大理。大理古城 (Part 2)

 < 雲南大理﹑昆明6天遊 >

第五天

去到旅程第五日終於要離開大理，短短幾日大理之旅話咁快就過啦；今日都唔打算去啲咩地方，主要留係大理古城，希望可以用一日時間努力探索呢個大理古城啦


今日又係六點幾起身，走到上天台，目的同琴日一樣，希望可以睇到日出；係古城睇日出可能有少少戇居，因為冇咩人會咁做，今日就只係得我一個傻仔企係天台之上等待太陽出來






呢個就係天台小平台，夠晒高可以望到好遠


冇陽光之下既大理




時間尚早只係6:35，距離日出仲有一段時間










望到遙遠的三塔


遙遠的洱海


太陽好似就出來




日出正式開始，金黃色太陽出來啦










成個太陽出晒來




前面一片大地都照得金黃色，好靚丫


另一邊蒼山已經見到藍天；今日雲唔多，相信今日一定會有好天氣


影多張相就返房間攤返上張床道啦，其他室友都仲未起身


係床上又係好似琴日咁碌來碌去，不過今日多左樣野要做，就係找卡數，好多明信片等緊我寫架！係hostel搞左好耐，最後11點離開，向三塔寺前進


先由博愛路向北行到盡頭，雖然同處一個大理古城，北面呢道明顯地道好多；呢邊冇咩遊客會到，生活既多數係當地居民，但呢道真係冇咩特別，吸引力唔大








轉出去大馬路，好快就可以到三塔寺




沿路都係田原風光






一路望住三塔行過去，就快到啦








去到崇聖寺三塔正門；由hostel行過來行左25分鐘，冇咩人會咁傻用腳行，好多人都會踩單車過來


「三塔寺是南詔豐佑時期自公元八二O年開始修建，到八二五年建成的。這個時期，正是中原的盛唐時期，當時在雲南西部白族和彝族建立的南詔國，在文化上曾大量吸收了中原和土蕃的宗教文化，因此三塔寺很具有中原現存唐代佛塔的一般特點。」

身為5A級景區，入場費百幾蚊，我先唔會比錢入去睇三座塔，而家企係出面都可以見到！




背靠蒼山，真正背山面海，風水一定好靚




三塔對出係一個廣場，冇咩特別






呢道冇咩好睇，叫做到此一遊，係咁易影幾張相就走人


又要行返去古城


見到上山頂個條纜車bor，如果冬天山上有雪玩我會考慮上去睇下，但而家冇雪就冇興趣上去啦


行到返古城




準備由大理古城北門入城，呢個係我見到既第三座城樓，仲差一座就儲齊東南西北四座城樓！哈哈


城門外有小攤檔，好多薯仔賣






睇清楚城樓先




入去就會由現代世界變返古代世界






城樓之後就係復興路，不過今次返古代失敗，城入面有車既...




入城後見到一間小食店好多人食野，而且仲要唔係遊客係本地人去食，呢個咁地道既地方當然唔可以放過，我又入去試下先；巍山X肉餌絲係大理好出名，好多地方都可以見到，想食最正宗餌絲應該要去到巍山，但我就冇時間去啦，呢間小店可以吸引到咁多本地人幫襯我相信唔會差既


好彩有位坐，連入面都坐滿人




見呢道最出名係餌絲咁就食餌絲啦；上面既肉真係好滑，滑到有少少入口即溶既感覺，味道唔錯，7蚊碗又幾抵食




仲可以自己出去加配料




街上有好多唔同野食






記得十年前香港有一排好興燒雞翼機，不過消失左好多年啦


食飯時間街上好多學生；佢地件校服有少少似以前我中學個件，又係深藍色衫，當年係香港算係獨一無二，一見就知道邊間學校，哈哈


復興路上有基督教堂








門口打開入去望望先


入面簡簡單單，好寧靜好舒服，而且冇比太陽曬住清涼好多；教堂內既人都好好，好歡迎我參觀，我都係道坐左陣抖下涼






再見




離開教堂就行出面既平等路，不過冇咩特別








去返復興路，路邊好多楊梅﹑提子賣，聽聞楊梅好酸，我從來都未食過






今日真係好好天；越行去南面就越多人










再次返到來洋人街，超多人又多旅行團






呢段路真係好靚
我見網上有其他相，呢道影出來兩旁唔係綠色植物，而係開滿粉紅色花，就好似櫻花一樣全條路都係粉紅色，靚到爆炸！唔知咩時間先可以見到呢個美景呢？






雲南出產咁多花，呢道當然有得賣啦






又再來到洋人街，今次想行去街尾搵郵局買郵票


條路係向下斜架










好似已經離開左遊客活動範圍，去到當地人居住既地方








終於去到郵局啦！不過呢間真係廢廢地，我想問寄明信片去香港幾多錢又唔知，其實我知道係個半，咁我話想買個半郵票時又話我啲明信片唔寄得，叫我去另一間大郵局問，玩野咩開間郵局出來連想寄張明信片都寄唔到


