大阪。大阪歴史博物館﹑大阪生活今昔館﹑HEP FIVE摩天輪﹑大阪市立科學館﹑黑門市場﹑空中庭園展望台﹑天然溫泉浪速之湯

< 日本中部﹑關西﹑中國15天遊 >

第十三天

大阪周遊卡係大阪玩好有用，琴日一日時間已經去左大阪好多地方，我買既周遊卡係兩日劵今日可以繼續用；因為好多想去既地方琴日已經去左，今日一於懶啲唔再玩咁盡，九點先起身再慢慢出門口


係hostel附近間松屋食早餐，賣相又真係差左小小，味道算正常，￥330唔咁多要求啦，不過下次去松屋食返牛肉飯會穩陣啲


坐地鐵到「谷町四丁目站」，去返琴日經過但冇開門既「大阪歴史博物館」




用周遊卡免費換入場劵，慳左￥600


黎得歴史博物館就緊係睇歷史，對於唔識大阪歷史既我就岩晒；係呢道唔洗擔心覺得悶，好多展品都係模型同有趣既野，唔係一味講歷史咁單調


估唔到眼前地下就係古蹟




古時日本無論建築同服飾都好中式，唔講以為返左中國古代




呢個跟本就係紫禁城，呃我唔到既（其實佢係難波宮）




見到旁邊大阪城




古時日本平民住呢啲屋仔，都係見慣見熟






識得係屋頂加多層黎曬衫又幾醒目




大阪地圖？唔知邊道打邊道


小朋友有好多野玩架




睇完小模型之後仲有大模型，就好似香港歷史博物館一樣，比人親身感受以前環境，仲係一個好好既影相位








我覺得歷史博物館係一個值得黎既地方，雖然一定唔會有好深入既了解，但作為一個過客行左一轉已經了解到唔少關於大阪既歷史，比係歷史書上紙上談兵有趣得多


呢道下面就係遺跡


坐地鐵去到「天神橋筋六丁目站」，係正出口上面呢座建築物係我下一個要去既地方


黎到「大阪生活今昔館」，呢個係一個比較熱門既景點，用周遊卡免費入場，又慳返￥600


入去之前要先放低背囊係locker，大量locker免費用，搵到位就得


入場地方係上層，清楚見到大阪古時民居既樣，同頭先係歷史博物館見到既模型一樣屋頂係有得曬衫架，呢道係一比一真賁好多


將古代街景成條模仿出黎


我相信古代冇咁多人掛？




呢道仲有浴衣租，￥300一次超多人排隊，booking已經排到唔知幾多個鐘之後；係道著浴衣影相又真係幾靚，可以融入古代環境，唔講係大阪可能好多人會以為你去左唔知邊條古街




展示出古代街道同商店模樣










有啲地方仲可以入去參觀，鐘意影相既人一定會鐘意呢道，好多影相位




隔一段時間會由日景變成夜景，一次過睇晒日夜兩個景色






除左實景，下層有模型介紹大阪人由古代至近代生活變化，模型做得好精細，室內間隔都睇得好清楚










當年既通天閣


今昔館樓下係商店衙，我冇行lu；今昔館係一個幾得意既地方，想簡簡單單睇下歷史野或者鐘意影相都岩黎，唔會因為佢係歷史野而覺得悶架，不過入面一眼睇野細細間同好多人，要搵個靚位影相就要有耐性


轉眼又返到大阪站


考慮左好耐黎唔黎坐呢個摩天輪，始終好驚佢...最後都係鼓起勇氣坐左先算


「HEP FIVE摩天輪」設計好特別，係商場天台，入口係商場頂樓；有周遊卡坐呢個都係免費，如果要比正價￥500就冇咩吸引力啦，所以呢道人都唔多個


出發！


摩天輪係大阪站旁邊，四周都被大廈包圍，叫做幾特別






見到有人出黎偷懶bor，哈哈


升高啲終於可以望到遠景，不過車窗有顏色，影出黎啲相係朦朦地








呢個摩天輪比琴日坐既天保山摩天輪細得多，好快就坐完；免費既話坐下無所謂，或者夜晚風景會靚啲都唔定，不過睇夜景仲有更好既選擇架




搭一個地鐵站去返hostel所在地「肥後橋站」，今次想去「大阪市立科學館」；係我心目中日本科技係世界頂尖水平，相信科學館會展示出好多我地未見過既高科技野，所以就黎左呢道參觀




用周遊卡都係免費，唔洗比￥400入場費


係我行入去展區參觀既一刻已經知出事，呢道唔係我想像中既「科學館」，而係比小朋友認識科學知識既科學館，就好似香港科學館一樣有好多小遊戲比大家了解一啲科學原理，又介紹下科學知識，總之呢道唔係我想睇既野啦，直接行返去地下走人










去返地鐵站口，食返琴日食過既烏冬店，￥210平靚正，味道幾好架


係科學館咁早走，無無聊聊都唔知去邊好（唔記得去和平館！），咁就坐地鐵去到難波；100円店好多野賣，不過冇野岩我...


