童話世界九寨溝（下篇）

 < 成都﹑九寨溝﹑重慶12天遊 >

第六天

九寨溝第二個早上依然凍，今日唔洗再咁早起身啦，因為就算咁快去到都未有車去長海，所以約好朋友慢慢食完早餐9:30先出發行去九 寨溝；今日唔洗買門票，但就要迫入去售票處買車票，然後就可以正式入場上車（見到有唔少人由條路行上去，佢地應該冇買到車票，不過我諗只要行幾公里上山路 去到樹正寨就有機會偷偷地上到車；車上從來冇人查票，行幾公里可以睇到靚景之餘又可以慳80蚊我都想行）；上車既時候仲未知部車去邊，直至去到諾日朗先有 指示部車轉左定轉右，今次好好彩坐緊既呢部車係轉左去長海，唔洗轉車


藍色的天空，天氣好好


則查洼溝既長海係全個行程最高點，海拔3103米，亦都係九寨溝最高、最深既海子；不過黎遲左一日，如果早一日黎到長海既話就可以見到長海既雪景啦...CRY




今日呢道冇再落雪，但總算見到小小積雪，踩返幾下先


呢棵樹有名堂，名叫獨臂老人，相傳係一位藏族老獵人既化身，守護住長海


下面條棧道比樹壓斷浸住水，睇返12月朋友影既相條路冇比水浸住，水位係冬天會下降唔少，而且最凍既時候全個長海都會結冰




碧綠清澈




景觀好開揚好舒服，幾個人係呢道hea下影下相玩下玩左超過一個鐘先肯走








再見長海，坐車去長海對落小小既五彩池，唔洗多講，睇相都見到池水顏色超靚，親眼睇既感覺更加靚






加埋小小積雪，個feel靚到唔識形容








池水有時清澈，有時一片朦朧，有時金光閃閃，一個地方唔同feeling
















雖然唔捨得，都要同靚景講再見啦


好多雪丫，好耐都未掂過雪啦


睇完五彩池就坐車落山，路經上﹑下季節海，上﹑下季節海水位會因應季節而不同，而家因為近冬天既關係所以冇咩水，棧道又封閉，部車冇停直落諾日朗中心，係諾日朗旁邊既藏族村寨則查洼寨落車






呢道既杯麵10蚊個咋，平過旁邊諾日朗中心既15蚊，即刻食返個


係則查洼寨，賣杯麵旁邊有間藏式民居，入面迫左好多人，有藏人係道講解有關佢地藏族既野，企係大廳講左最少20分鐘，仲越講越誇張，話自己屋企有一千隻牦牛，又話自己有幾多身家（有冇人會信架？聽得耐都估到係咩啦，但其他人又聽得好投入！），見其他同伴聽得好開心就繼續聽下佢既介紹；之後又講左好耐，一路行一路介紹，出到後院教大家拎起塊石頭轉圈祈福；到最後終於知道想點啦，原來係賣經幡祈福，一塊經幡好似係¥20一條就¥100，見台灣朋友都買左條；呢個時候靜靜雞閃人，之後係點就唔知啦（運吉完好彩冇比人打）；大家覺得值唔值得買就自己決定啦，我就一定唔會買，一向都覺得呢D係呃人多，平時入廟都會添小小香油以表心意，但一定唔會比錢呢D會推銷既地方；眼見好多人幫襯，心諗如果你做得壞事多，你買一百條返屋企當牆紙掛都冇用啦

諾日朗中心除左食野仲有好多野賣，但我想去廁所所以離開左諾日朗中心去到樹正寨，但去到樹正寨之後D車唔肯車我返上去諾日朗中心.，搞到我搵唔返D朋友..收我咁貴車費食屎啦...唯有慢慢係樹正寨行下


買左個青棵餅食，都幾好食


來到九寨溝都唔知有咩好買，求其買左呢個返香港食，新鮮熱辣辣既時候又幾好食既




樹正寨唔算好大，四圍行來行去hea左好耐，等到就天黑其他朋友終於下來啦


突然前面變得好靚，現場睇一片金黃色，不過相機影唔出來






再上車一路住山下走，路經盤景灘等等地方，不過呢兩日睇左咁多靚景都睇到好夠，冇特別細心欣賞，望過下就算




童話世界九寨溝再見

今日早左出九寨溝，有D想去返琴日個間好多人既火鍋店試試係唔係真係咁好食，但諗諗下唔係幾敢試，大家都怕食左會唔舒服，第二日要坐長途車有事就麻煩，最後都係去返上一晚食過既餐廳；今次叫多個餸有4餸1湯，但反而平過前一晚，哈哈~仲有我最鐘意既蕃茄炒蛋同一大碟薯仔，超正！不過就唔知點解碟雲耳食到有石油氣味？


九寨溝夜晚又變得好凍，琴晚買既生果唔小心比我壓扁晒，今次再買D生果同明天坐車食既乾糧，好快就返去hostel執好行李涼都冇沖就訓覺啦

第七天

今日要更早起身，坐巴士回成都（我有D想去黃龍架，但其他朋友怕危險就冇得去lu）；係hostel旁邊一間麵店食左碗麵就坐的士去汽車站；回程又要坐10個鐘巴士返成都，好彩今次終於有個正常既中間位坐

路經松藩古城


今次部車停係另一間餐廳食飯，同去程一樣都係25蚊自助任食，有左上次經驗今次仲邊敢食，都係唔食野最好，返到成都先食餐好既


好快又到左最後一個休息站，應該好快返到成都啦？由九寨溝一路出來都係下山路，個司機又揸得好快見車過車，諗住可以早個幾兩個鐘到成都


過左呢道就要同太陽伯伯講byebye，返到成都又要過冇陽光的日子


又見到啦










部車唔知點解冇係映秀上高速公路，行多個幾鐘山路去到都江堰先上，最後又係坐左10個鐘車…不過部車經過映秀鎮入面見到有D屋成座都倒塌，見到都覺得恐怖，希望唔好再有咁多天災出現啦

回到成都，搵左好耐都冇的士，好彩以前搭開個部巴士仲係道可以搭巴士返hostel；今晚大家終於可以舒舒服服食餐飯啦


食完飯大家仲有節目，朋友已經一早預定好晚上去睇川劇，我都唔執輸一齊去睇先，不過就只係睇左一個令所有人都好失望既川劇......