西安。華清池﹑兵馬俑

 ^^ 祝大家元宵節情人節快樂 ^^   

 < 北京﹑西安﹑成都﹑雲南23天遊 >

第六天 (續)

離開北京開始踏上西安之旅；如果當時問我最想去中國邊個地方？我一定會答西安！作為一個喜歡中國歷史既人，總係覺得西安散發住無比吸引力，「十三朝古都」﹑「世界四大古都」，只係簡單幾個字都足夠令我無論山長水遠都要去到西安；漢﹑唐時長安城曾經係過百萬人口既國際大都會，更加係當時世界上最大都市，而家終於到我去長安城啦！西安 I'm coming！


由北京西站出發坐火車去西安


北京西站係一個大型火車站，乘客超多；由入站到經過安全檢查，再行去候車室，所用時間比預期中多，好彩預多左時間可以慢慢行


等到四點半可以上車，又有火車坐啦，Yeah！




今次都係坐硬臥車箱，雖然已經搭過好多次硬臥，但就係第一次坐呢種全開放式硬臥，感覺好得意，可以望到其他人訓覺；由北京去西安大約十二個半鐘，呢種時間最岩就係坐火車，訓一覺明天訓醒就會去到目的地


除左下鋪之外，中鋪同上鋪都唔夠高比人坐係床上，冇床坐就唯有坐係走廊睇風景


行李可以放上頭頂行李架；我個紅色大背囊好搶眼


今晚我就係訓上最高既上鋪，同行李架一樣咁高；我地算係比較遲買火車票，中下鋪已經冇晒相連床位，只係得返上鋪有；上鋪雖然係最窄，但好處係冇咁易比人騷擾，就算火車停站乘客上上客客都冇咁易影響到你，岩晒夜晚訓覺，好有安全感；今晚晚餐都冇食就爬左上去自閉一下，想早啲休息，但今朝訓得太多都未眼訓，而且又鼻塞左成晚，都唔知挨到半夜幾多點先訓得著，唉......


第七天

清晨大約五點鐘，火車駛入西安站，西安我黎左啦！


出到火車站仲未天光；今次係第一次黎西安，人生路不熟，出發前又聽人講西安比較雜亂，冇北京上海呢啲大城市咁安全，所以我都唔敢夜媽媽四圍走，搵個地方等到天光先行動會比較安心


火車站對出有麥當勞，咁就順便入去食早餐，冬天最快都要七點先會出太陽，有好多時間慢慢食；呢間麥當勞好奇怪，早餐竟然冇套餐賣，要自己單買汽水+薯餅+麵包砌返個套餐出黎，咁搞一搞又貴過香港麥當勞......


等到七點半終於天光，係時候離開麥當勞啦，行大約二十分鐘去hostel放低行李；西安選擇左「七賢國際青年旅舍」，貪佢近火車站，唔洗坐車行都行得到；去到hostel又食多個早餐，有我最like既蕃茄，哈哈


係睇緊去邊道玩既時候，有隻貓貓坐左係旁邊bor




貓仔好可愛丫！係旁邊走來走去，又會跳上身比你抱，真係識氹人開心




休息到大約十點出發啦，沿城牆邊行去火車站，火車站旁邊就有巴士去兵馬俑


成功係火車站右廣場搵到真正去兵馬俑既遊5(306)；火車站附近有好多假扮遊5既車，沿路行過來時有大量「好心人」提醒係遊5係邊，或帶你去上車，如果上左呢啲假車有咩後果就唔知啦...可能車你去買野，可能兜左去唔知邊道，可能......


