檳城。康華利古堡﹑臥佛寺﹑緬甸廟﹑壁畫﹑義香/馨香餅家

< 新加坡﹑馬來西亞8天遊 >

第七天

檳城第二個早上，亦都係檳城兩日之旅最後一日，舒舒服服訓到九點半先起身，好耐都未試過訓到咁晏啦^^今日冇咩特別行程，主要都係喬治市市內隨意走走，所以慢慢出發都唔遲


Hostel有提供簡單早餐，可以自製多士




好多外國人已經係道開緊餐啦
其實係我今日遲起身，出來時所以室友已經出晒去lu，得我一個留到咁耐


我就唔係道開餐啦，檳城有咁多特色美食等緊我，都係出去搵美食仲好；執好背囊然後check out，係時候離開呢道；呢間hostel唔錯，環境乾淨，最重要係張床訓得舒服，一教訓天光


今日檳城朋友都會帶我去玩，所以唔需要擔心行程，出來門口影影相




Hostel附近古式古鄉，好有懷舊feel




朋友好快就來到搵我，首先最重要既事就緊係開餐啦，唔食早餐又邊會有力玩足一日呢；我地去到一個大排檔搵食，檳城氣溫比較高，不過只要去到有瓦遮頭既地方就好通爽好舒服，就算大排檔冇冷氣都唔會覺得熱


今餐我就係食椰漿飯，個樣睇落好有趣


我食呢個係雞椰漿飯，食落去辣辣地好正


早排郵局出過馬來西亞美食郵票，馬來西亞其中一個美食代表就係椰漿飯，我相信椰漿飯係馬來西亞人心目中係好重要


飲返杯桔仔酸梅，酸酸甜甜又開胃又好飲


檳城既雲吞麵同香港個啲好唔同，不過大家都係一樣咁好食


呢道好興炸生果，第一次見原來生果都可以炸黎食，大多數生果都好好食架，不過見唔到之下食左一舊好臭好臭個款生果，實在太臭啦頂唔順吐左出來...


食飽就出發去玩啦，路過西方色彩濃厚既銀行街




檳城地標，鐵檳榔同舊關仔角鐘樓


因為以前全個島好多地方都有檳榔樹，早係15世紀呢道已經叫檳榔嶼，大大個檳榔塑像正好可以比大家知道已經來到呢個檳榔之島啦


為慶祝1897年維多利亞女王鑽禧慶典而建既舊關仔角鐘樓


鐘樓旁邊就係康華利古堡








海邊有涼風都幾舒服


今日天氣好好冇落雨，視野清晰可以望到好遠






唔知點解海水係兩節色？近岸係淺藍色出面係深藍色？


沿岸環境都幾靚




戰爭記念卑


維修中既City Hall


檳城高等法院；點解呢道座座建築都可以咁靚架？唔講仲以為去左歐洲




踩單車遊檳城係一個好選擇，唔洗行得咁辛苦，不過烈日當空之下踩單車我估都幾熱！


另一間法院




海邊有一個好大既公園


真係好大，如果要我係道跑一圈一定好辛苦








公園大但人唔多，一班人坐係樹下生活幾寫意




我就唔坐係樹下，去左公園旁邊一個茶水檔休息一下順便抖抖涼，係咁熱既天氣之下飲返杯冰凍飲品係一個好選擇


好多椰子，咁就飲椰汁啦


椰汁入面啖啖椰肉，絕對真材實料，而且好好味！最重要係飲完之後即刻清涼好多，係一個咁舒適既地方一定會令人坐到唔想走


坐左一陣又要起程，冇理由係道坐足一日ma；行返去旁邊「康華利古堡」，古堡以前係由木建成，後來英國政府係1808至1810年間利用囚犯勞力，將木堡改建成為一座石堡


「康華利古堡所在地位於1786年時英國萊特船長Captain Francis Light（即檳城第一任總督）登陸檳城的地點」



「康華利古堡的Seri Rambai大砲，則屬1603年的產物，聽說荷蘭曾想以此炮賄賂皇室，以便能取道攻下馬六甲，唯蘇丹不為所動，故大砲有「皇族真誠」的意思。」







古堡入面有好多大炮，不過呢啲大炮都未試過使用；當地人認為大炮有求子神力，以前好多婦女會用鮮花黎拜祭，將鮮花放入大炮之中，不過政府好似已經禁止左呢個行為lu








由呢道望出去海景都邊靚架




嘩...椰子樹上面生滿好多椰子




古堡唔係好大，好快就行完




出返來再次經過鐘樓，不過天氣唔多好，烏雲密佈


沿銀行街前進，又可以欣賞到呢啲咁靚既建築啦














前面隱約見到我想搵既地方


我就係想黎呢間「義香」；義香麻油唔只係檳城出名，係香港都一樣好出名，可惜今次我唔可以帶佢返屋企，因為太大枝唔可以當手提行李拎上飛機...要等下次再有機會先帶佢走lu


