吉隆坡。獨立廣場﹑舊火車站﹑國家清真寺

< 新加坡﹑馬來西亞8天遊 >

第八天

唔經唔覺就到左旅程最後一日，今日凌晨由檳城坐火車到吉隆坡，下午就要坐飛機返香港，時間都算充足，上午有少少時間仲可以出去吉隆坡市區行下，點可以浪費寶貴既時間呢~


同去程一樣今次都係坐同一款火車同一款車箱，唔同既係今次我係訓上鋪而唔係下鋪；上鋪比起下鋪高度矮少少，坐係床上會撞頭，而且窗口亦都比較細，不過價錢亦都平少少




檳城係中途站，我上車時大部份人已經係車上而且拉好簾訓覺，我上到床都拉埋簾好好地訓一覺啦


火車除左臥鋪亦都有座位選擇，座位睇落唔錯，位與位之間好闊


仲有餐車


未天光五點幾，火車準時到達吉隆坡火車站；咁早落車時間比較尷尬，都唔知做哂好...






出到去先再作打算




太早地鐵都未開門


呢個時間麥當勞就係大家既好朋友，有佢陪住就唔怕天黑啦


火車站除左麥當勞之外就冇其他店鋪開門；麥當勞已經有唔少人係道，唔知佢地係唔係坐通霄呢？




馬來西亞好興自助拎野


咁多時間我就順便係呢道開餐，食既野同香港係一樣


價錢都係差唔多


坐到七點鐘，我都出發啦；首先係火車站呢道放底行李入locker，只係拎相機等等重要野出去就算，出去行一陣懶得拎咁多野


晨早地鐵站人好少，好快就買好飛入閘上車






列車冇駕駛室，可以企係車頭睇風景




坐兩個站，好快就到「Masjid Jamek」落車




吉隆坡塔


有間廟？


佳密清真寺


由地鐵站行大約十分鐘就來到目的地「獨立廣場」


獨立廣場對馬來西亞意義非常重大，1957年8月31日馬來西亞係獨立廣場升起馬來西亞國旗，宣佈脫離英國獨立




獨立廣場之上豎立起一枝近百米高旗杆，可能係世界上最高既旗杆；我只係由遠睇冇行近，已經感覺到旗杆係好高好高，旗杆上國旗亦好大面






獨立廣場旁邊有好靚既英式建築，呢座有過百年歷史既「蘇丹阿都沙默大樓」以前曾經係英國殖民政府行政中心，而家變為最高法院同高等法院，繼續服務馬來西亞










獨立廣場附近全部都係好靚既建築




馬來西亞郵政總局；我去呢個時間係八月尾，接近馬來西亞國慶，所以好多地方都可以見到掛滿馬來西亞國旗


離開獨立廣場，沿馬路行去舊火車站，有google map帶路好易行




大約十分鐘就行到啦；不過行得太近所以影唔到火車站全貌






唔理咁多入去先


見到郵筒就岩晒，放晒啲明信片落去唔洗煩lu；不過琴晚太眼訓所以寫唔到太多明信片，只係寄到幾張咋


睇定火車班次就唔怕一陣冇車坐


唔洗過機就可以行到去月台；火車站1910年已經建成，直到今日依然為大家服務






因為搭火車係要去中間2﹑3號月台，則邊呢個月台係冇用所以可以隨便入去影相




馬來西亞火車係咁既樣


由火車站出來，對面係「馬來西亞鐵道公司行政大樓」，設計一樣都係咁靚






左邊係火車站，右邊係鐵道公司大樓


係馬路對面終於可以見到火車站全貌




由天空影返落黎，風景一定超靚




咁大陣像唔知係唔係拍戲呢？




火車站旁邊就係馬來西亞最大，亦都係東南亞地區最大既清真寺--「國家清真寺」


離遠都可以見到清真寺73米高尖塔




清真寺係指定時間對外開放，我九點準時來到可以入去參觀




如果係女士，或者著短褲唔符合服飾要求，就需要額多著多件長袍先可以進入，我著長褲所以冇問題，簡單登記個名就可以直接入去


一入到來都覺得呢道真係好大






清真寺祈禱大廳


呢道係清真寺最重要既地方之一，普通遊客係唔可以入去


