上海。朱家角水鄉﹑外灘夜景

< 武漢﹑上海﹑蘇州5天遊 >

第三天

武漢一日遊話咁快就完啦，今日要飛去另一個地方；一直以黎我都好喜歡江南水鄉，水鄉優美既環境實在非常吸引，所以今次就算武漢同江南相差幾百公里咁遠，我都唔理咁多去左先算！


今日要搭早機，四點幾就要起身啦，五點落街時四圍都靜英英，除左一間士多開門之外人影都唔多個




酒店旁邊係大馬路，好易就搵到的士，不過今次有5個人，要分開兩部的士去；未夠六點就去到機場，人唔多好快完成check in




如果唔係媽媽係道既話我就唔會選擇坐飛機，我諗我會琴晚就上火車，而家應該都差唔多時間到上海，不過媽媽係道就住下酒店等佢訓個好覺啦


早機多數都準時，今次都係一樣




荊門航空？咩航空公司黎架？


今次乘座南方航空，機票未連稅只係160蚊咋，同坐火車差唔多價錢




武漢再見


武漢去上海航程唔洗個半鐘，估唔到飛機餐唔係食麵包而係有意粉食，算係一個小驚喜




媽媽唔食比埋我食，哈哈


未夠九時半就到達上海機場，雖然今次係第三次黎到上海，不過就係第一次黎到上海機場


浦東機場距離市區好遠，坐地鐵個幾鐘先去到市中心「南京東路站」，仲耐過搭飛機...


首先去酒店check in，放低行李就即刻去搵食啦


酒店附近有間好出名既「小楊生煎」，諗都唔洗諗就食佢啦
今次係第一次食小楊生煎，啲生煎包真係名不虛傳，又香又多汁超好味！未食過咁好食既生煎包！而家諗起都想食！而且呢道服務員好好人，見我普通話講到一舊舊就拎個餐牌出黎同我講英文，最後好順利買到有得食


唔記得呢個係咩lu，睇落唔通係鴨血？


鋪面睇落冇咩特別，不過生煎包超正，去到一定要食！！！


食飽就出發啦，起程去水鄉朱家角，首先要坐地鐵去「大世界站」；上海有好多地鐵線，不過要轉線既話好多時都同北京一樣咁唔方便，係「人民廣場站」呢道轉車又上又落，人又多又要行得遠；黎到上海時已經係機場買左一卡通卡（上海八達通），所以唔洗排長龍買飛，而呢張一卡通好有用架，去到蘇州都可以用來搭巴士，好方便


出左大世界站路過上海音樂廳


行前小小就見到巴士總站，我地搭「滬朱高速快線」去朱家角，部車行高速公路好快就到，車程大約一個鐘，不過要小心好似仲有一部慢車去朱家角，如果搭左架慢車就有排坐啦


可以用一卡通比錢，車費11蚊


三點終於去到朱家角啦，不過只係去到朱家角汽車站，去朱家角水鄉仲要行10-15分鐘，靠google map帶路順利去到


準備入去啦
進入朱家角水鄉唔收入埸費，唔似得其他出名既水鄉入門口已經要收你百幾二百蚊，呢道如果想入景點先要買門票，因為時間唔多我就冇入去景點參觀lu


水鄉外圍已經古式古鄉，出面好多人，但只要行多兩步離開門口大街，周圍就變得好清靜好舒服






人都唔多個


見到有水啦！好靚既水鄉！
















「小橋﹑流水﹑人家」，橋對於水鄉係好重要架










城隍廟好似要收費先可以入，所以冇入去lu


寧靜既環境，古樸既街道，感覺好舒服






呢間cafe好正，有好多好靚既postcard賣，一向都好鐘意佢，而家冇時間入去住，過兩日先去另一間分店慢慢寫postcard


大大小小河道貫通朱家角








行返去大街就到shopping時間，媽媽同auntie開始買野啦，哈哈






好有古城古鎮感覺，好靚丫（就咁睇有小小似麗江古城，哈哈）








行上上海最大既石拱橋「放生橋」，去水鄉另一邊




兩岸景色








呢邊感覺同頭先有小小唔同，呢道可以沿河邊漫步，又有好多樹木，環境更加靚






小船穿梭河中，好似回到古代一樣
坐船遊水鄉係一個唔錯既方法，呢啲小船收費唔係好貴，分長短路線，短線收60蚊，而長線收120蚊一部船






沿河邊漫步，好舒服














有間咁既野


行到去水鄉盡頭，再過橋就係馬路lu，所以係時候返轉頭啦








呢道有個小船碼頭，問問船家坐船幾多錢，佢開價40蚊載我地返去放生橋，比起官方定價更加抵呢，見咁平緊係要坐下啦，除返開每人十蚊都唔洗，好抵！








坐船可以坐定定靜靜欣賞風景，估唔到生活可以咁寫意














返到去水鄉中心位置，見到放生橋既真面目啦，放生橋又長又高






短短15分鐘船程好快就完lu，時間已經唔早開始黃昏，我地都跨過放生橋離開lu


穿過大街行返去汽車站搭車，朱家角水鄉之旅完結啦




搭巴士返到人來人往既上海




唔洗坐地鐵，行15分鐘就去到五光十色既「南京路步行街」，不過呢道對於我就冇吸引力啦，對shopping完全冇興趣






建築物就幾靚






係呢道食左又貴又唔好食既一餐


食完飯之後就行出去外灘睇夜景；幾年前第一次黎到外灘時周圍仲係封住整緊，而家已經整到好靚


不過夜景點睇都係香港最靚，對面浦東冇咩特別


不過我就好鐘意浦西呢邊，全部都係當年大上海時代留低既建築，超靚！




外灘呢道又凍又大風，行左陣就返酒店lu，酒店係附近好快就行到返去；聽日要暫時離開上海，今晚要抖足精神期待明天蘇州之旅^^