香港。石崗賞木棉花

^^ 祝大家母親節快樂 ^^

近來工作比較忙冇以前咁多時間寫遊記啦...今個星期仲返足七日，想寫都冇時間寫...好彩咁岩比我搵到篇上年已經寫好左既倉底貨出來，襯住母親節呢個咁開心既日子同大家分享一下

23-3-2014

終於等到春天，又到滿天花開季節，以前會去唔同地方賞花，櫻花﹑油菜花等等；今年冇地方去，但就留意到原來香港都開滿好多紅色﹑粉紅色鮮花，所以星期日就跟隨朋友去左第一次香港賞花之旅，目的地係錦田荃錦公路上既石崗軍營；一落車已經見到又紅又粉紅既花啦


今日冇帶相機，只可以用電話影相，唔可以zoom上去影花lu


唔知呢種紫色花係洋紫荊定宮粉羊蹄甲呢？兩款花都差唔多唔係太識分，不過兩款花都好靚


同一棵樹有紫色花亦都有粉紅色花，好靚丫










其實今次去石崗既目的係睇木棉花先真，前面大大棵紅色既就係木棉樹


進入軍營睇木棉花啦，軍營入面既木棉花係最靚
呢段時間軍營營舍範圍可以隨意進入，不過就唔好咁八卦走上樓，入面有好多解放軍行來行去架！


原來木棉樹係咁既樣，真係畫得好靚！平時睇到既木棉樹又高又大，望上去都辛苦條頸，細心去睇木棉樹原來係冇樹葉，只有木棉花係樹枝上


大大個太陽係頭頂，好難影到木棉花


樹上木棉花睇唔到唔緊要，地上都有好多木棉花




木棉花就係咁啦，鮮紅色大大個；有位高雄朋友同我講高雄市市花就係木棉花，不過高雄既木棉花係粉紅色，香港呢啲係紅色






南方航空既標誌就係呢個木棉花


沿路都種滿花


如果係木棉樹下賞花就要小心，木棉花會不斷係樹上跌落黎，木棉花大大個比佢打中都有少少痛架，我就咁好彩比佢扑中左一次......


好多人對住木棉花寫生


全條路兩旁都係木棉花，又大棵又多




冇長鏡頭影唔到上去，唯有隨意影一下；都係親身去現場賞花比起睇相靚好多






遊人好好心機為木棉花扮靚（呢個心心我都有份整架）






好多人都對個心心有興趣


賞花之旅好快就結束，平時係馬路邊都會見到木棉花，但好多時都會被路人忽略，今次先發現原來木棉花又大又靚；賞木棉花季節過左之後，遲少少就會到棉花滿天飛既季節，到時木棉樹又會帶比我地另一個新景象