日本關東。東京﹑富士山﹑飯能9天遊。2016。夏

 < 東京﹑富士山﹑飯能9天遊 >

炎炎夏日，第一次夏天去日本，目標好清晰，要上富士山頂朝聖！上富士山呢個念頭好多年前已經有，案計劃原本最快要下年先會去，直到今年年頭睇左一套動畫/漫畫《Let's go！登山少女》，突然再次燃燒起行山興趣，決定今年要上富士山朝聖，或者叫聖地巡禮會更適合；富士山每年七月至九月頭呢一小段時間會向公眾開放登山，打鐵襯熱決定好七月頭上山後即刻同老細請假；我一向都知道富士山大概情況，當到自己真係要上山要都係要認真準備一下，係準備期間同朋友講開今年想去富士山，估唔到有朋友有興趣而且又就到時間，所以今次唔洗自己一個上山多個伴啦

向富士山出發！
 

日本關東（東京﹑富士山﹑飯能）九天行程：
Day 1： 香港 - 東京
Day 2： 東京。JAL工場見學﹑原宿﹑明治神宮﹑入谷牽牛花祭﹑秋葉原
Day 3： 東京 - 飯能聖地巡禮 - 東京
Day 4： 東京。高尾山 - 河口湖。八木崎公園薰衣草祭
Day 5： 河口湖 - 富士山登山（吉田路線）
Day 6： 富士山登山（鉢巡路線﹑須走路線） - 東京
Day 7： 東京。築地市場﹑池袋﹑上野
Day 8： 東京。淺草寺﹑酒酒井Outlets
Day 9： 東京 - 香港
東京住宿：Oak Hostel Zen
河口湖住宿：富士ロイヤルホテル河口湖（Fuji Royal Hotel Kawaguchiko）
富士山住宿：本八合目トモエ館（8th Station TOMOE KAN）

~ 旅程簡介 ~

二零一六年七月六日出發

第一天

同上次一樣都係搭捷星航空出發，今次飛去東京成田機場；香港天氣唔多好，寄望二千幾公里之外既東京有好天氣啦


第二天

黎到東京第一個想去既地方係羽田機場，參加「JAL工場見學」活動，難得可以走入飛機維修工場近距離接觸大大部飛機，呢個機會唔係咁易有架，好彩又比我報到名






睇完飛機去到原宿食午餐，順便行行「竹下通」


原宿旁邊就係「明治神宮」






去新宿行左陣街後，返到住宿既地方，呢道咁岩舉辦緊「入谷牽牛花祭」，乘機係道買野食當晚餐






夜晚去到秋葉原朝聖




第三天

今次旅行其中一個重點就係到飯能市聖地巡禮，預左一日時間慢慢行，可惜都係去唔晒想去既地方，唯有留返下次再去




今次旅程第一座上既山「天覽山」


夜晚又返到入谷牽牛花祭會埸




第四天

今日出發去另一個重點地方「高尾山」聖地巡禮，原本計劃係跟劇情行路上落山，可惜今日天氣唔好落住大雨，唯有坐纜車上落，不過就算坐纜車都只係去到半山腰，仲有一半路要自己行






咩景都冇，唉...


下午去到河口湖，景色比想像中靚，感覺好似去左瑞士，哈哈




河口湖邊既八木崎公園舉行緊薰衣草祭，超多薰衣草，好香；除左薰衣草之外仲有其他花，好靚架






日落lu，太多雲見唔到太陽


夜晚天氣轉好，天空少左好多雲啦，只係富士山頂仲有小小雲；富士山上既燈光由吉田路線既山小屋發出，看似好遙遠，好快我都會上到去


第五天

今日天氣非常好，富士山睇得好清楚，富士山聖地巡禮開始！


由海拔2305米既五合目開始上山，上到海拔3400米本八合目山小屋住宿






第六天

半夜由山小屋出發，上山頂睇日出






日出過後，行鉢巡路線環繞火山口一圈，上到海拔3776米日本最高峰「劍峰」




上山過後就係漫長既落山路


第七天

朝早去到築地市場，好耐都未遇過咁多遊客






黎到池袋Pokemon Centre朝聖


旁晚去到上野阿美橫丁行街，呢道好多野買


第八天

朝早去淺草寺兜過圈，幾年前曾經黎過，見一早冇野做決定舊地重遊






兜兜轉轉，旁晚時份去到成田機場附近既酒酒井Outlets，呢道係有好多野買，不過就冇咩野岩我，到岩我既時候又冇我size，唉...唔想空手而回是但買左啲野，臨尾好彩都幫屋企人同朋友買到野，最少黎呢道黎得有價值






第九天

朝早飛返香港，見到早幾日行過既富士山（坐機翼位睇得唔係咁清楚），可以正式講聲再見啦！當日落左山之後要趕住搭車，冇時間回頭望一眼，係飛機上終於可以再次睇清楚富士山，唔知今日山上有幾多人努力緊呢？


今次係第一次夏天去日本，天氣熱但舒服過香港好多；東京市區溫度超過三十度既同時，富士山頂溫度可以低過零度，一日之內感受冬夏兩季，係一個特別體驗；今次行程好順利，幸運地出發前改左上山日子，避開左惡劣天氣而遇見晴天，睇到日出又睇到靚景，好開心；富士山比想像中行得輕鬆（咁岩天氣好先可以咁講咋），自己一向怕熱，而富士山天氣夠凍對我黎講行得好舒服，仲舒服過係香港行山，可以平安上山落山係今次旅程最開心最感恩既地方，Yeah！

~ 待續 ~