檳城。姓氏橋﹑張弼士故居(藍屋)﹑KTM火車

^^ Merry Christmas and Happy New Year ^^

< 新加坡﹑馬來西亞8天遊 >

第五天（續）

今日係吉隆坡逗留短短幾個鐘，而家就要繼續北上，向位於馬來西亞北部既檳城出發！


係閘口前等左一陣，開車前二十分鐘就可以入閘啦


買馬來西亞火車票非常方便，到馬來西亞鐵路部門官方網站就可以買到
網址：http://www.ktmb.com.my/
買票亦好容易，首先入去e-Ticket，簡單注冊一個帳號，然後就可以揀出發地方；由吉隆坡去檳城就選SENTRAL KUALA LUMPUR到BUTTERWORTH，再選擇日期就可以見到來往兩地既班次，我想坐夜車所以就揀20號班次；網上買車票仲可以選擇唔同車箱唔同座位，我就揀左Superior Night Class（即係最平既臥鋪），再揀一號車箱中間位置（貪中間冇咁噪），然後就可以用信卡比錢，自己print張乘車證出來拎住就可以上車啦；買馬來西亞火車票比起買大陸火車票真係易好多，而且最正就係咩都可以自己揀

呢部就係馬來西亞火車




我坐既第一卡就係最前有圖案呢卡




再前面就係貨卡同兩個火車頭；坐第一卡有個特別地方，就係火車行車時會聽到火車頭既氣笛聲，怕噪既話揀另一卡比較好，不過我覺得咁樣仲特別啦，哈哈^^




上到車好易就搵到位置


床位排列成左右兩邊，同大陸火車好唔同


今次揀左下鋪，車費只係RM46，好抵坐；床位比起平時係大陸搭開既硬臥更闊更加軟綿綿呢，好舒服^^見火車外表有啲殘舊，估唔到入面係咁乾淨舒適




每個床位都有簾，拉埋就唔會比其他人影響到


不過我個床位係爆左玻璃
除左我個位，我發覺好多窗都係爆玻璃，好彩只係爆左外層而冇爆內層，都唔知搞咩玻璃可以穿成咁，就好似比子彈打中一樣！


開車前突然有人問我可唔可以換位！但拎個上層仲要係邊位就想同人換緊係睬佢都傻！一來我個下層位係比佢個上層位貴，兩來我早成個月上網買票就係想揀個靚位咋，點可以就咁就比左人架！


開車後就有職員來檢查車票，拎print好個張紙出來就得


火車係黑暗中向檳城前進


神奇既事出現啦，係我打完電話返屋企之後電話突然可以上返網，可以check地圖啦！而家距離檳城仲係好遠好遠，不過訓醒就會去到檳城！


第六天

未夠五點就醒左lu，火車已經接近檳城


氣溫唔係好高，不過天氣好似唔多好bor


大家都仲未訓醒；係到站前職員會來提醒你落車，唔怕唔知醒


過埋條橋就到站


火車5:25分準時到達Butterworth（北海）；北海已經係檳城之內，不過同我地平時認知既檳島與喬治市尚有一海之隔


呢道估唔到唔係好多人落車，我個卡只有幾個乘客落車咋，連後面車卡都只係得幾十人，比我想像中少人到檳城


因為北海站係盡頭，所以火車頭要轉方向先可以繼續北上旅程






離開火車站，跟住指示上天橋，幾分鐘就行到去碼頭




由呢道去檳島船費RM1.2，而由檳島返過來係免費唔收錢


嘩...1 Can for RM1，呢道飲品好平丫
係新加坡時見可樂係SG3罐，吉隆坡就係RM3罐，呢道竟然係RM1！檳城物價比起新加坡吉隆坡都平好多！


六點先有船開出，大家都要乖乖地坐係道等上船


時間差唔多可以上船啦


呢部船可以戴人亦都可以戴車，渡輪下層係汽車專用，而上層就用來戴人，多車時汽車都可以用上層




渡輪同香港汽車渡輪冇分別，大家睇上去都係一樣，只不過香港除左特別車輛之外，汽車渡輪已經停止服務大眾好多年，但檳城汽車渡輪仲係好重要既交通工具




向前面檳島出發


大約十五分鐘就到啦


檳城未有咁快天光，落左船都仲係天黑唔知去邊道好，而且四圍都咁黑唔敢行住，所以就戇居居坐係碼頭邊既巴士總站等天光；碼頭呢道除左一個巴士總站就咩都冇






等到七點開始天光啦，我都準備起行，睇下可唔可以搵個靚位睇日出先


行返去碼頭入面睇


但天上有太多雲，只見到少少金色雲彩，今日日出冇望啦...