認住呢部車最穩陣




遊5先經過華清池再到兵馬俑，華清池都冇特別想去，既然部車去到門口就入去望下啦


個名好霸氣，「灞橋」


四十五分鐘就到華清池；來到門口就要乖乖地交出六十蚊入場費，冬天華清池收淡季價錢已經平左啦，夏天更貴（而家加左價更加貴）


講起華清池，我估大家都會諗起唐玄宗同楊貴妃，呢道就係因為楊貴妃曾經沖過涼而聞名；華清池除左有沖涼缸之外仲有其他景點，一入門口就係「碑海書林」


對啲碑﹑書法冇咩興趣唔睇lu


跟住去到五間廳；抗戰期間蔣介石曾經住係五間廳兩次，所以留低左關於蔣介石既事跡






房間留低左當年民國時期佈置，有睡房﹑會議室...好多唔同種類既房間
















蔣介石淋浴室！






唔講唔知原來西安事變就係華清池呢道發生，當年張學良﹑楊虎城就襯蔣介石係華清池既時候將佢扣留，好多建築物牆上都有西安事變槍戰時留低既彈痕






行完出返來，心諗：我黎華清池唔係要睇楊貴妃既咩？點解會睇左啲咁既野架？任何有關楊貴妃既野都未見到，究竟發生咩事！行去第二道再望望先！


華清池內環境，如果以唐代建築風格來睇，我覺得志蓮淨苑靚好多




前面好似有啲唐代建築bor，去望望先


有個水池好似好受歡迎，去八掛下


原來係華清池溫泉水，免費比人洗手用，又會咁有趣


我都唔執輸，放對手落去暖一下；雖然西安比北京暖好多，但都一樣低過零度，放對手落去浸一浸真係成對手暖晒，好舒服，唔知浸耐啲皮膚會唔會滑啲呢？


係真既溫泉源頭


楊貴妃像就係我身後，但只可以影後面唔可以影前面，因為楊貴妃係除左衫架！哈哈！佢一定會覺得好凍啦！


有個太子湯？冇水既？




星辰湯，好似話係唐太宗沖涼既地方


入面係咁既？










呢個尚食湯好似話係比官員沖涼


睇完行出去，見到真既溫泉，泉水好似好熱bor？




點解會去左個比人洗腳既地方架？楊貴妃個溫泉影都未見到......




行左咁耐終於見到楊貴妃個溫泉啦，佢既蓮花湯


一眼睇晒就係咁既樣......




仲有另一個都係屬於楊貴妃既溫泉，海棠湯






就係咁睇完，可以安心離開








廁所個名又幾好聽，古代人真係好文彩


臨走影多幾張相先






出到大門口lu，再見華清池...唔係，冇咩特別都唔好再見


有人話難得去到西安如果唔去華清池既話會後悔，但去過華清池會更加後悔，而家我就係更加後悔個個啦！華清池唔係話唔值得去睇，但夏天收人百幾蚊去睇幾個咁既池就...真係睇完都會喊住出來；我明白呢個地方係有歷史意義，但都唔洗收咁貴掛？故宮咁大咁多野睇都係收四十蚊咋；而且入面又冇咩介紹，真係自己睇左啲咩都唔知，出到來我只係覺得自己睇左堆石頭，完全感受唔到華清池應有既氣派，唉...出左來同冇入過去冇分別，我諗最開心既一樣野就係可以用溫泉水洗手......

出到來就係門口等返部遊5去兵馬俑，華清池去兵馬俑好近，三蚊車費就到；門口又係有好多的士係道拉客，真係好煩，話三蚊可以載去兵馬俑，唔係咁著數掛？我先唔信！載我去唔知邊道咪大獲！都係坐巴士最安全


路邊好似有少少積雪bor，我係未見過真雪架


唔洗半個鐘車程就去到我最期待既兵馬俑
到左兵馬俑就唔理咁多，即刻買門票入場；由售票處到兵馬俑所在地有一小段距離，最快既方法就係坐車去，唔洗幾分鐘就去到兵馬俑正門




「秦始皇陵建於公元前246年至公元前208年，歷時39年，是中國秦朝皇帝秦始皇的陵墓，也是中國第一個規模宏大、布局講究且保存完好的帝王陵寢，現存陵冢高76米，陵園布置仿秦都咸陽，分內外兩城，內城周長2.5公里，外城周長6.3公里。陵冢位於內城西南，坐西面東，放置棺槨和隨葬器物的地方，為秦始皇陵建築群的核心，目前尚未發掘完成。」

秦始皇陵係一個超大型建築群，而我地見到既兵馬俑只係位於秦始皇陵外圍既一小部份，用來守衛陵園


入去啦！先到博物館參觀（睇唔明上面寫咩...）


「世界第八大奇蹟」


首先睇當年秦國冶煉技術最高超既青銅


傳說中既青銅馬車2號車，車身以1:2比例縮小，望落去比較細


銅馬車模仿真車既形狀而建造，由馬車身上就可以真真實實咁見到秦國馬車既外型同設計，由而家既角度去睇都覺得馬車好型


由車既外型，以至人既臉孔﹑五官，過左二千幾年都一樣清晰可見，當年既冶煉技術一定好強勁


每隻馬眼耳口鼻﹑表情都唔同，第一隻好似向住人笑


銅馬車咁重要係因為有佢先比我地了解到以前秦代車馬既真實面貌；雖然兵馬俑人面都有馬車俑，但其他既馬車都係用木製造，經過咁多千年木頭已經腐爛晒，咩都見唔到，所以只有銅馬車先可以保留下來




