大理。喜洲海舌半島

< 雲南大理﹑昆明6天遊 >

第三天(續)

坐上去下關巴士，向住又美麗又神秘既喜洲出發，雙廊有緣再見！


喜洲位於洱海西邊，由雙廊到喜洲大約27公里；我坐既巴士因為要接送乘客去較遠地方落車所以兜耐左，由上車到喜洲落車用左一小時十五分鐘（如果直接由雙廊去喜洲就唔需要咁耐）


上車出發！雙廊去喜洲車費九蚊


車上掛有當地民族特色裝飾，幾特別丫


因為要接送乘客，所以沿洱海邊行多左一段時間，咁仲好啦可以欣賞洱海風景，不過天氣就麻麻啦，成個天都係雲，少少陽光都冇...




路過琴日熱鬧既市集，今日好多地方已經人去流空




一路睇風景，經過個幾鐘車程終於來到喜洲，可能喜洲吸引力唔大，車上就只有我同朋友兩個人落車


「喜洲位於大理古城以北18公里處，東臨洱海，西枕蒼山，喜洲是重要的白族聚居的城鎮，這裡有著保存最多、最好的白族民居建築群。從佈局上看是典型的“三坊一照壁”及“四合五天井”的白族庭院格局。」





喜洲好大，除左遊客經常到既喜洲古鎮之外，喜洲仲包括附近好多條鄉村，有啲鄉村距離喜洲中心幾公里遠，所以村民會用馬車作為交通工具，馬車經過身邊時會聽到馬蹄聲，感覺就好似返左古代一樣；我去過其他古城都未見過會有咁多馬車係城中心穿梭，估唔到喜洲呢道會有咁多，而且呢啲馬車唔係為遊客而設，而係當地人生活一部份






落車後先唔理咁多其他野，穿過小巷直接去到喜洲古鎮中心




位於古鎮中心既牌坊




咁心急來到中心就係想搵野食咋，見到有間小店就入去食午餐


今次叫左碗沙鍋米線，味道ok啦
對上一次食沙鍋米線已經要數到幾年前係香格里拉食啦；沙鍋米線一般都比普通米線貴，不過都只係十蚊碗好抵食


米線店旁邊就見到喜洲最出名既美食「喜洲粑粑」，全部新鮮即場泡製一定好好食！不過今日暫時唔食住，留返聽日慢慢品嚐






影出來咁黑白feel


聽日先返來搵你，而家要向洱海邊進發


由喜洲古鎮中心行去我今晚住既洱海邊「金圭寺村」都唔近架，路程大約4公里；唔想行既話可以選擇坐馬車，又可以坐三輪車，好多人仲會踩單車去，而我就想一路行一路睇風景，所以就選擇最慢既方法--行路去，預計個零鐘就可以行到


食飽米線買多支可樂就出發啦，古鎮好多地方都有得食喜洲粑粑，不過最出名都係頭先見到個檔




行左一分鐘，附近已經冇晒人啦...喜洲本來已經少人到，而且好多遊客來到喜洲都會被車到新開發既「喜洲嚴家民居景區」，到古鎮既人唔多，所以古鎮就係咁冷清...喜洲古鎮有個有趣既地方，就係古鎮之上見外國遊客可能比中國遊客更多，真係有好多外國人來到喜洲，呢樣係有原因，等我遲少少再分享一下啦^^喜洲古鎮比我既感覺同未黎之前幻想中既喜洲好唔同，不過都係唔理咁多住，要繼續趕路


建築都唔睇住，趕路重要






好漫長既路丫


我就係想睇呢啲咁靚既自然環境啦，好多農田




農夫們好努力插秧，加油


繼續向住望唔到盡頭既路前進，總會去到目的地既


好環保既路燈


好多地都仲未插秧，如果遲少少來到就可以見到放晒水既農田，到時候一定靚好多










耕田真係好辛苦，每一粒米都得來不易，加油！加油！














佢地又有單車踩，又有電單車坐就好啦，坐車好快就可以去到


已經行左一半路啦，突然有三輛車走過來開價五蚊載我去，就係咁我就上左車啦；部車開得好慢，但點都快過行路既


去到村口空地就可以落車，部三輛車又舊又爛，幾驚佢開開下壞車...好恐怖


如果係坐馬車就好啦


呢道環境咁靚，有新人山長水遠來到影婚莎相




先唔去睇風景住，去客棧放低背囊先，今晚就住係芒果小屋；以我所知金圭寺村呢道就只有兩間可供住宿既客棧，而芒果小屋就係最出名個間啦，係村口就有指示教人行入去


由村口去芒果小屋好近，幾分鐘就可以行到




一行入門口就見到好多好靚既紅花




客棧係傳統白族建築設計，亦即係「三房一照壁，四合五天井」；白族房屋用四方形設計，正中間有一幅好似大屏風既牆，就係照壁，而對正照壁就係正房客廳，客廳兩邊係房間，客廳房間成一個U字型設計；照壁同正房﹑兩邊房間中間係一個天井，所以就有以上「三房一照壁，四合五天井」呢句說話；好多時「照壁」上都會鑲有自然山水圖案既大理石，所以特別靚，而照壁都有實用既地方，就係反射太陽光，將天井院子都照得光亮