祈禱廳又高又大，入面可以同時容納八千人祈禱，所有重大既宗教儀式都會係呢道舉行


除左祈禱廳，清真寺仲有好多唔同設施，好似貴賓室、圖書館﹑誦經堂等等，佔地5.5公頃既清真寺設施好完善，不過遊客就冇機會見到啦




出面廣場都好大


所有人進入清真寺室內地方都唔可以著鞋


尖塔




清真寺其他地方








WIFI都有


祈禱廳上藍色屋企就好似一把大雨傘，十八條放射星芒（屋簷）就代表馬來西亞全國十三個州同伊斯蘭教五大戒律




遊覽完清真寺就回程返火車站




幾分鐘就行到


首先要過天橋到中間月台買飛入閘，不過呢部售票機好似壞壞地用唔到


售票機用唔到都可以係旁邊售票處買到飛


由舊火車站坐去中央車站，一個站路程只係一蚊，超價


話咁快火車就到，不過呢部火車都有唔少玻璃係爆左冇人維修






火車車箱同地鐵車箱差唔多




一個站話咁快就返到中央車站


拎返背囊同一大袋豆沙餅就坐車去機場


買機票時順便買埋車飛，今次都係坐Skybus


坐車時旁邊一位來自印尼既大哥同我傾計，傾傾下就去到機場啦




襯最後機會係超級市場買返啲馬來西亞特產


呢道都有美心月餅，不過比香港賣得貴


一條豆沙餅賣RM2.2，比檳城貴


出發前已經係網上簡好機位，又print好登機證，不過見有時間都係去左排除，拎張正式登機證上機






由大堂行去登機橋距離比較遠，所以我決定入去先，成日都好怕多人排隊會趕唔到飛機


望唔到盡頭既走廊




沿途可以睇到飛機


機場所有設施都又新又靚，而且因為太新好多地方仲裝修緊呢


本來諗住入到來先食野，不過入面冇咩選擇，只係見到三間餐廳咋，早之食左野先入來啦；左邊係快餐店，中間係BAR，右邊係麥當勞，究竟食邊間好呢？


BAR就一定唔會揀啦，麥當勞已經食過唔食lu，所以就食呢間唔識既快餐店


呢道食物同麥當勞差唔多，不過更好食
原本一直都唔知呢間係咩餐廳，直到前幾日有朋友講起去機場食「大力水手炸雞」，仲send相比我睇，我先知道呢間就係大名鼎鼎既大力水手炸雞，香港唯一一間分店就係機場禁區之內，唔怪得我唔識啦；香港個間賣得比較貴，馬來西亞就平好多，呢餐只係RM11.9咋


食到差唔多時間，就落一層去登機橋，呢個時候先要進行保安檢查；原來呢層都有一間餐廳


行去差唔多最尾既P19


入面都有兩間食店




今次乘坐AirAsia航班，好多人已經到左準備上機啦




上去


機倉睇落唔錯，因為我想睇風景，所以揀左機倉後排窗口位；AirAsia收費唔貴，無論係揀位以及膳食服務等等收費都比我搭過既其他廉價航空公司平好多


兩點鐘起飛，向香港出發


飛機飛行途中，機長開咪廣播話比大家知我地已經飛離馬來西亞陸地


機長仲介紹下面既Pulau Perhentian島，見到島上有咁靚既沙灘，仲有藍藍既大海，係島上渡假一定好正


飛過越南




開始日落


望到咁多小島，代表好快就返到屋企啦


5:35分降落香港國際機場，八日新加坡﹑馬來西亞之旅正式結束


坐車回家路上，又再遇到金黃色日落美景，好開心全個旅程都係快樂之中渡過


以前冇咩機會坐飛機出國旅行，就算計埋今次新加坡﹑馬來西亞兩個地方，我去過既國家真係一隻手數得晒，不過今次之後數目已經有一倍増幅，係唔係好多呢？哈哈^^全個旅程除左短時間係吉隆坡，大部份時間都得到朋友照顧，無論食﹑住﹑行等等所有野都唔需要我費心，我只要帶個人出發就得啦，好耐都未試過去一個咁懶咁輕鬆既旅程呢，好多謝大家帶比我呢個咁好玩咁開心既旅程，多謝^^

< 新加坡﹑馬來西亞8天遊 >

< 完 >