上面個部係2號車，咁就緊係有1號車啦；全世界就只有呢兩部咋，真係可以話係國寶


馬車上把遮好神奇，有個機關設計可以伸長縮短，係個道可以試玩，好神奇


馬車上四隻馬都有唔同角色；中間兩隻馬叫「服馬」，用來控制馬車；旁邊兩隻叫「驂馬」，係協助服馬拉車；不過都係四隻馬一齊出力拉


馬身上有好先進既設計，防止四隻馬互相碰撞，又唔會撞到車身；就係咁望住兩部馬車望左好耐，全身由頭睇到腳一次先肯離開


PS.而家見到既1號車其實係複製品，因為個時真個部1號車搬左去上海世博中國館未搬返來；我都有幸係上海見過1號車真身幾秒咁多架...！

馬車出土時係咁既樣，專家復修到部馬車咁靚，真係好勁！


銅製大缸


馬車上配備有銅盾牌


仲有其他武器








有兵馬俑睇bor








個個拋錢比佢，搞到人地成個乞依咁......


王維詩作 -- 過始皇墓




秦始皇陵就係隱藏係呢片土地之下，不過今次我只係參觀兵馬俑，唔去秦始皇陵其他地方參觀啦，去其他地方仲要搭車去，好遠路...


同馬車講再見，去下個地方啦


跟住會到既地方就係兵馬俑一號坑；一號坑之所以叫一號係因為佢最先被發現；1974年3月，當地一位農民係道開井時，咁岩開中一號坑位置，發現陶俑碎片，兵馬俑就係咁被發現；除左一號坑，仲有二﹑三﹑四號坑


一入去就見到傳說中既兵馬俑；相機影唔出兵馬俑既氣勢，入到去望見咁多兵馬俑感覺係好震撼，一片兵馬俑就係眼前；想像唔到古代竟然可以造出咁宏偉既建設，平時睇相都唔覺，要親身去到先會感受到呢種氣勢


兵馬俑造得比我仲高！幾百個兵馬俑組成一支強大軍隊，唔怪得秦始皇可以帶住軍隊橫掃六國


有戰士﹑戰車﹑戰馬﹑步兵，排列成軍隊陣式，秦始皇全隊軍隊活生生呈現眼前


每個人表情﹑頭髮都唔同；可以見到秦國人好鐘意扎個髻係頭上










後面個啲仲未進行複修工作，保留住出土時面貌


兵馬俑入口


就係係呢個位開井發現兵馬俑，如果個井開係旁邊少少就發現唔到lu


一號坑後面仲未被發掘；秦始皇建設兵馬俑時陶俑係彩色，直到二千幾年後陶俑出土時都保留有鮮豔顏色，但可惜陶俑出土後因為氧化，所有顏色唔夠一個鐘就消失，變成而家見到既模樣；所以一號坑後面仲未敢發掘，好似話要等到有技術解決顏色氧化問題先會繼續發掘工作






後面仲有一批陶俑等待複修








好多馬仔，襯晒今年馬年




睇到呢道一號坑參觀完lu，繼續去其他坑參觀


窗口都好有特色


去到二號坑
















可能會覺得二號坑冇一號坑咁壯觀，但二號坑一樣發現好多兵馬俑，陶俑陶馬有一千三百幾件，戰車八十幾部，而且更係呢道出現將軍俑、鞍馬俑、跪射俑，呢啲都係一號坑冇既


睇件衫都估到唔係一般士兵，係高級軍官


中級軍官


跪射俑；跪射俑手上既弩因為係木造所以已經冇左lu


呢個係立射俑？


騎兵俑


二號坑仲發現好多青銅兵器




呢個勁啦，係弩既零件；當年秦國已經發展到可以更換零件，一個零件壞可以隨時換另一個，比起當時其他國家都先進，唔怪得秦國可以統一六國


去到三號坑啦


三號坑比起一﹑二號坑細好多，呢道係一﹑二號坑既指揮部










終於睇晒所有兵馬俑啦，但唔係有四號坑既咩？其實四號坑係冇兵馬俑，因為當年都未整得切項羽已經攻入咸陽lu，仲火燒秦始皇陵，連兵馬俑都被火波及，好彩兵馬俑損毀唔太嚴重；出左三號坑，出面仲有個劇院播放介紹兵馬俑既影片，睇完之後就正式離開兵馬俑，行出去門口坐車返西安lu；兵馬俑再見！

返到西安火車站，隨便食個晚餐，凍冰冰既天氣有碗熱麵食都ok啦




食完晚餐就行返去hostel lu，琴晚係火車冇點訓今晚要早啲休息

呢日行程真係太豐富，終於去到傳說中既兵馬俑！實在太震撼啦！我都唔識點形容！本來睇完兵馬俑後對兵馬俑都唔係有好多認識，年幾前去睇左歷史博物館既兵馬俑展覽後終於對兵馬俑有更多了解；兵馬俑真係好值得參觀，好多野係要親身感受先會知道箇中奧妙架！