長沙。愛晚亭紅葉

^^ 普天同慶既聖誕節又到啦，祝大家聖誕快樂 ^^

 < 成都﹑九寨溝﹑重慶12天遊 >

第十二天

過左咁多日終於到左返屋企既大日子，欣賞左九寨溝美景，又見到金黃銀杏，仲去左幾個唔同風格既古鎮，呢次短短既旅程好豐富好充實，四川真係有好多好地方，唔知將來會唔會再返來呢個咁靚既地方呢！係返屋企之前，先去另一個靚地方^^


今日天未光就去到機場，機場人都唔多個






機票係兩日前買，見到去長沙機票唔貴所以先飛長沙再轉車返香港；去長沙有唔同航空公司選擇，見山東航空&波音飛機都未坐過所以就揀左呢班咁早既航班


夜晚落過雨，慶幸咁多日都天公造美，直到呢刻都唔需要開遮


早餐就係一個牛肉包+一杯可樂，牛肉包係熱既都算唔錯，杯可樂就冇國航咁好啦冇冰加，短短既航程都唔要求咁多啦


機上廣告，100萬就可以移民去香港？ 香港有咩好丫？我就想去瓦努瓦圖多D，水清沙幼風景又靚，話晒都係我想住既地方




唔知點解機倉既顏色令人有唔舒服既感覺？可能米白色有少少唔習慣？


大約一個鐘去到長沙


係長沙停留既時間唔多，落左機就要快D行動，先去火車站寄存大背囊同買定下午走既火車票；要先坐巴士去長沙南站


長沙南站又係一個好新好大既火車站，但估唔到咁大個火車站連指示牌都係呃人既，明明寫住有小件寄存去到結果係咩都冇；好彩之前落車既時候留意到下面汽車站有行李寄存服務咋，而且D職員態度好似想殺人咁，都係靠自己好D




買埋車票就坐巴士出市區，長沙呢道比四川更凍，仲要係又濕又凍


落左車後要行好遠好遠好遠先去到目的地，雖然係地圖上明明只係一小段距離，但事實上係一望無際既直路，旁邊仲係個湖好空曠，大風吹過來凍到震




行左好耐先行去到湖南大學


行左好遠終於見到有餐廳啦，拿拿聲入去暖下食少少野先；原來簡簡單單一碗熱騰騰既河粉已經好好食啦，有種雪中送炭既感覺




湖南大學旁邊既岳麓山就係我既目的地，出發


上山既時候驚見有間麥當勞係道，好想食，不過冇時間食要繼續行


上來既目的就係睇紅葉啦，不過想睇靚紅葉仲要繼續行繼續行




呢幾位朋友玩得好開心bor


路經中國古代四大書院之一岳麓書院；岳麓書院有千幾年歷史，但今次冇咁多時間入去參觀，要繼續尋找靚紅葉




山長水遠去到岳麓山，仲唔比我見到你！今次唔係睇銀杏，係睇紅到爆既楓葉








一路行都有好多紅葉，越行得入越靚，連池水都染成紅色










好多好多好多紅葉丫




山入面一片霧氣，朦朦朧朧反而有種人間仙景既感覺










上面就係中國四大名亭之一愛晚亭，加埋D紅葉真係好靚






有老師帶住班學生黎愛晚亭參觀，好努力講解愛晚亭既歷史同亭上面既詩詞，只不過好似冇學生留心聽，哈哈




係道隨意影下相，放鬆一下








沿路都有好多好多紅葉










睇完紅葉要落山lu，再次路經岳麓書院，如果有機會慢慢欣賞咁靚既景色就好啦




係四川成日都見到有得賣長沙臭豆腐，長沙臭豆腐真係咁出名架？以前我就未聽過呢樣野啦，不過一場來到長沙點都要試一試




個樣咁黑唔係咁好睇，希望好食啦？但食左一啖扔都扔唔切，有廁所臭味


出返去湖南大學，好多學生係道叫人唔好亂過馬路




今次唔敢再搭巴士啦，行都行到腳軟，直接搭的士返火車站，雖然有小小塞車但都好快到




三個幾鐘車程，食下野訓下覺好快就返到深圳，落左車就即刻過關返香港啦




12日旅程好快就結束lu，時間雖然唔係好長，但都去左好多好靚既地方，由其係想去左好耐既九寨溝，好開心終於完成九寨溝呢個心願；旅程途中除左欣賞到好多好靚既風景，仲遇到好多好好既人，為四川旅程增添好多色彩 ；世界咁大，有好多好多想去既地方，希望將來有機會去更多更多地方，了解下我地住緊呢個咁靚既地球啦^^唔知下次會去邊道呢？

< 成都﹑九寨溝﹑重慶12天遊 >

< 完 >