義香招牌公仔，有種好奇怪既感覺


義香有幾間分店，今次我就去左佢最舊既老店


義香除左麻油聞名，豆沙餅都一樣好出名，今次我就係為左佢既豆沙餅而黎到呢道；豆沙餅好抵買，一盒16個小豆沙餅先賣RM6，15個大豆沙餅賣RM9，平靚正！


超過155年歷史




偷望入去廚房


買左四盒小豆沙餅兩盒大豆沙餅，返來可以慢慢食啦




隨意走走










經過一幅比較出名既壁畫，當然要影返張相


影影下相突然落大雨，走都走唔切；要麻煩朋友開車來救我走


好彩好快就停雨，今次去左另一間好出名既餅店「馨香」


睇落又係好奇怪


入面咁多人，唔洗講都知道係好野啦


有好多唔同種類產品




又偷影下人地個廚房先


黎韾香呢道目的又係想買豆沙餅，又買左六盒！數下而家有幾多粒豆沙餅係身先，如果冇數錯應該有190粒，有排食啦，哈哈^^當然唔係自己食晒啦


買完野就去到「Wat Chayamangkalarm」，係一間泰式風格佛廟










佛廟供奉有全長大約33米，據說係世界第三大既睡佛


佛廟對面就係「Dharmikarama」緬甸廟


緬甸廟同佛廟一樣金碧輝煌










好多人係道許願








又到左食野時間，今次試食叻沙；係馬六甲有食過好好食既叻沙，唔知檳城叻沙係唔係都係咁好食呢？


朋友帶我去一間佢地食開好食既餐室品嚐叻沙，檳城既餐室都係咁有風味，如果香港都有多啲呢啲餐廳就好啦




第一次飲荳蔻汁，形容唔到佢味道，只係知佢好好飲


我既叻沙出場啦！不過一睇就知道大獲！
點解成碗叻沙都係魚架？呢道既叻沙同之前馬六甲叻沙好唔同，檳城叻沙係用魚煮成，而且呢碗仲好足料！我都唔食魚望住碗野都唔知點算...唉......


朋友係門口排左好耐隊，就係想買呢個曼煎餅比我試，我係第一次見呢種小食，之前完全冇聽過


曼煎餅甜甜地，入面收埋好多粟米，食落又真係幾好食




食完又再出發
檳城髮型屋有個特別地方，就係只有印度人經營既髮型屋先會用紅藍色轉轉轉個個橙箱，其他髮型屋係唔會有，唔似香港所有髮型屋都會掛呢個橙箱出來


係時候開始我係檳城最後一個行程「尋找壁畫之旅」






































不停穿過大街小巷，行行下時間已經唔早，我既兩日檳城之旅亦都接近尾聲


路過好多人賣二手野既地攤






望到檳城最高既「光大大廈」




行到去檳城其中一條最出名既食街「汕頭街」，不過我今晚唔會係呢道食野，下次有機會再到檳城既話一定要來呢道掃街


見到美食令人流晒口水，不過要忍住，一陣仲有其他美食等緊我






天已經黑，終於去到晚餐地方；見到有咁多人，而且重要係本地人而唔係遊客，咁地道唔洗問都知一定係好野




黎呢道係食肉骨茶


呢個就係正宗馬來西亞肉骨茶，用藥材煲成所以湯底係深黑色，食落好香藥材味，好好食架！由其啲肥豬肉又滑又正


唔知點解食肉骨茶就一定要有油炸鬼？我估原理同食粥一樣，油炸鬼會吸晒啲湯，變成肉骨茶油炸鬼


第一次見用肉鬆煮菜，又幾得意


同香港一樣既凍檸茶


肉骨茶咁大煲，食到好飽好飽


食過晚餐，再次去到檳城碼頭，係時間離開




由檳城島上船唔需要比船費，開閘就可以直接上去


人就坐係上層中間位置，左右兩旁都停滿車




對面方向渡輪又少車又少人，我地呢邊就迫到滿


我既檳城之旅由火車站開始，亦都由火車站結束，好快就要上火車回到出發地吉隆坡（最衰開始時冇計劃來檳城，所以買左吉隆坡機票返香港，如果直接係檳城飛走就方便好多）






等左一陣火車到啦


行到去差唔多最前，搵到我既八號車箱


兩日檳城之旅結束啦，呢兩日多得朋友照顧，車我去唔同地方玩同食野，所以短短兩日時間都可以去左好多地方^^我上火車時仲有六個朋友來到火車站送我上車，真係好多謝大家^^