高山。飛驒古川﹑宮川朝市

< 日本中部﹑關西﹑中國15天遊 >

第五天（續）

奧飛驒行程結束，要開始回程返大阪啦，首先要坐車返高山，再經白川鄉金澤最後到大阪，路途好遙遠；今晚先係高山住一晚，第二日再繼續趕路


呢個時間好多人等車返高山，好好彩黎左兩部車先可以上到咋


今日無點食過野，偷偷地拎呢個包出黎食；呢個係傳說中既炒麵麵包，香港應該無得賣？竟然可以將炒麵同麵包兩樣野放埋一齊都幾好野，味道當然都好特別，就係炒麵同麵包味囉，同分開食無分別


唔洗一個鐘車程又返到黎高山，到過呢道幾次好熟路


黎到高山第一件事就係先去酒店放低行李，估唔到呢間「Country Hotel Takayama」好近火車站，一過馬路就到


酒店好平，雙人房先HKD$396一晚，不過房間就非常細間，岩岩好放得落兩張床，同琴晚溫泉旅館比細好多


睇岩火車班次就要出動，放低行李係酒店趕去火車站上車，今次坐車向北出發




沿路都有雪睇


搭左一個站，十五分鐘車程去到飛驒古川站，呢道都算比較冷門，無高山白川鄉咁多人認識




出到火車站一望，真係好冷清，人影都唔多個




行到去飛驒古川最出名既老街，完全係無人，而家先發覺天已經黑咩人都走晒；其實而家只係五點半多啲，以香港人角度睇仲係好早，早到工都未收




飛驒古川火車班次好少，就算冇野睇想走都要等成個鐘之後先有車，咁就四圍行下啦，見到有條河就走去影下相




環境都幾靚架，有一陣古樸鄉村味道




行左去老街另一邊；夏天時會有好多金魚係小河游水，冬天咁凍就無啦，講真呢道古式古鄉係幾靚






時間差唔多，行返去火車站等車lu




火車好少人，今次無換指定席，坐自由席都好多位；我用個張北陸pass係5日內只可以換4次指定席，自己席就可以任坐，返高山咁短路程就唔換啦






返到高山站，見到兩列火車駁埋一齊，我諗返起呢班車咁岩就係早兩日坐去下呂既同一個班次






高山住既酒店係正火車站對面FamilyMart樓上，早兩日買野時都無留意


先唔返酒店住去搵食先，沿高山其中一條大街行，估唔到而家7點成條街都靜英英，舖頭關晒門，連商店街都好冷清


搵左陣先見到兩間營業中既餐廳，我睇中左間細啲既


揀佢既原因好簡單，佢出面有晒食物相同價錢，唔怕唔識叫，哈哈




舖頭出面可以見到廚房


估唔到入面幾枱都係外國人，夜晚係高山想食野真係無咩選擇


朋友鐘意食日本米，叫左個貴小小既飛驒牛肉飯，佢話幾好食，不過個飯盒底好高，以為好大盒但其實唔多


高山拉麵算係出名，我終於食到啦


食完野本來想去高山古街行下，不過見到成條街都好黑有啲恐怖，唔敢行入去...


夜晚無咩好做，行返酒店算lu；之前日日都晨早起身玩到夜，無邊日可以早訓，今晚應該可以早小小休息啦？返酒店時天開始落雪，氣氛好正




返到酒店樓下見到FamilyMart，忍唔住走左入去買野食，日本便利店啲野又平又好食賣相又靚，就算食飽左都要買返個


香港便利店都一樣有意粉有飯賣，但人地日本個啲好食100倍囉




食到好飽...沖完涼就可以休息啦，聽朝時間緊迫又要早起身



第六天

一朝早街上鋪上薄薄一層雪，四圍都係白色幾特別






一路行雪開始變得大，可以影到出黎








落雪中既高山古街




咁早到河邊係為左黎「宮川朝市」；話明係朝市就緊係朝早黎先有野睇，之前下午黎過係咩都無；宮川朝市係日本3大朝市之一，黎到高山一定要黎睇睇


朝市有好多小攤檔，唔知係太早定太凍，朝市唔係好多人




見到有小攤檔賣章魚燒，未食早餐既我即刻比佢吸引




黎左日本幾次都未正式係日本食過章魚燒，今日我終於完成左呢個心願，我食到啦！


朋友把遮放係地下一陣已經鋪滿雪，我就懶開遮，靠件風褸幫我檔風檔雪


小攤檔有好多野賣，食既又有睇既又有








朝市係河邊，可以行落去睇風景，落住雪既白色風景好靚






雪中狗狗


雪中鴨鴨




雪中貓貓


宮川朝市唔係好大，好快就行到朝市另一邊




時間晏啲多左好多人來行街






係道買左小小紀念品，行返去另一邊離開




雪越落越大粒，望出去多左層白色


去旁邊高山古街望望，朝早人唔多而且又落住雪，感覺特別靚






好大粒雪


踩係雪上會出現腳印；呢啲雪唔滑，同平時行路無分別


係古街行左陣就要返酒店check out lu，睇住時間要趕搭下一班去白川鄉既巴士




好快將會再次去到白川鄉，上次係白川鄉逗留既時間唔多，今日再有一次機會比我慢慢睇，希望今次可以見到更靚既風景啦！