睇唔到都唔緊要，檳城之旅正式開始


由碼頭行幾分鐘，就去到檳城好出名既地方「姓氏橋」，第一個見到既姓氏橋係「姓林橋」


「姓氏橋並不是指一座單獨的橋，而是很多橋的總稱。當年華人下南洋到了檳城，從事貿易與漁業，以海為生，所以搭起橋板，在上面建造房屋，形成一個個獨特的小村落。因為同姓者同住一橋，所以稱為姓氏橋。」



「姓林橋是最靠近渡輪碼頭的姓氏橋，建於19世紀中期，橋民原鄉於中國福建省泉州同安縣後村莊。據目前統計，約有40戶人家。」

姓氏橋感覺上同大澳有少少相似，大家既房屋都一樣起係海上，而屋與屋之間都係用木板鋪成通道


而家仲有好多人住係姓林橋，我去到岩岩就係大家出門返工返學既時間，好多人係屋企走出來，咁早就去到打搞人地有啲唔好意思


由姓林橋望下唔同風景








離開姓林橋繼續行好快就見到姓氏橋之中最大最有名氣既「姓周橋」，但係門口見到有告示板寫住參觀時間九點先開始，我都係跟返人地規舉遲少少先入去，而家去搵早餐食先；路過一個飲食中心但未開門


華人有自己既義務消防隊！聽聞呢支消防隊比起政府正規消防隊更有效率！




行行下見到有一個大排檔開左門，咁就係呢道品嚐檳城第一餐美食啦




檳城出名美食多，第一餐先試下炒粿條；係檳城食野好方便，好多地方都可以搵到大排檔同餐廳，而且差唔多個個華人都識廣東話，咁就唔怕叫唔到野食啦


叫左野食就揀個靚位等開餐
等緊既時候有人過來問想飲咩，咁就岩晒啦係火車上冇野飲，即刻叫杯凍飲先；檳城呢道如果想係大排檔食野，規矩上都係要叫野飲，因為大排檔多數係由飲品店經營，其他人係借地方賣野食咋，所以去到人地地方當然要飲返杯野啦，而且啲飲品都係RM1-1.5蚊杯非常抵


我個炒粿條好快到啦
炒粿條就好似我地平時食開既炒河粉，不過炒粿條就好足料，睇上去配料仲多個粉，完全冇偷工減料，再配上檳城既香料一齊炒，味道非常好，呢個係香港食唔到架！不過檳城野食份量比較少，食一個好似唔多夠飽，哈哈


慢慢品嚐完炒粿條後太陽都出來啦，係時候出發繼續參觀姓氏橋


去到比較新既「姓李橋」


「姓李橋建於19世紀末期，橋民原鄉為福建省泉州同安縣兌山村。現在住著25戶人家。最早期的姓李橋是位於現今的碼頭地段，後來因受到渡輪碼頭擴建計劃的影響，才易地重建。橋兩旁搭建對稱的木屋，看起來比其他姓氏橋來的整齊，且保持了一致的建築風格，大部分都已捕上新漆，予人不同的感覺。」

姓李橋唔大，一眼就可以望晒，睇落好整齊




行到盡頭就可以見到好靚既海景






天氣好好，藍天白雲出來啦




望到去好遠既檳城大橋


好快睇完海景就行返出去lu，向下一條橋前進




行過旁邊就去到姓氏橋之中最出名最有人氣既「姓周橋」


「姓周橋是姓氏橋當中規模最大的一座橋，橋上約有75戶人家。建於19世紀中，橋民原鄉於中國福建省泉州同安縣杏林社。」

一入來就見到有商店啦，又可以見到有其他遊客來到姓周橋參觀，我相信姓周橋一定有過人之處先可以吸引到大家注意




房屋建築係長長木制走廊兩旁，係路上可能較難發現，其實走廊同房屋下面就係大海啦




一直向前行，去到接近盡頭就可以見到大海






好多小漁船停泊係橋旁邊，見到唔少村民都係依靠漁業為生，睇黎姓周橋居民仲保留住自己傳統文化，睇落都唔錯丫


橋最尾有間廟，靠海生活既漁民都係習慣求神保祐




可以見到遠處有另一間更大更靚既寺廟




中間申出海個條就係頭先去過既姓李橋啦


椰子？


用膠筒起樓


由呢道望出去風景都幾好丫，感覺好舒服






檳城都有龍船？不過端午節都過左咁耐無緣見到龍舟落水...






