鹿兒島。櫻島﹑城山公園

< 鹿兒島﹑宮崎﹑指宿﹑熊本6天遊 >

第五天

三日鐵路之旅完滿結束，今日會留係鹿兒島市內遊覽鹿兒島風景


今朝唔洗趕車唔洗咁早出門口，慢慢食完早餐再出發都未遲，天氣比早幾日差，天陰多雲，好彩冇落到雨


只係兩個站距離就費事搭車啦，慢慢行去碼頭，係碼頭旁邊見到有海豚訓練


前面果部就係將會坐去櫻島既船




船艙好大有好多位，亦都可以上樓上吹風




船上烏冬好出名，肚餓既話可以上黎食烏冬，我食左早餐就唔食啦




前邊就係櫻島火山，櫻島火山經常都會爆發，一年可能會爆幾百次，不過我去既呢幾日唔知係好彩定唔好彩，幾日都冇見過有火山灰噴出






火山灰就冇，雲就有好多


落左船即刻去碼頭樓下上巴士，巴士一個鍾先得一班，如果上唔到就有排等；今日既船費﹑巴士費﹑電車費都係鹿兒島pass包晒，所有交通都唔洗再比錢


坐巴士可以上山兜小小一個圈，車程大約一個鐘，去到唔同觀景台會停幾分鐘比大家欣賞風景，第一個停既地方係「鳥島展望所」，會停五分鐘，大家就趁呢五分鐘拿拿聲落去欣賞風景


可以望到對面鹿兒島市區同火山風景




巴士停係下面，如果五分鐘上唔切車就閣下自理啦，未到尾班車既話一個鐘後會有下一班來接你


下一個落車地方係「赤水展望廣場」，呢道因為有歌手開演唱會而出名，係道會停八分鐘，可惜天氣唔多好望出去既感覺麻麻










繼續上車出發，去到「湯之平展望所」，呢個係巴士可以上到最高既地方，亦都係距離火山口最接近既地方


上到黎天色靚左好多，有藍天白雲，活火山就係眼前




今次有十五分鐘時間欣賞風景，可以行去前面觀景台慢慢睇


清來見到對岸鹿兒島市區




好多地方都係綠色，環境好靚好舒服


巴士停係火山之下，如果而家爆發一定好震撼


十五分鐘過後坐車返碼頭，去鋪頭買啲櫻島特產








路邊都有野賣


去海邊吹下風


呢道有號稱最長既足湯，點都要浸一浸


海邊好多地方都鋪滿黑色既火山灰，係地下隨手都可以嗱到




有間小小既遊客中心介紹櫻島火山








2017年去到12月暫時爆左81次，早幾年講緊一年有成千次爆發


遊覽完櫻島就坐船返去鹿兒島市區，櫻島再見！好好彩頭先天氣轉好，比我見到一座好靚既櫻島火山






再轉電車去鹿兒島中央站






成功係餐廳關門之前黎到，呢間炸豬扒店係鹿兒島算係有小小名氣




又可以食多次鹿兒島既黑毛豬炸豬扒啦，賣相好靚




豬扒當然係好食，不過感覺上好似我第一日食既炸豬扒好食啲，但呢道貴啲




食完就去出面巴士站搭車上山，會上去城山


話咁快就落車，即刻行去觀見台睇睇




城山觀景台可以睇到好靚既鹿兒島風景，下面好多大廈




清楚見到頭先去過既櫻島


鹿兒島市區配上櫻島背景，超靚








城山環境好舒服


坐車落返山之後就去今晚住既地方check-in，今晚第一次住膠囊酒店，唔知係咩感覺呢？


再行返hostel拎啲行李過去，話咁快就到夜晚


夜晚冇咩好做就去鹿兒島中央站行下超級市場，睇下有咩可以買返香港，聖誕樹一樣都係咁靚




繼續清杯麵，唔知點解日本既牛奶特別好飲


膠囊酒店比我想像中乾淨，設施好齊全，毛巾浴袍等等都有，基本上只要帶個人入黎就得咩都唔洗準備，夜晚發覺好多着住西裝既人入住






我諗有個唔好既地方就係部電視機好易撞到頭


第六天

今朝要搭飛機返香港，八點幾就出門口lu


咁岩路過間牛肉飯店，見仲有時間巴士未開就順便入去食個牛肉飯先上車


天文館呢度有巴士去鹿兒島機場，上車前要係巴士站旁邊售票處買飛


國際線客運大樓冇咩鋪頭，國內線就熱鬧好多有好多鋪頭餐廳，又可以睇飛機








短短六日既鹿兒島旅程完滿結束，鹿兒島同附近既地方都好正，又有靚風景又有靚溫泉，最重要係市區都唔會好多人，我好鐘意呢道，希望將來有機會再返黎啦

< 鹿兒島﹑宮崎﹑指宿﹑熊本6天遊 >

 

< 完 >