日本17天鐵路之旅。SL銀河篇

 < 日本十七天鐵路之旅 >

< SL銀河篇 >

第十三天

今日再次向東北出發繼續鐵路旅程，主要目的就係要去坐SL銀河，今次係第一次坐蒸汽火車

今朝唔洗咁早出發，八點幾先出門口，首先坐新幹線由「東京站」去「盛岡站」，再由「盛岡站」坐返去「新花卷站」

係「新花卷站」轉「釜石線」普通列車去「遠野站」

去遠野沿路都係好靚既鄉村風景，一大片金黃色

去到「遠野站」，蒸汽火車已經停左係道，不過佢冇咁快開車，先行出去周圍睇下

遠野站唔大，站外都係一啲小鎮風景

出面有遊客中心，今次只係為左遊車河所以冇留時間遊覽，入去行個圈就走

又返到月台，今次坐既係「SL銀河」，火車來往「花卷」同「釜石」，星期六由花卷出發，星期日由釜石回程，我冇咁多時間坐足全程同留係岩手縣玩，今次就只係坐一小段

火車古典設計，入面有野賣有野睇，入面有間房可以預約入去睇同星星有關既神畫介紹，可惜我完全唔知佢講咩

旁邊乘客打開左個窗影相，我都跟住一齊影

停站時可以落車行一行，雖然得好短時間，但有得落地走動下睇下火車都幾開心，夠鐘職員會叫返大家上車

最後坐到總站「花卷站」，大約個半鐘蒸汽火車旅程完結

告別蒸汽火車，搭「東北本線」普通列車返「盛岡站」

第一次正式黎到盛岡，要試試盛岡最出名既其中一款麵「盛岡冷麵」

係車站附近就可以食到呢間好出名既麵店，門口睇落去以為好高級，但價錢就同平時普通既麵店差唔多；我去既呢個時間唔多人，佢竟然比張12人枱我自己一個坐

盛岡冷麵真係好好食

食飽就係附近行下，夜晚冇車前要返去坐新幹線，咁岩比我見到兩部新幹線合體

黎到今晚目的地青森

今日終於坐到蒸汽火車，一路開住窗吹風一路聽住火車聲，加上感受住黑煙飄過，係一個好難得既體驗；聽日會開始另一個鐵道旅程，會坐出名風景靚既「五能線」