呢道天井幾靚架，種左好多花，感覺好舒服






有隻又得意又怕醜既貓仔，行去佢道佢會走得好快










好靚既木雕


我間房就係開住門個間啦


我住既係六人房，只係25蚊超平丫！今晚冇其他人住所以我自己一個霸晒成間房！今日成間客棧都唔多住客，連我在內都只係得四個人咋，夜晚非常寧靜




休息左一陣就出去；一出來就見到咁靚既風景，有山有水有天有海，仲有咁多植物，真係好靚（其實呢兩日相機setting一路都係錯，影出來顏色有少少奇怪...）






又見到佢bor


經過三棵大樹，向前行就係海舌半島


海舌半島伸入洱海中間，三面環海，我相信環境一定好靚


天氣唔錯bor，係雙廊時成個天都係雲，而家見到藍天啦；沿路兩旁都係農田，原始又美麗既自然環境














又藍又綠，好靚既對比




行行下發現有條小路通去外面，即刻出去望望先


行到出來啦，咁多垃圾既...仲好多烏蠅


不過風景又真係幾靚架，唔同既綠色好有層次感






淺綠色地方其實係水黎架！因為呢道係濕地，所以水同陸地交界唔明顯；大家都係綠色，行既時候就要好小心，一個唔留神隨時下一步就會踩左入水中間




對岸就係雙廊，南詔風情島好明顯啦


一片片綠色既海水




有藍有綠都幾靚架，影多張相先


上返大路繼續向前行




去到海舌公園入口；海舌公園唔需要收費，可以隨意進入






入口附近種滿好多大樹，有人突然係樹上摘左呢個落黎比我食，唔知係咩呢






沿左邊海邊望望，可以望到洱海西岸既喜洲﹑蒼山等等景色












岸邊有好多樹枝




繼續向半島最尖尖既地方行出去




越行出去就越少樹


望住海景吹吹海風，真係好舒服












地上有好多貝殼


草都好特別


終於見到有小小人啦，由入來海舌半島到行到出來，見到既遊人兩隻手數得晒，呢道終於有返小小人氣；海舌半島就係一個咁寧靜既地方，想靜靜地睇風景呢道岩晒；由喜洲古鎮行入來有小小遠，如果踩單車就正


行到去海舌半島最尖尖既位置啦，三面都係海景；不過唔可以行太出，啲泥已經濕濕地，再行出去隨時踩左落水！




望住又藍又綠咁靚既自然環境真係好舒適






樹既造型都好特別








有好多應該已經枯萎既樹木






睇到咁上下，又係時間離開啦








影多張360度相就走啦


來既時候行左邊，而家走就行右邊，可以望到洱海東岸風景












呢邊海上都有好多樹枝












唔知佢係道做咩呢？對岸起好左高速公路，望落去冇咁靚tim


出返來門口，海舌公園已經行晒啦




出返來又可以見到綠油油既農作物




蒼山頂都冇晒雲啦，可以睇清楚蒼山真面目
天氣變得好快，坐車來喜洲時天空好多雲，而家就係咁靚既藍天，我都幾幸運丫


繼續欣賞咁靚既農田












行到返來呢三棵大樹道，亦即係之前落車既地方啦（啲樹真係好大棵）


飲返枝王老吉清涼一下先，哈哈


同我一齊來喜洲既朋友要坐夜車返屋企，所以就坐三輪車離開啦，再見


得返我一個人，係時候繼續去睇靚景啦，沿環海西路行




有艘小漁船撤網捉緊魚bor，洱海有好多海鮮出產，唔知好唔好食呢？










呢位伯伯好辛苦，連個人都要企係海之中，咁深水行步路都唔易架


呢道竟然有乳牛！大理有咁多特色奶類制品，有乳牛都唔奇怪掛？


四圍影下海










係道踩單車一定好正，條路又冇車又靚，風景就更加靚






呢隻係咩雀仔呢？海鷗夏天應該飛走晒架？




行左一陣都係先返去客棧休息一下，而家已經係6:15但仲係咁好陽光






係客棧hea左半個鐘，到6:45就出去食晚餐，都已經差唔多七點天空依然咁藍，太陽伯伯仲未想收工咁bor；想食野就要出返去村口空地，全村就只有呢道一間餐廳同兩間士多有野食咋