記得上次十二月時成條街都係金黃色銀杏，超靚


呢間餃子店周圍都見好出名架？佢好平￥200有五隻咁就試下啦


冇咩特別，唔係難食但又唔可以話好食，係普通餃子


係道頓堀行下








行左去另一邊既黑門市場，冇諗住買野純粹黎行下






八掛下日本街市有咩賣


















行左一轉就走


差唔多天黑既時間返到梅田，今次目的地係中間遠啲個座「梅田藍天大廈」，佢係睇大阪風景既好地方，由梅田/大阪站行去唔算遠，穿過條長隧道就會去到


由下面望上去都覺得驚，由其係凌空個兩條電梯


有專用既lift坐上去「空中庭園展望台」，如果怕高就麻煩，呢部唔同平時我地搭開既lift，佢成部lift係大廈外牆之外，四邊都係玻璃，係咪好正呢？


出lift仲要上頭先係下面見到既電梯，係電梯上面想像下下面其實係好高而且咩都冇，又係好得人驚！




上到173米高！呢道要買飛入場啦，入埸費￥1000，周遊卡免費，好抵玩




下層有位比人坐住欣賞風景，但隔住玻璃邊好睇架，緊係上多層去露天觀景台慢慢睇


一上到去發覺又大風又凍，唔怪得咁多人係下面睇都唔上黎啦...不過呢道開楊好多，睇景都靚好多


原來我黎遲左睇唔到日落，冇為意tim...而家天空仲有小小晚霞餘暉都幾好




天台都有鎖玩...


大阪北面冇高樓大夏，可以望到好遠




東面有幾座高樓


而南面就係最多高樓大廈既商業區




西南面望到琴日坐過既天保山摩天輪


見到條電梯都覺得恐怖


地下好似星星會發光架


呢道最出名係睇夜景，見到成個城市既燈光超靚










欣賞左好耐，亦都食左好耐西北風，返入室內全身暖晒


返到地面見到好多人排隊等lift上去，呢道睇夜景出名大家都係等夜晚先黎，頭先我早小小到就冇咩人，如果可以再早啲睇埋日落就正！


由地下望返上觀景台


又返到大阪站，呢頭有好多大型百貨公司，大部份我都冇行過，最多都係去佢地既超級市場同上去Pokemon Centre




由大阪站返hostel路上次次都會經過呢間炸豬扒店，一路都想食今晚終於有機會啦


睇圖叫左呢份炸豬扒飯，開頭以為左邊細既係炸雞，食落口先知係炸壕，我都唔食既浪費左...早知要塊大豬扒仲好；呢份炸豬扒好好食，價錢只係￥690非常抵，係香港要食$150先可以食到差唔多質素既炸豬扒


食飽又再出發，坐地鐵去到「天神橋筋六丁目站」；夜晚呢道好靜，時間無多我都趕住向北面行去




夜晚緊係去浸溫泉啦，黎到「天然溫泉浪速之湯」，溫泉係大廈天台




溫泉收費￥800，有周遊卡免費；呢個仲熱鬧過琴晚去既住之江溫泉，亦都係有好多野玩，仲有啲細細個可以一個人浸既小溫泉，感覺比較有遊樂場feel，而且仲大一啲，住之江就傳統啲，兩個都值得去試試；話時話...有時會見到溫泉入面既職員係姨姨，佢地可以面不改容反而我覺得好尷尬...


溫泉相可以係呢道睇到
http://www.naniwanoyu.com/

浸到十一點幾要趕尾班車走，坐到去「東梅田站」已經冇車轉返去「肥後橋站」，咁就行返去啦，呢條路都唔知行過幾多次行到熟晒；行返去時經過一條全部都係餐廳既小巷，半夜十二點都係成街人好熱鬧


今晚係今次旅程留係大阪既最後一晚，十幾日話咁快就過左lu，只可以講開心既時間過得特別快，唉...