博多。屋台﹑櫛田神社﹑天神﹑一蘭拉麵

< 福岡﹑熊本﹑小倉﹑長崎5天遊 >

第四天（續）

到達博多站已經十點幾，正常黎講日本好多商場﹑餐廳係呢個時候已經收晒鋪啦，不過係博多呢道就唔怕夜晚搵唔到野食，因為博多有好多「屋台」專門係夜晚經營，有特色之餘仲有野食，襯最後一晚要去屋台體驗一下


離開博多站，沿「はかた駅前通り」向中洲川方向行




我相信中洲都係一個夜生活豐富既地方，因為呢道幾條街都見到好多「無料案内所」，仲有好多人企係街tim


行左20分鐘終於黎到河邊啦






福岡好多地方都可以搵到屋台，無論博多或者天神等等地方都可以搵到，而我就選擇左位於河邊「那珂川通り」，比較近火車站同hostel既屋台，位置就係春吉橋旁邊，好易搵


呢啲就係屋台啦，類似香港舊式大排檔




有咁多檔我都唔知點揀好，見到有檔有拉麵食我有坐落去啦（其實差唔多檔檔都有拉麵食）；除左拉麵之外，呢檔仲有關東煮，見旁邊日本人一路食關東煮一路飲啤酒傾計超開心


睇到師傅煮野食


餐牌全部都係日文字唔識睇，所以都係叫拉麵算啦，哈哈；呢碗拉麵可能未必有出名既拉麵店咁好食，不過同香港比已經好好多啦，最重要既係係呢道食野比起店鋪更加有風味呢


好快食完野我都唔阻住人地個位，影多張相走人（有人V字手，哈哈）


好多當地人都鐘意係屋台食野；而屋台雖然係大排檔型式，但環境又好乾淨企理，去到博多一定要試試呢啲咁特別既屋台






係時候返去hostel啦


離開大街行去hostel，夜晚十一點幾已經好靜，人都唔多個




返到來已經好夜，hostel已經關門，好彩一早check in左




6人房只住左3個人，你都有自己位訓啦，哈哈


第五天

訓到八點起身lu，今日天氣都唔錯


Hostel樓高兩層，但就只有四間房，我住係二樓（3F）




今次呢間hostel係我係九州住過既三間hostel之中最好既一間，所有設施都又新又乾淨




有人煮緊早餐，一樓全層都聞到香味




九點check out離開「中今民宿/Guest House Nakaima」




Hostel位於民居之中，外面環境都幾好架




Hostel旁邊就係「櫛田神社」，上次夜晚來睇燈會睇得唔係咁清楚，今日見有時間再入黎睇清楚啲先




入面環境好靚






唔知呢個係唔係求籤呢？




一早已經有善信參拜緊啦




屋頂感覺上好似武士帽






山笠




行完櫛田神社之後繼續上路，向博多站方向前進




竟然見到hoste都有賣廣告


路過一間郵局，即刻入去買郵票同明信片，不過今次行程時間緊迫，所以都冇咩時間寫明信片比朋友，越來越懶...




日本啲atm睇落好複雜


路過一間寺廟想入去睇睇，不過呢道原來係唔對外開放，只可以企係牆壁之外偷偷地望入去








話咁快又再次返到博多站，呢五日旅程日日都會來到呢道，已經唔知黎過幾多次，不過今次將會係呢個九州之旅最後一次




日本麥當勞比香港貴唔少，今次就唔食啦，而且以前已經食過，哈哈^^






商場十點先開門，大家企定定係門口等，我都係其中一份子，一齊等左兩分鐘


一開門大家都趕住入去


岩岩開門商場仲係冇咩人，我唔理咁多一口氣衝上去上面




咁早黎到呢道就係想去Pokémon Centre，因為我要買公仔比妹妹ma；除左買公仔之外仲忍唔住買左唔少其他野，冇計啦由細到大都鐘意寵物小精靈，不過呢間比大阪個間細好多，貨品選擇都少好多










讀中學時好鐘意係學校玩Pokémon Card，呢個熱潮已經冇左好耐冇人再玩lu，估唔到事隔咁多年都仲有Pokémon Card存在，不過就已經唔記得點玩啦


係博多買完野就坐100円巴士去天神繼續買，今日冇特別地方去，最重要係把握最後少少時間買野，旁晚就要坐飛機返香港lu






巴士司機都係咁型


天神呢啲大商場就唔岩我行，我想搵藥店同超級市場




成功搵到間免稅藥店，睇定先一陣食完野先買


行多兩行已經十二點，要搵地方食午餐；難得黎到博多緊係要試試博多出名既「一蘭拉麵」，我相信應該好食過香港分店；之前香港一蘭新開時唔知要排幾多個鐘先有得食，呢道完全唔洗排隊


一蘭座位當然係出名既自修室位啦，岩晒我呢啲一個人而且又係自閉既食客




入一蘭時先係自動售票機買好野食，然後會獲派一張表格自己填寫拉麵配搭




食緊都可以中途加野食，只要按枱面個鐘就得


拉麵到啦！天神呢間一蘭分店好特別，拉麵唔係用碗裝，而係用一個盒裝住


呢個就係傳說中既一蘭拉麵！


拉麵送到後簾亦都關好，可以靜靜地慢慢食


一蘭拉麵湯底比起其他我食過既拉麵濃好多，今次飲唔晒佢啦，真係好浪費...呢道既拉麵當然好食啦，不過如果要數呢五日我食過既五碗拉麵，我覺得一風堂係最好食最岩我口味，一蘭要排第二啦，sorry


