香港。東華慈善嘉年華

二零一六年一月三十日

今星期經歷最凍一日，又落足幾日雨，星期六放假終於見到藍天陽光，最好就係去玩啦；好好彩係網上抽中左兩張東華慈善嘉年華同英國皇家雜技馬戲團門票，比我可以同媽媽去玩返日；香港差唔多每年都有唔同既嘉年華會，不過我咁多年都未有機會去，今次係第一次入場玩咋，我媽媽更加係第一次去嘉年華會同睇馬戲表演，大家都好期待入去玩


東華慈善嘉年華位於啟德遊輪碼頭旁邊，最方便就係去油塘地鐵站轉乘免費穿梭巴士，由油塘A2出口出茶果嶺道再向後望就會見到，巴士3-7分鐘一班，好多車




巴士唔停站好快就去到嘉年華會門口，呢個時間陽光超好丫！






換好飛就可以入場，嘉年華入面無論玩同食都用呢啲儲值卡比錢，好方便；入場時每張儲值卡入面都有$280，超開心


嘉年華地方好大，入到去首先四圍行下，見到有一個攤位遊戲好吸引我，因為獎品係鴨仔！！暫時唔玩住，四圍行下先！！！






香港最高既跳樓機，一陣都想玩




全個嘉年華最刺激應該係呢部陀飛輪，佢仲係全世界第一部，一定要玩




見到有得免費抽獎我又排隊先，我同媽媽都抽中朱古力，見前面幾個都抽中其他大獎




馬戲表演就快開始，座位係先到先得，早啲入面坐個靚位




馬戲門票要另外買飛，我已經有飛係手就可以直接入去


門票分$480同$180（而家冇分Zone A﹑B﹑C，早啲入去坐Zone A最正）
﹑

一入去感覺好有馬戲氣氛，我第一次係帳篷之下睇馬戲
早15分鐘入場已經坐左好多人，大家都好醒目早好多入去搵位






呢啲七彩既係$180位置


前面就係$480既VIP位，好彩張免費飛係VIP位我先有機會同媽媽坐前面咋，平時我邊捨得買咁貴既飛；坐正係舞台旁邊，感覺真係好正


表演準時開始






好驚險既轉圈表演






又蒙頭又跳繩，緊張刺激，幾驚佢地失手






每次大表演之間都有小丑出場表演搞氣氛，次次都引得觀眾大笑，因為佢真係好好笑；最正係佢會同觀眾互動又佢同觀眾一齊玩，我相信大型既馬戲團都做唔到呢種同觀眾真正交流（見大型個啲好多都係啲媒扮觀眾上台？）


兩位美女上台演出








又見你啦


今次帶左兩位小朋友上台玩，小朋友玩得好好笑，佢地家長應該仲開心，係咁影相，哈哈


疊羅漢






扯鈴表演






小丑又拉左幾個觀眾上去玩，幾驚佢叫中我，哈哈；不論台上台下都笑得好開心


又有美女出黎表現，配上Let It Go超正！




好優美既畫面






最後就係電單車鐵籠演出，細細個鐵籠入面要入三部電單車，加上引擎聲音，演出好精彩






最後小丑同大家都出來感謝大家






一個鐘多少少既演出一眨眼就過，可能呢個就係快樂不知時日過；我問媽媽今次表演好唔好睇，佢去大陸旅行時成日都係唔同地方睇相似既雜技表演，佢話今次呢個係最好睇既一個演出；我都覺得呢個表演真係好好睇，開開心心就過左個幾鐘，哈哈

出到黎天色冇咁好，多左好多雲


去小食部食啲野先，有飯有麵有pizza又有好多其他小食揀，用儲值卡或現金都得


同媽媽一齊食左炸雞&雞蛋仔




食完就去玩下攤位遊戲，呢道有好多攤位遊戲玩，而且好多公仔款式都好靚好可愛架




媽媽話米奇好靚叫我玩下，可惜辜負左佢，中唔到


維尼都好得意






返到黎我最鐘意既鴨仔攤位，但玩左好多次都唔中...呢道既攤位遊戲收費都係20蚊一局，每局遊戲有4次機會（我見到既都係咁，唔知有冇例外呢）；鴨仔呢個攤位係全埸最受歡迎架，哈哈








鴨仔又中唔到，四圍行下先














呢個機動遊戲最多人排隊，大人小朋友都岩玩


場內有好多增值站比大家增值儲值卡


行左咁耐到我玩機動遊戲啦，就挑戰呢個香港獨有既陀飛輪




上機


呢部機好痴線！係上面完全估唔到佢轉邊個方向！以為佢轉左佢又轉右，以為轉上又會轉下，總之就係估佢唔到，中間慢左落黎以為玩完點之又開始轉過，天旋地轉完一輪落黎時有小小暈暈地，不過以機動遊戲黎講呢部係超正，一定要試下咁特別既遊戲，去到一定要玩！






去第道玩先










呢部都想玩架，可惜今日冇開


準備玩香港最高既跳樓機




之前有人玩完，今轉得我自己一個坐上跳樓機玩


咁多位任我揀；我揀左向維多利亞港位置，上去睇風景都好


上到去睇風景係超靚，面對超過180度冇遮擋維多利亞港夜景，上去就知道香港風景係幾咁靚，而且上面好靜，可以靜靜欣賞美景；跳樓機上到最頂有十幾二十秒停定比大家欣賞風景，可以慢慢睇；大家玩過都知道跳樓機其實冇咩離心力，跳樓機最驚既地方就係唔知佢幾時跌落去，不過呢部機睇人玩一兩次就知道佢跌之前有咩變化，咁就唔拍睇睇下風景突然跌左落去啦，哈哈


玩先跳樓機就去玩下其他攤位遊戲，不過冇收獲


















最後都係去鴨仔攤位作最後挑戰








不過...係呢道掉左成兩百蚊都掉唔到隻鴨返黎，其實只要掉爆一個氣球就得
我見其他人好易中架，好多人都一次就得，有人仲中到兩個有大鴨，唔知點解就係我冇，唉...唔開心...


係道玩左好耐都係時候走啦，見好多人拎住鴨仔同其他公仔，唉...激鬼氣，用晒啲錢去買雪條食冇咁嬲




出口旁邊就係巴士站，係道坐車返油塘


除左冇得拎鴨仔走之外，係呢道無論係玩遊戲同睇馬戲都係好開心，咁就過左一個開開心心既星期六；最開心既係可以同媽媽一齊黎玩，我同佢都係第一次去呢啲嘉年華會玩架，雖然佢唔玩機動遊戲，不過有馬戲睇，有咁多攤位遊戲比佢玩佢都一樣好滿足，呢道係一個大人細路都玩得開心既地方，下次有機會要玩玩唔同既嘉年華會先得！



離一離題：
同日去左觀塘一個特別既市集叫「天空市集」，係觀塘一座商業大廈天台，上面風景好靚


有好多特色野賣，好多仲係檔主全人手製造，出面有錢都買唔到架


鴨仔同貓仔影張相先，Hello！！