西安。勇闖華山

 < 北京﹑西安﹑成都﹑雲南23天遊 >

第八天

講起華山，第一時間就諗到金庸筆下華山派，什麼華山論劍﹑獨孤九劍...好多武俠小說都有華山出現，而華山永遠都係代表正義一方；《笑傲江湖》入面有五嶽劍派，嵩山派﹑泰山派﹑華山派﹑衡山派﹑恆山派，雖然現實中冇五嶽劍派，但就有五嶽劍派中既五嶽，華山地處較西方所以就成為「西嶽」啦


今日又要一早起身出發，為左可以一日來回華山所以要坐八點半火車；其實當時有好多時間足夠係華山上住一晚，欣賞日出日落，但都係因為一個「懶」字，所以就冇咁做lu；買早餐用多左時間，買完早餐就要迫入西安站追火車，好彩岩岩好趕得切，坐低幾分鐘火車就開車啦


當時係第一次搭高鐵，座位又闊部車又定，舒服過坐普通火車好多好多


高鐵行得好快，半個多小時就可以由西安去到華山北站，如果坐普通火車就要兩個幾鐘；高鐵快咁多我都唔執輸坐下先


鄭西高鐵連接鄭州與西安，而我今次只係坐西安至華山一小段，沿途路經一大片平原，如果冇記錯呢道就係關中平原，以前中史堂經常都出現呢個地方






火車話咁快就去到華山北站，我坐呢部係CRH2，亦即係日本新幹線E2系1000型列車，之前係日本已經有過一面之緣，唔怪得熟口熟面啦


出到火車站，要先去售票處買回程車票，但我想買個班車竟然取消左...咁就唔買住lu，落左山先再打算，咁多交通工具選擇唔一定要坐火車既


火車站要坐車先可以去到華山遊客中心；由離開火車站個一刻已經有好多的士同其他人拉客，由門口一路跟跟到出馬路，真係好煩丫！一向都覺得呢啲係呃人既所以打死都唔上！去搭巴士最穩陣！




本來部巴士得四個人，等左20分鐘下班火車到站，黎左個旅行團上車，咁就坐滿人可以開車lu


由火車站去一條直路就到遊客中心


但呢程10分鐘都唔知洗唔洗既車程就收10蚊，真係好貴好貴好貴


路過一個唔知咩雕塑


話咁快就去到遊客中心落車


去到遊客中心就係買門票時間，入面有便利店可以買定食水乾糧，順便買多對勞工手套就出發啦，上到山勞工手套好有用架


山下都有積雪，山上應該都有掛？未見過真雪既我見到有雪特別興奮


來到呢道可以選擇行上山定坐纜車上山；我呢啲懶人就緊係坐纜車上山啦，咁就要坐多一程車去纜車站


坐一坐車又要比多20蚊


而家華山有好多條路上山，如果係行上山多數人都會去華山峪行「自古華山一條路」，因為古時華山就只得呢一條路可以上山，路上有好多唔同風景可供欣賞，但我地呢啲潺弱書生都係坐纜車安全啲


好快又落車；呢道有條九十年代開鑿既「智取華山路」，自此之後華山就有第二條上山路啦；係道影張相當行左，哈哈


纜車站先係我要到既地方
我去既時候華山就只係得呢條北峰纜車，而家去就多左條西峰纜車，可以由西峰上北峰落，行起來會舒服好多，因為西峰比起北峰高好多架，行落山點都好過行上山；不過新個條西峰纜車真係好貴，冇記錯單程要140蚊，咪即係成兩舊水港紙！咁貴我自己行上山算啦......


北峰纜車望上去好高！


隱約見到山上纜車站


纜車去到既地方其實只係一千五百幾米高，距離最高海拔2154.9米既南峰仲有一大段距離，就算坐完纜車都仲有好遠路要走，冇計啦冇得偷懶就要頂硬上，華山真係一個考驗腳力既地方


上車出發


就咁睇華山真係好高，車程就唔係好長，七八分鐘就到


纜車下既智取華山路，見到都唔敢想像佢有3999級樓梯






已經上到好高啦！纜車路程雖然唔長，但上升高度高，望落去就好似垂直一樣


話咁快就到站啦，華山之旅正式開始


一開始就要上落梯，得一條路揀想偷懶都唔得；冬天華山真係好少人，如果係旺季呢道已經迫滿人啦，但今日人影都唔多個，可以慢慢行慢慢影相點玩都得；山上又唔係想像中咁凍，我諗大約零下十度左右，感覺上比起北京暖，但事實山上應該凍過北京，因為水樽入面既水都凍到結冰，北京反而冇呢個問題




