾月咋，設施好新好靚，所有Airasia航班都由之前既LCCT搬到KLIA2運作


KLIA2有個大商場，喜歡shopping既朋友可以係呢道作最後衝刺






都係超級市場最吸引，可以買到好多馬來西亞特產




可以睇到飛機




入到客運大樓都係咁靚






check in時問職員可唔可以影張相，佢地就笑得咁開心，哈哈（一定唔係我問啦，我邊敢問呢）


check in後仲有時間，又可以開餐，機場有好多餐廳選擇




我地揀左呢間馬來西亞餐廳


呢餐超好食，色香味俱全


朋友仲準備左娘惹糕比大家作為甜品，都係好好食丫，好細心呢，多謝


食完呢餐時間都差唔多啦，夠鐘入閘lu；不過我暫時仲未離開馬來西亞，我地八個人會分開三路，有朋友會返香港，有朋友會返吉隆坡屋企，而我將會自己一個繼續北上檳城^^五日愉快旅程好快就結束，希望之後幾日都係一樣咁愉快啦^^