< 日本十七天鐵路之旅 >
< 諏訪湖篇 >
第十五天
今日由盛岡出發，經過幾百公里路程去一個一直都好想去既地方，就係傳說中「你的名字」裡面「糸守湖」取景地「諏訪湖」，因為路途遙遠所以一早又要出發
玩左咁多日終於要離開東北地區，坐車由盛岡到大宮再到長野再到松本，去到都已經過左中午時間，係車上訓下又睇下報紙，唔經唔覺就去到；呢幾日新聞都係不停講加稅…
長野都係一個好靚既地方，今次冇時間停低純粹路過，希望將來仲有機會再黎啦；長野縣雖然多山，路過都見到好多平地農田，環境感覺好舒服
最後去到松本落車，想睇一睇非常出名既松本城；冬天呢道可以見到好多雪山
一行出站就見到好多街道綁住呢啲繩，一路行去松本城方向都有，當時唔知呢道有咩活動
第一次黎到長野縣當然要入郵局買明信片
一路行最後去到一個舉行祭典嘅地方，當時我完全唔知呢道舉行緊咩活動，之前我都冇留意松本呢道有咩睇，只係識得松本城，又咁岩會路過松本所以就黎左
去到神社先知道原來呢道舉行緊一個叫「神道祭」既活動，除左小食攤檔之外仲有花車，相舍夜晚一定好熱鬧
冇停留好耐就繼續行去松本城；松本城範圍好大環境好靚，天守更係現存十二天守之一，今次我冇預時間上去慢慢參觀，係出面望下已經心滿意足
行完松本城就返去車站附近食野，好快就繼續去今日最主重要既地方
列車繼續經過好多農地，去到諏訪市終於有返城鎮既感覺
「上諏訪站」最特別就係月台有個足湯，應該唔係好多車站有咁特別既設施
最後都係行條大啲既路行上去穩陣啲，起碼睇落似係有人行
穿過小路慢慢行上山，最穩陣可以沿着馬路上去就得，不過行馬路會行遠好多，穿過民居小路上去會快啲
一路行已經見到諏訪湖係眼前，今日天氣好好風景亦都好靚
行埋最後一段馬路就去到目的地「立石公園」，由車站行上黎唔洗好耐，我慢慢搵路再一落行一路睇風景上到黎唔洗45分鐘
立石公園可以清楚睇到全個湖同湖邊城市風景，唔怪得呢道咁多屋起係山上，日日可以睇住咁靚既風景人真係好識嘆
上到黎時間仲係好早，係公園行左一圈之後就坐低望住個湖慢慢等日落，有啲後悔冇買野上黎食，應該要一路食野一路望住個靚景； 由下午等到黃昏再等到夜晚，望住風景變化，呢種感覺真係好寫意，平時去旅行經常不停走來走去，好難得有機會可以坐低咁樣慢慢欣賞風景，而且仲係望住一個比城市包圍既湖，我諗第二道好難見到
睇到心滿意足就落山行返去車站，黎呢道既人見全部都係揸車上黎，我諗冇幾多人好似我咁無聊自己行上黎；落山行返上黎個條就得，沿路有好多民居所以基本上好多路段電筒都唔使開就可以行到落去，比起早幾日「山梨県笛吹川 フルーツ公園」落山個條路易行又短好多
去到車站冇浸足湯，直接坐火車返新宿
返到新宿行左個圈就去左麥當勞，呢間就係「天氣之子」入面陽菜做野既地啦，仲有陽菜請食既巨無霸～
第十六天
十四日JR PASS已經用完，今日會留係東京，首先去左「朝日稻荷神社」，神社係大廈天台，如果有睇過「天氣之子」就會知道天台係會有神社
跟住去左參觀「天氣之子展」，入面唔可以影相；展覽出面就係紀念品店，當然唔會放過紀念品～
由銀座向秋葉原方向行去，路過「神田神社」，去過咁多次終於有機會黎到參觀，呢道有好多產品同活動會結合動漫元素，係一間特別既神社
之後時間又係秋葉原四圍行，好快又過一日
第十七天
最後一日主要都係上野秋葉原搵野買帶返香港，夜晚先飛仲有時間比我慢慢行
最後上機時大背囊只係得16.1KG，比以前放到廿幾公斤少左好多野，有時都唔知可以買啲咩返黎，始終買野唔係我.強項......
十幾日旅程轉眼結束，以前一年可以隨時去幾次日本，邊估到超過兩年後既今日都仲未有機會再去旅行...期望疫情盡快過去，大家可以再次環遊世界
< 日本十七天鐵路之旅 >
< 完 >
沒有留言:
發佈留言