遙遠既山好似有雲海bor？不過冬天咁乾燥邊會咁易見到雲海...呢一層應該只係灰黑色污染物，行高小小就可以見到成片大地都被污染物幅蓋，呢邊污染真係好嚴重


成個華山都係石，全都係堅硬既花崗岩


纜車站就係北峰對下位置，距離北峰最近，咁就先上北峰啦


沿路好多平安鎖


上北峰就先要穿過北峰酒店；北峰呢道真係冇咩位可以起到酒店，所以酒店就咁起係路上




財富山？


呢個又咩山？




行得高視野變得開揚，望下身後，嘩...華山雖然冇黃山呢啲山咁大，但見到其他山峰都咁高咁遠，今次真係有排行啦


左右見到個好似Y字型既山峰就係東峰同西峰，不過東西峰都冇去，哈哈


唔理其它山峰住，要先上北峰；華山自古以險見稱，有「華山天下險」﹑「奇險天下第一山」等等稱號，下面見到既樓梯係華山黎講都唔算險，有更多地方更險，但因為坐纜車上而避開左好多險要地方lu


山上都有水井打水既？


來到華山其中一個開心既地方就係真真正正見到好多真雪丫
要多啲走上雪上面踩下先，白色華山望上去都幾靚啦；不過呢道既雪變左冰唔係咁靚，一陣上高啲雪會更多更靚




慢慢行慢慢行，終於到達海拔1614.9米高既北峰（雲台峰）


由北峰向外望，好似太多樹睇得唔係咁清楚...




望出去雖然唔太清楚，但望上華山就好清楚；望向華山方向可以清楚見到華山山形同東南西峰，係上面可能唔太覺，係呢道睇就可以睇到華山左右兩面都係懸崖峭壁，一差錯腳就會飛落懸崖之下！好彩我唔怕高！加個華山論劍係呢個靚位，即刻有少少華山派氣氛，好快就要挑戰後面咁高既山峰啦！


見到有咁多平安鎖，我都買左一個
平時我就唔會花錢買呢啲野架啦，不過上到華山心情好，個老細又好傾，所以就買左個；鎖上面刻上屋企人名字，然後就可以鎖係北峰上；不過咁多鎖要揀個靚位都有少少困難，哈哈


把鎖鎖好之後，鎖匙要掉落山先叫完成；我都唔想亂拋垃圾+高空擲物，但冇辦法啦入鄉隨俗，就算衰都要做一次，大大力將條鎖匙掉左落山


離開北峰落返去lu；山上垃圾桶又幾可愛，襯返附近環境


Google相簿又自己將相加左落雪效果，又真係好match


似唔似有條魚張開個大口呢


落返到北峰同其他山峰既交界點，而家又要開始上山啦


一開始就係漫長既樓梯，要努力上


一路上景觀開始開揚




一路都係樓梯，轉個灣又係樓梯，原本以為天氣凍仲帶多左件衫係背囊，而家唔洗著不特只仲要除低件外套，行兩行已經出晒汗......






嘩...望下條樓梯，差唔多垂直


比起北峰行高左好多，呢道可以清楚見到大地被一層灰黑色污染物籠罩，不過只要高過層污染物，就會見到藍色既天空




望到頭先坐過既火車路bor


向左行由蒼龍嶺上


又一條漫長樓梯；華山好多路都起係懸崖之上，左右都係懸崖，細膽一啲都唔敢行


沿路積雪好厚；而家有欄杆就算申個頭出去睇都唔驚，但跟據華山「走路不看景﹑看景不走路」做法，都係專心上山比較好


望落山下，真係好高丫！下面屋仔細到幾乎睇唔到！






呢個好似叫「臥牛石」？


經過一大段樓梯後，有地方可以休息一下；飲水時發覺樽水已經開始變冰，所以可以飲到天然冰水


石上刻有好多字






休息完又要再努力上樓梯；傳說漢武帝﹑唐玄宗曾經來到華山，路兩旁設有欄杆方便皇帝上落，所以呢道叫「御道」


又係無盡既樓梯，望唔到盡頭，可以做既就只係努力行行行行行




經過一段又一段樓梯，到左另一個休息地方；呢道有間士多，有野食有野飲，咁辛苦上到來我都買返支可樂慶祝一下，過左呢道仲有好長路要走


前面就係鼎鼎大名既蒼龍嶺；遠睇蒼龍嶺係一條好窄好窄既路，因為兩旁都係懸崖所以就好似係崖頂上行走一樣，好驚險；古代時候蒼龍嶺冇欄杆，行起來就更驚險，相傳唐代文學家韓愈來到華山遊覽，落山時見到蒼龍嶺雲霧彌漫，山脊若隱若現，驚到落唔到山而痛哭，仲寫好書信拋落山與家人訣別，可想而知蒼龍嶺驚險程度有幾高；而家係蒼龍嶺之上有一個地方「韓愈之投書處」，用來紀念韓愈呢段經歷