有興趣的話可以住係呢道體驗一下當地人住宿環境，有兩個外國人就住係道望住大海曬太陽！以前我都曾經住過大澳棚屋，我相信兩者感覺都係差唔多




好多地方都有介紹呢道係「初戀紅豆冰」拍攝地，但我就未聽過呢套戲








唔知點解姓周橋呢道好多居民都打開門，隨時行入去都冇人知架！唔通呢道真係咁安全，開住門都冇問題？咁多遊客行來行去都唔關門真係好大膽！






屋與屋之間有少少空間




啲衫咁掛容乜易跌落海呢




行返到入口位又見到好多人lu


離開姓氏橋就先行去今晚住既hostel放低行李；hostel位於「愛情巷」，今次又要麻煩google map幫手帶路






沿路風景都超靚架！檳城街頭有好多壁畫同藝術裝置，一路行一路睇都唔會悶




呢個就係檳城最出名既壁畫啦


檳城特色三輛車


繼續一路行一路睇














經過一間好大既清真寺


呢個感覺上好古老


成個喬治城啲建築都超靚，舊有建築保留得好好，唔係見到咁多車係街上行都以為自己去左古代










望到檳城最高建築物「光大大廈」




繼續行繼續行




見到咁靚既英式建築就知道已經去到愛情巷（Love Lane）啦！據說愛情巷呢道以前曾經係水手落船之後尋覓速食愛情既地方，所以就有愛情巷呢個名，不過而家當然冇呢回事啦（或者仲有都唔出奇，不過我就冇遇到啦，哈哈）




呢間就係我住既hostel，入到去放低背囊，最重要係可以抖下涼，出面咁熱係室內就最舒服，舒服到唔想走


休息左一陣想懶下唔走都唔得，因為要係指定時間去到藍屋參觀，出發！








由hostel去藍屋行五分鐘就到，成功趕係十一點前到達；藍屋一日只得三個時間開放，過左就要等多三個鐘




今日開放時間係十一點﹑二點﹑三點半，入場費盛惠RM12


藍屋因為藍色所以叫藍屋，但呢道真名其實係「張弼士故居」，以前係有錢人張弼士屋企，而家就變成高級餐廳﹑酒店；藍屋係馬來西亞現存最大既中國園林式住宅，不過只係開放一少部份比我呢啲街外人參觀，所以見唔到佢有幾大






入面已經有唔少人等緊導賞員出來帶領




室內佈置好講究，門框窗框都精雕細琢，見到咁靚既雕刻就諗起之前係安徽參觀過既木雕樓，個道雕得更宏偉更誇張








導賞開始啦，大家排排坐聽導賞員講解，不過我最怕就係聽書架啦，而且仲要用英文講都冇心機聽，悶到我恰眼訓，sorry...不過我聽來都冇用，好快就已經唔記得晒佢講咩啦，我一向都唔係好學生黎架，哈哈


柱上同好多地方都有雕刻








建築上好多地方都係因應風水佈局而設計，不過係點已經唔記得晒




睇完下面就上去上面參觀


參觀者大部份係外國人，大多數都好專心聽導賞員講解，不過呢...其實好多講解資料已經寫左係牆上，冇心機聽英文自己睇都可以




我呢啲壞學生就緊係冇心機聽書架啦，所以就自己行開左慢慢睇，順便影下相














二樓展示左好多當年陳設同日常用品，有錢人生活真豐富








可以參觀既地方唔多，一眼就睇晒，係呢道門後面就係高級餐廳，我地呢啲路人甲就唔可以入去lu


大約一個鐘時間就完成導賞團，想留耐少少都唔得架，夠鐘就要清場








出到來係最熱既正午，最好當然就係返去hostel避避暑，快啲行返去先得


返到來就最舒服，不過時間尚早未準備好房間暫時唔可以上房，咁就坐係大廳抖抖順便幫相機電話差差電，琴晚係火車冇得差已經冇咩電啦






輕輕鬆鬆休息下，一陣就要出去開餐啦！