呢道唔比人寄野，咁我唯有睇下地圖邊道有郵局，另一間竟然係成日經過既復興路！我睇唔到既！而家就行人民路上返去


下午人民路未見好多人擺攤


危樓！




竟然平到5蚊！呢塊野擋太陽好有用架


突然發覺天空藍得好假，就好似key上去一樣


一路慢慢行慢慢睇










個名好正！


行到熱，飲返啖可樂即刻暑氣全消；成條街都有好多小食賣，行到咁熱我就冇胃口食啦




















連傳說中既沙縣小吃都有，呢間好有雲南風味，有好多米線﹑餌絲選擇




繼續行下睇下
















好多菜




咁早就放塊板放舊石頭係道霸位，咁似啲排隊黨


隱約可以見到洱海


再次返到來復興路










整左條紅色banner係道破壞晒成個feel


又再來到洋人街，今次來到既目的就係搵郵局


其實間郵局就係洋人街牌坊左邊，呢個位我已經行過唔知幾多次，但竟然一路都冇留意到呢到郵局存在！


大陸既郵局真係好煩，呢樣唔得個樣唔得，又話普通明信片唔寄得一定要寄郵政出既明信片（因為我玩開postcrossing所以知道一早取消左呢個限制，只係地方郵局唔執行），咁好啦我就買張郵政明信片一齊掉入郵筒睇下係咪其他個啲真係寄唔到，好彩最後所有明信片都平安到達；另外我想買郵票都有困難，想買既面值又冇，買三十個郵票又問買咁多做乜，唔通買來玩咩？！


搞掂張明信片就出返去啦






五華樓








財神？


都係金花吸引啲


入到去總統兵馬大元帥府，即係而家既大理博物館參觀，入面既展品就冇影啦，好多都係出土文物










入面仲有一個碑林，收藏左好多石碑












好多白族姑娘


又再次來到南門




由城樓外望






上去望望先


上午就好好太陽，下午就冇咩陽光，又係好似琴日一樣陰陰沉沉




城外大約一公里遠有座文獻樓，咁遠路我就唔走過去啦，望下就算


今日唔係好多人bor






都係望返入城好feel啲，見到咁多瓦頂先似返個古城ma










城牆邊




今日唔行城牆啦，睇完就落返去








又人山人海丫




轉入左條冇咩人既小巷，冇咁多人即刻舒服晒






呢道唔比擺賣既咩？有人來個個都立刻收返好啲野




原來呢個咁靚既地方係酒吧街，咁早唔怪得人影都唔多個，夜晚應該會熱鬧好多












大理武廟，即係關帝廟，係元朝時已經建成但明朝時被毀，得返一個照壁尚在，而家見到既關帝廟係重建出來；大理關帝廟同洛陽關林廟一樣，入去關帝廟大殿之前要先經過極星門、武成門






正前方就係關帝廟




兩旁有其他殿








好快就出返來啦；呢座建築好白族feel


大理除左白族之外，仲有其他小數民族居住


有條冇人既步行街bor，我就行入去睇下先
















入面環境好靚，好多特色餐廳，不過日光日白見狗都多過見人






又見到？！不過已經執左...條街人影都唔多個唔執先至奇啦






出返來就旺好多啦






係條小巷道發現好多人，原本大家都係道等緊買野食






見仲有時間冇野好做就去街市八卦一下




七彩繽紛既生果見到都留晒口水














叫得街市咁就緊係唔只咁少野賣啦，入面仲有好多


好新鮮既蔬菜丫






游水海鮮










咁早已經有龍眼？香港夏天先有得食bor，呢道真係有好多生果






唔知呢啲係唔係雲南特產呢？








行完街市都係時候返去hostel啦，係返去途中竟然有人問我hostel點去？佢就問岩人啦我地一齊行左返去，呢間hostel隱藏係民居之中唔係咁易搵到








環境咁靚影多幾張相先












如果住係最高個間房就正啦


普通二人房


貓仔都有自己屋企






拎返個背囊，整理好啲野，太約六點正式離開，終於要踏上回家之路


話咁快已經過左五日，雖然唔捨得，但都係時間返屋企啦，明天呢個時間我已經攤係屋企梳化之上一路睇電視一路玩電腦，哈哈^^

（仲有幾個鐘就出發去新加坡﹑馬來西亞，相信呢個又會係一個愉快旅程，哈哈^^）