行左上來啦
蒼龍嶺長度唔短，慢慢行終於行到頂；如果假期多人都唔知可以點行，咁細條路又要上又要落，容咩易比人迫左落山


換個角度睇，懸崖近在咫尺




蒼龍嶺之上又可以慢慢欣賞風景；可惜能見度實在太低，遠既景色就睇唔到啦...






華山有好多山峰，北峰已經去左，前面仲有東﹑南﹑西峰，而係三個山峰入面我選擇先去南峰，因為南峰係華山最高既山峰，而且更加係五嶽中最高既山峰，一場來到就上到最高先再打算啦；上南峰途中經過南天門，南天門其實係兩棟清初時期興建既廟宇，已經有幾百年歷史


南天門所在位置已經好高好高，望向西峰方向可以見到呢道同海拔2082米高既西峰高度差唔多




西峰頂上冇人既


山峰上有住宿地方，如果唔係咁懶係道住返晚就好啦，應該可以見到好靚既日出日落，仲有滿天星星


南天門有士多餐廳補給糧水，當然係山上所有野都會比山下貴啦，而我就係呢道食左人生最貴既一個杯麵，比起日本杯麵更貴，盛惠20人民幣一個！不過食住個熱辣辣杯麵，再飲枝冰凍可樂又真係幾正


而且食杯麵呢道風景一流，望出去就係270度無敵華山靚景，呢個view20蚊抵到爛啦


向西面望係一望無際既山脈




向東望就見到華山其中一個好有趣既地方--下棋亭


下棋亭係古代已經存在，相傳趙匡胤同道士係下棋亭打賭捉棋，頭兩盤趙匡胤輸晒所有錢同財物，第三盤仲輸左華山，所以華山有「自古華山不納糧，皇帝老子管不住」講法；傳說係真係假就無從考究，現在見到既下棋亭起係大石上，三面懸空，想去就要先經「鷂子翻身」爬落去，真係唔可以唔佩服古代人竟然可以係咁危險既地方起個亭，仲要咁好心情係道捉棋


繼續出發向最高峰南峰前進


南峰有一個可能係華山最出名既地方--長空棧道，不過都係睇下就算，唔敢玩




見到傳說中既長空棧道


唔敢玩長空棧道，都係專心四圍睇下風景仲開心




繼續向上行，已經高過海拔2090米既東峰好多啦，睇黎目標在望；原來東峰都有酒店，住係東峰酒店等睇日出真係一流，一出來行上少少就係東峰頂，對正個太陽點睇都得


有幾個人好努力上緊東峰
由上面睇落去，啲人仔細細粒就好似螞蟻一樣，大家都好努力行上峰頂，我都要加油丫，仲差少少就上到南峰頂啦






就到啦


幾經辛苦終於來到華山最高既南峰（落雁峰）峰頂啦！南峰海拔2154.9米，除左係華山最高峰，更加係五嶽最高峰，雖然未去過另外四嶽，不過來過最高最險既西嶽華山，我已經心滿意足，其他四嶽可以唔去lu


南峰已經係最高峰，望去邊個方向風景都係咁靚；企係道有種大地在我腳下既感覺，而家我就係關中最高既地方啦，Yeah！！




又望到東峰頂


其實華山就好似一塊大石頭，而我就係呢塊大石頭之上；可能松檜樹生命力特別強，竟然能夠係呢塊冇咩泥土既大石上生長，佩服佩服






人在高處視野特別廣闊，隱約見到遠方地平線，只可惜咁既空氣...又點可以睇得清楚呢......