食飽就出來行下，算便搵下邊道有超級市場






年輪蛋糕睇落好吸引！


行行下先見到原來一蘭旁邊就有一間免稅藥妝店，而且價錢仲比較平；後來返到香港先知道呢間藥妝店係網上好多人推薦，因為佢賣既野比起好多地方都平而且仲係免稅tim，好彩咁岩比我遇到咋


呢種感冒藥賣1000円咋！點解咁平既！？記得五年前係東京見過係賣1880円！之前見人係東京買要2500円！福岡竟然平咁多！？我覺得呢款感冒藥幾好架，比起香港食開個啲有效，不過都係要奉勸大家有唔舒服睇醫生好啲，自己買藥食始終有危險性


買完藥就去超級市場shopping




最後都係買左呢個返屋企，太好食啦


今日係賣五層漢堡既大日子，仲咁岩比我見到有得賣！不過我一個人就唔去挑戰咁大個包，怕一陣飽到行唔郁返屋企，哈哈


行到差唔多時間，今次九州之旅亦都去到尾聲啦，就算有幾唔捨得都係時候回程lu；去到天神地鐵站坐地鐵返機場，第五日終於有機會坐一次福岡地鐵






五個站收260円，日本交通費好貴


福岡去釜山好近，坐船都係大約三個鍾，飛機仲快好多啦，所以係福岡可以見到好多韓國人


車到啦！




十分鐘多少少車程就去到機場，好快




去到機場都仲未可以check in住，因為地鐵只係去到國內線客運大樓咋，國際線大樓係機場另一邊，要再轉接駁巴士去




去到咁岩有車，即刻跳上去先


大約十分鐘車程終於黎到啦




福岡機場有個特別地方，check in前要先係外面排隊，寄倉行李會係呢道先過X光機，再入去櫃台將行李寄倉；我就冇寄倉行李，背囊唔洗係道過X光機，不過都要乖乖地排隊入去


入到去要再排


福岡機場國際航線唔太密，所以呢道人唔多








少少地有幾間商店買野食野


入去lu


機場唔大，一過出境櫃位就係候機大堂






仲有時間可以四周圍行行


呢道有間商店可以買到一盒盒既手信，好多人幫襯，諗諗下發覺今次旅程我好似冇咩點買野bor，咁就係道買左幾盒，自己食又好送比人都得




飛機到啦




坐後排既乘客可以優先上機，坐前排就要排係隊尾啦，咁都唔錯丫可以減少比人頂住既機會；好多人都買到一袋二袋，有啲仲好多袋


今次坐燒賣機


啲乘客實在買得太多野啦，人都未上晒頭頂行李架就full晒，遲上機既乘客要四圍搵位塞行李上去


今次終於有窗口位坐


飛離福岡，短短五日九州之旅亦都畫上句號






旁邊冇人坐，球證都有自己既位置


起飛後空姐們拉起塊布，冇咩特別事都唔出黎lu


因為座位係機翼後上方，所以前面視線比機翼左住大部份...飛飛下見到下面有好多燈光，我仲諗呢道係邊道tim？


再飛前少少先見到原來頭先已經望到自己屋企！我覺得香港夜景點睇都係最靚，哈哈^^




晚上8:15安全返到香港，九州之旅結束啦；係機場見有啲肚餓，買左少少野食再坐巴士返屋企，都係返到自己屋企最舒服


快樂不知時日過，旅行日子一眨眼就過，又要回到現實世界；日本真係一個百去不厭既好地方，有歷史有文化，有美食有美景，仲有好多好人，而且環境仲好乾淨企理，我相信呢啲都係好多人喜歡去日本既原因；今次日本之旅我玩得好開心丫，好幸運每天都遇到好天氣，又去到自己想去既地方，雖然有時候旅程未必盡如人意，但我好享受呢個旅程，享受每一天係日本既日子；好多時旅行過後，呢世人都未必有機會再去同一個地方兩次，但我相信將來總有機會再到日本，再到九州，我一早已經留左有啲九州地方等下次先去架，哈哈^^至於幾時會再去呢？要留待將來先可以答到啦^^

< 福岡﹑熊本﹑小倉﹑長崎5天遊 >

< 完 >

後記：2014年去左3次旅行，同去慣旅行既旅行專家相比只係小巫見大巫；5月因為免費機票一個人去雲南，8月同好朋友去新加坡馬來西亞，10月再次去到日本，每個旅程都有好多開心經歷，我相信呢啲經歷到將來一定會再三回味，永世難忘^^旅行除左吃喝玩樂之外，得到既經驗﹑體會等等會比想像中豐富，喜歡去旅行既朋友就會體會到點解旅行係可以去上癮，越去越想去；不過今次旅行之後多左另一種想法，雖然我依然想繼續旅行，繼續去到世界唔同地方，不過我諗我暫時都唔會再出發啦，暫時亦都冇計劃行程lu（去兩日長洲東平洲澳門唔可以當係去旅行掛？哈哈），因為我發現有啲野比起去旅行更重要！旅行遲啲去都冇所謂啦！唔知下個旅程會遲到幾時呢？呢個問題我都答唔到，等我下次去完返黎先答啦，哈哈^^