我就揀左呢間小小既餐廳，坐係店外對住靚景開餐；十零度真係好舒服，空氣又清新，坐出面就最好


又係食米線
呢碗米線只係6蚊咋，真係好平！而且米線冇偷工減料，成碗都係配料，無論係米線質地抑或味道都係咁好食，比起午餐食既沙鍋米線好食好多，總之就好正啦！（返到來香港咁耐都冇食過雲南米線啦，香港個啲同雲南當地既米線完全冇得比）呢間小餐廳除左我之外就冇其他客人，老闆娘都出左來坐低同我傾計，講下大理又講下香港，佢好晌往香港呢啲大城市生活，但其實好多城市人係調轉更喜歡農村簡單生活呢


食完後繼續睇靚景；太陽伯伯準備落山啦，我個影都變得咁長


太陽已經落到山邊！可能因為山太高，太陽唔會好似落到海平面咁，出現一個紅色好似咸蛋黃一樣既太陽








越落越低啦






走入去田地影下相先




水面好似到見到少少金黃色








啲秧插得好整齊！原來農夫會用線一行行逐枝逐枝秧插落去，呢份工作真係好辛苦，我一向都好尊敬默默為社會服務既農夫們












唔同既綠色，好靚丫






倒影都好靚




去到7:40，太陽終於落左山啦，冇左陽光四圍開始變暗


望向對岸，見到有陽光射係山上面？








當時見到對面山頂發出一行金光，感覺就好似梅里雪山既日照金山（山頂唔係白色當然就冇梅里雪山咁金黃啦），即刻走出去海邊試下影落黎；只可惜技術有限，影唔出當時真正顏色出來，美景唯有用眼欣賞




大約十分鐘，所有陽光已經冇晒






襯仲未真正天黑，把握時間影多幾張相然後就離開啦












係離開時，有位係喜洲教書既老師來到海邊準備影月亮，仲提醒我呢道月亮好靚好值得留多一陣欣賞一下洱海月色；唔講都唔記得大理「風花雪月」之中洱海月都有份架，所以就等多陣睇睇洱海月係點既先


八點過後月亮開始慢慢升起






見到洱海倒影出來既洱海月！但呢個位置唔係咁好，好多水草阻住，倒影唔係咁清晰




所以就行去另一個位，睇下邊道可以行出海邊，要接近洱海先得；我就揀左呢道，穿過啲樹行到海邊（如果沿環海西路向前行多一兩分鐘就係海邊，當時我唔知所以先選擇穿過小小樹林，行樹林如果唔睇路就會好易踩落水）


呢個位唔係最好，但都好過冇啦，一路望住月亮等天黑










圓碌碌既月亮都幾靚丫




月亮越升越高就越難影到洱海中既月亮倒影，影多幾張就算啦唔影lu，細心享受呢個洱海月色仲好啦




時間去到九點，喜洲呢道夜晚咩都冇，但又冇理由咁早返客棧訓覺架？咁無聊所以就去食多碗米線！今次食既唔係平時食開既湯米線，而係食我未食過既涼拌米線，第一次見米線有呢個食法！6蚊蜿涼拌米線又係咁足料，配料堆到山咁高，食落凍冰冰比熱米線更易入口，酸酸地辣辣地仲會越食越開胃，估唔到呢間小小店鋪造出來既米線比起好多地方更好食


食完都冇野好做就返去客棧啦；負責打理客棧既姨姨同佢既朋友係花園開緊餐，見我返來就邀請的一齊食，我就試左呢個大理特產乳扇，有烤過既乳扇亦都有冇烤過既；冇烤過既乳扇食落味道好似芝士，有好香奶味，同芝士分別就係乳扇硬好多，食落口好似食野一塊硬既芝士；而烤過既乳扇食落香口啲，但就冇咁重奶味；客棧姨姨同朋友真係好好客，當我返到客棧時竟然歡迎我返來，當時真係比佢地嚇一嚇，之後先知道原來平時好少好少香港人來到喜洲海邊，我更加係佢地見既第一個香港人入住客棧，所以佢地特別開心，哈哈^^




客棧一樓有一個小小平台可以欣賞風景


月亮又光又圓，照到大地好光，睇野好清楚；唔通呢個就係真正既曬月光


可惜天上既星星睇唔清楚呢...


地下全層都比我霸晒，今晚又可以舒舒服服訓覺啦