高山。高山古街﹑高山陣屋﹑飛驒牛壽司

< 日本中部﹑關西﹑中國15天遊 >

第四天（續）

琴晚匆匆黎到高山又匆匆離開，未有時間係高山停留，今日終於有時間係高山遊覽一下，雖然只係短短幾個鐘，不過都夠去兩個高山重要既地方「高山古街」同「高山陣屋」；其實以前我係完全唔識高山呢個地方，係上年開始好多旅遊節目都介紹呢道先知有個咁既地方咋


黎到高山一步出火車，已經可以睇到高山落緊雪啦，不過雪唔大，相機好難清楚影到雪出黎，拍片就可以拍得出飄雪；我朋友係第一次感受飄雪，佢好開心咁拎電話出黎係咁拍片，哈哈^^見到落雪我都好開心，我都係第一次見咁靚既飄雪


落左車先係車站locker放低朋友個喼


係玩之前要做左正經事先，就係買呢兩日去奧飛驒用既pass，有pass可以慳少少交通費；一出火車站就係遊客中心，以為係呢道有得買，但佢冇要去旁邊另一個地方先有得買，呢道職員指左我過去


買pass既地方有啲難搵，轉左一個圈都見唔到搞到又要返去問，原來就係紅色JTB招牌呢間鋪頭仔買，pass每張￥5150




係JTB比錢買完都未係一張正式既pass，要拎張紙過旁邊濃飛巴士總站換返張正式pass先可以開始用




張pass就係咁簡易既一條紙仔 （見人地係名古屋買既好似靚啲），入邊最重要係包左兩日來回高山新穗高既交通費同新穗高來回纜車費用，比起分開買平唔少架，所以一定要買


我就係買左左上角￥5150個款
http://www.meitetsu.co.jp/recommend/catalog/hida2015_back.pdf

係巴士站搞掂所有野，今日高山之旅正式開始
由火車站向東行，行去位於三之町既高山古街，路程唔遠大約10分鐘就可以行到；沿路見到一點點飄雪，感覺好唔真實，平時唔會有機會見到咁特別既天氣




路過一條商店街，好冷清


過埋條河就到


黎到高山古街，見到好多傳統建築，由江戶時代（1600年）開始呢道已經好繁榮，到而定都係咁繁榮；呢道靚係幾靚，但好多日本地方都有類似既古街，我又覺得冇咩驚喜，而且網上啲官方相影到呢道好靚，黎到反而見唔到咁靚，哈哈




之前睇每個電視節目都介紹呢道有好出名既飛驒牛壽司（上得電視應該冇伏掛，旅遊書介紹個啲成日都好伏！），黎到想搵黎試試；基本上唔洗搵，見到有人排隊個道就係


呢道有兩間飛驒牛壽司店，兩間係正斜對面，見一間多啲人一間少啲人排隊




多人個間其實都係得十個八個人，咁就排一下啦




用最靚既5級牛！唔係掛！


壽司有ABCD套餐選擇，難得黎到我就揀最貴既D餐，￥900兩件壽司！成世人都未食過咁貴既壽司！


壽司就係咁啦，睇落好生
就咁食塊牛肉真係好滑，我唔慣食生肉，感覺好奇怪，而牛肉配壽司感覺都係好奇怪，山長水遠黎到都值得一試（個底係塊餅一樣食得）


對面間咁少人既？


古色古香既古街














今日又會咁好天






沿古街行到去高山一個重要地方「高山陣屋」






陣屋要收入埸費￥430，唔係好貴






又會咁熱都曬唔融啲冰？




高山市係古代係飛驒山區既首府，德川幕府時代已經設有政府機構管理飛驒地區，而係1615年就興建左高山陣屋作為辦公室；古代既日本有好多地方都設有呢啲政府機構，總共有60個以上，不過現存就只係得返高山呢一個，所以就算我冇咩興趣都要入黎參觀一下，物以罕為貴ma




入陣屋前要先換拖鞋，全程要拎住自己對鞋行




一入去都覺得陣屋又大又靚




好多地方都可以比我地行入去參觀，唔會欄住




有個小廚房




入到室內冇陽光既地方凍左好多，屋頂啲積雪都唔融


有好多唔同用途既房間








屋外有小花園，可惜而家冬天冇咩好睇




係道捉棋一定好有feel


廁所


廚房超大








大廳


日本古代用既轎好細部，想坐直都可能會撞頭


刑場


旁邊有一個小小博物館介紹歷史同展出一啲文物，入面唔可以影相，而且只係得日文介紹，唔知佢講咩




出返黎出面，入左休息室嘆暖氣，最重要係入黎cup印




走人lu，行返去古街個邊






路過高山市記念館，冇入去


高山古街




高山好多地方都有呢個賣，￥100一串好平，不過又咸又奇怪，唔岩我食




兩間壽司店都有人排隊bor，大家買完第一時間都係對住壽司影相，哈哈






見到有人排隊買飛驆牛串燒，我未食過都買黎試試啦






買左兩串，一串￥300一串￥500，睇個名都唔知有咩分別


講真呢兩串味道冇想像中咁好，都係普通一舊牛肉分唔到係唔係飛驒牛，而且啲肉仲有啲「鞋」又硬，唔值得賣到咁貴囉，朋友都話唔好食；香港好多串燒又平又好食過呢道




行到出大街，入左7-11買野飲，日本7-11都特別靚又多野賣






過兩日會再返黎宮川朝市


又再返到古街，條街好多人








呢個時候雪大左啲，相機終於可以影到落雪啦


雪花丫


見到啲飛驒牛肉包好吸引，要買個試下




￥500一個包好貴丫




難得個包理想同現實咁似，食落仲非常好食，味道一流




街上都有啲其他商店賣平啲既包，我就冇再試lu


食完個包，係高山行得差唔多啦，夠鐘返去火車站


頭先冇咩人個間壽司店都好多人


7-11都有銀行？


返到火車站拎行李，再去旁邊濃飛巴士站坐車去下一個目的地啦




四個半鐘快閃高山遊完成，行左高山古街同高山陣屋，最特別都係試左飛驒牛壽司同飛驒牛包；行完高山之後將會坐車去位於奧飛驒溫泉鄉既平湯溫泉，個道既溫泉都係好出名，今晚又可以浸溫泉啦，哈哈