太多工廠，空氣想好就難少少啦


身邊就係懸崖


係南峰睇夠lu，要開始落山；雖然好鐘意呢道，但送君千里終須一別，唔捨得都要離開啦


華山好多山路都整得好靚，就算落雪都唔需要擔心，有人掃雪清理山路


積雪好深丫，哈哈


由另一條路落山，呢邊好多樓梯！見到都覺頭暈！都唔知頭先係點上到咁高！


一路向下行，南天門已經離我越來越遠


落到去中峰；華山除左東﹑南﹑西﹑北峰，仲有一個唔顯眼既中峰；中峰海拔2042.5米，但因為中峰位於東、西、南峰中間，被三峰包圍所以風景冇其他幾個山峰咁好，好多時都被人忽略


中峰有「玉女祠」，傳說係春秋時秦穆公女兒弄玉修身之地，所以中峰又叫玉女峰




呢個位就係中峰頂啦


遠睇中峰就只係兩間屋同一個小平地咋


中峰外印住好多大字




離開中峰又要繼續落山，仲有好長路要走


嘩...望到下面有好多樓梯，唔係一陣要行掛




唔知呢個係咩地方呢？心諗點解有人咁勁可以將啲平安鎖鎖到係咁高架！唔係要爬上去先鎖到掛？


太陽好似開始落山，我都要快啲落山




見到一把大金鎖，睇黎去到金鎖關啦




下面就係金鎖關；金鎖關最特別既地方係關前關後路邊鐵鍊上，都有數以千計同心鎖，相傳夫妻或有情人係金鎖關鎖上同心鎖，然後將鎖匙拋到懸崖下就會夫妻同心！


由金鎖關望落去，下面就係華山所在地華陰市


離開金鎖關就繼續落山


一轉眼就返到纜車站，華山之旅係時候畫上句號啦






有纜車真係好，唔洗再行呢啲樓梯，如果真係要行我都未必有機會上到華山...


好快就落到山腳，華山再見啦


離開纜車站就要坐車到遊客中心，再諗辦法離開；部車係到遊客中心前先停係一個巴士站，所有返西安既人都係呢道落車，因為呢道有巴士返西安；最後得返我同朋友兩個人到去遊客中心，因為我想先返遊客中心去去廁所

呢個時間遊客中心既遊1已經走左，冇車返西安lu！附近又冇的士，要諗諗睇下有咩辦法走人先；見到有部旅遊巴停係停車場就試下問問佢係唔係返西安，咁岩佢又係bor，話收每人50蚊車費，係冇得揀之下都要上車啦；其實呢部係人地旅行團既車，咁岩車尾仲有兩個位就比我地上埋，不過部車好舊又行得慢，足足搭左三個鐘先返到西安


返到去回民街旁邊鼓樓落車，已經夜晚咁就唔入鼓樓參觀lu


去左回民街行下，順便搵地方晚餐；係華山行左成日只係食左個杯麵，返到來要食餐好先得




回民街係西安著名既美食街，好多西北特色小食都可以係呢道搵到


除左食，回民街仲有好多特色野賣，好多人好熱鬧


西安有一種美食，差唔多每個去西安既旅客都會品嚐一下，呢樣就係泡饃；回民街有一間老字號泡饃店「老孫家泡饃」，一場來到當然要入去品嚐一下


環境算乾淨企理


我既羊肉泡饃到啦
泡饃係西北地區回族人特色美食，當中西安最出名就係羊肉泡饃，蘇東坡有詩句講述泡饃，「隴饌有熊臘，秦烹唯羊羹」，羊羹就係我地所講既羊肉泡饃，證明羊肉泡饃係西安有幾咁高地位；不過講真，泡饃真係唔太岩我口味，泡饃中既饃係一種烤餅，食個時再將烤餅met成細細粒放入湯中，感覺上怪怪地，唔識得形容...


食飽就返hostel lu，不過唔知呢邊有咩車返去，見好多人都坐三輪車咁我都貪方便坐下；一向都知道呢啲三輪車會扼人錢，如果唔係咁過份我都冇所謂，hostel職員話由回民街返hostel車費最貴係十蚊，問左一架車開價二十蚊，雖然貴一倍但都係我負擔能力之內所以就上車lu；到落車比錢時車伕竟然同我講二十蚊一個人而唔係一部車！真係想叫佢食屎連二十蚊都要呃！今次當係自己經驗唔夠比人搵左笨，我都費事浪費時間同佢嘈，二十蚊就當比「乞衣」（乞衣我都會尊重，但呢啲只係扼扼騙騙既人我覺得連乞衣都不如）；冇咁易比啲衰人影響心情，入到hostel去暖爐邊暖返一下先，頭先坐三輪車冇門其實係好凍好凍好凍...拎部電腦出來上下網，又玩到好夜lu，唔緊要啦聽日冇咩地方去訓幾耐都得