吉隆坡美食遊（Part1）

< 怡保﹑吉隆坡﹑檳城8天遊 >

第一天

今次係第一次直接坐飛機飛到馬來西亞，目的地係吉隆坡；飛機十一點幾起飛，訓醒慢慢出發都未遲，香港天氣一直都唔多好，希望馬來西亞會有好天氣啦



預早時間到機場，可以慢慢食早餐


今次搭AirAsia，咁岩朋友邀請我去時有特價，機票比其他航空公司平，來回吉隆坡大約一千蚊；飛機準時由香港起飛，應該唔可以話準時，直頭早左十幾分鐘tim




望到國泰最後既747，可惜冇機會坐


飛上天終於可以見到好耐冇見過既藍天白雲，想係香港見到咁靚既天空真係難過登天


機上乘客唔多，冇人坐隔離坐得好舒服，點坐都得


下面個小島上次都見過，見到佢即係已經飛到馬來西亞


吉隆坡附近好多地方都種滿大大片棕櫚樹，望唔到盡頭


馬來西亞南面水質同北面差好遠，頭先見到北面既海水係超靚既藍色，呢道就係泥黃色


大約四個鐘機程到達吉隆坡；黎到吉隆坡第一樣要買既野就係電話卡，係落機後過關前已經見到有電話卡counter，不過好多人排隊冇理佢，出到黎先去返上次買開既DiGi買；電話卡好平，七日上網唔記得RM15定RM20，第八日仲有餘額比我繼續上網，好抵用，不過今次唔知點解打唔到電話，明明上次都打到；佢地數據plan數據用量個個都話無限，但會只限某啲apps先係，普通上網係有數據限制


機場可以坐鐵路出吉隆坡市中心，有兩款選擇，收費貴啲既KLIA ekspres舒服啲又唔停站直到市中心，KLIA transit會停中途站但收費會平啲


車票就係咁一張紙，scan上面個code出入閘


我坐呢部KLIA transit離開KLIA2




由KLIA2坐一個站到KLIA，呢邊冇KLIA2咁靚，舊啲暗啲，係呢道好快就見到坐國泰返到馬來西亞既喱姐，再一齊坐uber去佢屋企，係馬來西亞uber係方便同穩陣過坐的士架


大約六點半去到喱姐屋企，晚餐已經差唔多準備好，放低背囊就可以開餐；今晚我住既房係地中海風格，而且超大間，一間房就差唔多香港一間屋咁大


喱姐所有屋企人都好好，打搞左咁多日真係唔好意思；到左屋企冇幾耐就到晚飯時間，第一次係馬來西亞食住家飯，好豐富；咖哩雞特別好食，雞新鮮而且咖哩又正宗，加上喱姐媽媽功力十足，又點會唔好食呢；係道食飯有個得意地方，就係飯唔係用碗裝而係用碟，而且係用刀叉食飯而唔用筷子，食雞時會好似食扒咁係碟上用刀切，呢個食法第一次見，岩晒我呢啲唔識揸筷子既人


旁晚先到馬來西亞，食完飯都夜冇出去玩lu；原來馬來西亞一樣可以睇到香港電視台，而且播放速度仲快過香港，同一套劇集馬來西亞已經做完既時候香港仲播緊

第二天

早餐去左一個以華人為主既社區，呢間類似大排檔既地方（茶餐室），係同一個地方分左唔同既攤檔賣唔同野食，揀岩邊檔就可以食邊檔








坐低第一件事係叫野飲，桔仔酸梅係必飲，酸酸地好正，而且天氣熱飲一飲冰涷桔仔酸梅成個人清涼晒


我食呢個「麻辣板麵」，辣辣地岩我食


我地仲叫左其他，啲粉比香港食到既滑好多


油炸鬼用紙包住，好傳統


生果切開一片片雪到變冰，岩晒咁熱既天氣


呢道唔算市區，公共交通服務極差，基本上每家人都有車，經常見到街上泊滿私家車


早餐過後開車到吉隆坡以南，一個叫「Port Dickson」既海邊，黎呢道路程都幾遠，比去機場遠多一倍；去左一間海邊酒店參觀，呢道好有渡假feel，不過啲海水唔多靚，望住個海都唔覺好靚










又去左另一間海邊酒店，呢間特別既地方係由天空望會見到酒店係大紅花形狀，係地下行係唔會見到；呢道都係一樣海水唔太靚，可能今日天陰陰所以有呢種感覺




過左陣天空有小小藍天，感覺好好多，一個普通過唔普通既路邊沙灘係藍天之下都特別靚








去到一間海邊餐廳午餐，睇落去似西餐廳，但又有傳統馬來西亞野食，價錢仲比想像中平




我食呢個「Nasi Lemak with curry chicken」，係香港好難搵到馬來西亞美食，配上咖喱雞好正


呢個都係「Nasi Lemak」，配炸雞髀


「Kaya toast 」（加央牛油厚多士），綠色既就係加央醬


馬來西亞最地道既早餐「生熟蛋」，食之前最緊要係加少少胡椒粉同生抽吊味


飲返杯冰涷奶茶就最舒服，加上呢個咁舒服既環境，悠悠閒閒享受呢個午餐


餐廳對出就係海




如果揸緊車又想食麥當勞可以唔洗落車買，有專用counter可以成部車開過去，好方便


路兩旁都係棕櫚樹，行左好耐都係






路過一個西瓜攤檔，成地都係西瓜，試過又真係好甜






路過Mitsui Outlet，仲以為得日本先有，原來馬來西亞一樣有，既然咁難得路過就入去行返轉；呢個Outlet係正吉隆坡機埸旁邊，岩晒上機前作最後衝刺


平時見慣見熟既牌子都有，好彩我唔買野既，如果唔係一定唔捨得走








係返屋企之前去到一個馬來人社區，黎到呢目的就係搵食啦；好多地方都可以見到細細部既美食車，呢啲先係真正既美食車ma，去到邊就可以食到邊


係呢道買正宗馬來西亞串燒，未食落肚只係聞已經流晒口水，燒到好香好香


串燒包裝夠晒特別，用紙包到咁靚


呢啲係雞肉串燒，配上沙嗲醬超好食，好食過香港用啲唔知咩粉燒出黎個啲，串燒都係東南亞風味比較岩我；仲有洋蔥同青瓜點綴，係晚餐既飯前小食


晚餐係喱姐媽媽泡製既豐富大餐，主角係海南雞，又香又滑又有雞味，我可以講就算係幾出名既餐廳都係食唔到咁好食既海南雞架，大家係唔係好羨慕呢？哈哈


芽菜係香港冇既又肥又短芽菜，好好食，今餐飽到食唔落


食海南雞又點少得個飯呢，個飯香到就咁食白飯都冇問題


晚飯後出去行商場，好多都係熟識既鋪頭






超級市場好巨型，就好似百貨公司咁咩都有得賣；超級市場手推車好得意，要入個一蚊入去先用得，用完泊好可以拎返，不過唔習慣既話好大機會放低部車就走唔記得拎返錢




仲有甜品時間，食返碗冰先




今日食左好多餐，又試到第一次食既美食，之後幾日仲有好多機會不停食食食架