怡保美食遊

< 怡保﹑吉隆坡﹑檳城8天遊 >

第七天

朝早七點前已經起身，整理行李準備回程；之前有諗過幾個唔同方法返香港，經吉隆坡﹑新加坡﹑曼谷都有考慮，最後都係用最簡單既方法由吉隆坡飛返香港；係去吉隆坡之前順道經一經怡保，唔洗一次坐咁長車程之餘又可以去食芽菜雞，相信呢個係一個好選擇



今日檳城都係唔好天，好好彩冇落大雨，由hostel快步行去碼頭，八點已經去到




同上次一樣由喬治市坐船去北海，同啲車一齊坐；呢程船唔收錢，只有另一個方向北海去喬治市先收費，我好似坐左霸王船咁tim




由船上回望檳城喬治市






好似動物園咁圍住晒啲人


好多等過海既車


上次就係呢道坐火車返吉隆坡，因為火車班次少就唔到時間，所以今次選擇坐巴士唔坐火車


經過火車站就到巴士站，我預先已經麻煩朋友幫我買定車飛，先到售票處問問車牌再出去上車




今次坐Sri Maju公司既車係貪佢有接駁車入市區，唔洗煩轉車問題；巴士準時八點半開出，如果頭先搭遲一班船有機會上唔切車！




兩個鐘多小小車程到達怡保，怡保呢個新巴士站係市郊，仲有一大段路先到市區；去到巴士站即刻問職員接駁巴士係邊道上，職員竟然同我講最快個班車冇左，要幾個鐘之後先有車！




唔趕時間坐低整理一下背囊，頭先個職員突然揮手叫我過去，話好快有車到比左個車牌號碼我，又會變得咁快




呢道係有巴士出市區，不過唔知佢去邊，慣左睇中文佢出個英文/馬拉文唔知邊道打邊道


成功比我搵到接駁巴士，全車得我一個乘客




去到市區巴士站，原來呢道唔近住個邊，但就近食芽菜雞既餐廳，早餐都未食而家去開餐岩晒


經過好多傳統店鋪，好快就行到；怡保天氣真係熱，行一陣已經出晒汗，之前計劃會去怡保好出名既霹靂洞，諗諗下都係唔去啦，hea下就算








怡保有兩間餐廳食芽菜雞出名，其中一間係我食既「老黃」，另一間係老黃對面既「安記」（今日安記冇開門唔洗諗食佢）；我黎得早客人唔多，夜晚啲枱開晒出黎好熱鬧






雞同芽菜都有得叫一人份量，岩晒我一個人食，價錢仲好平


一人份量都唔少，我敢講平時係街好難可以食到咁香咁滑咁好食既雞！超正！


芽菜好鮮甜，香港唔會食到！


除左芽菜雞之外，怡保河粉都超出名，勁滑！


本來已經食飽，喱姐極力推薦我食肉丸，咁我又叫左黎食，大大粒又有超香肉味，香港都係未見過！


好多好多芽菜同雞，食到好飽好飽




怡保另一樣特產係「打門柚」，喱姐推介話一定要試，而家食到咁飽唔試住，晏小小先再買


由餐廳行去近火車站既hostel大約二十分鐘，天氣熱要慢慢行










難得黎到有冷氣既地方坐左好耐都唔想走，今日冇特別地方去坐耐啲都冇所謂；我應該好耐都未試過住宿要比按金，呢道話要收按金時比佢嚇一嚇，差啲唔夠錢，不過比佢收一收我都驚唔夠錢用，今日多左個任務就係去唱錢




涼左一個鐘冷氣又再出發，出去外面四圍行下












有間HSBC bor，話唔定可以係atm拎到錢


行行下就去到怡保火車站，火車站對出有一棵怡保既象徵怡保樹，可惜棵樹已經比風吹倒，怡保現存只係得返一棵怡保樹係DR公園


唔知點解有個後門可以行入火車月台！冇野睇都係快啲返出去！




火車站旁邊有郵局，要買郵票寄postcard；馬來西亞寄postcard超平，馬幣0.5就可以將明信片寄到全世界，一蚊港紙都唔洗




慢慢行返去頭先芽菜雞個邊，成功搵到找換店唱馬幣










麥當勞都好有古舊氣息


喱姐話呢間既鹽焗雞好正，可惜我一個人邊有可能食到一隻雞，唯有放棄啦




去到呢間出名既豆腐花鋪食豆腐花






食碗又滑又冰凍既豆腐花即刻清涼晒


飲埋冰凍豆漿更正


原來豆漿入面有咁多糖漿，唔怪得咁甜啦，哈哈


呢間既加央角好好食，買左一盒返香港


芽菜雞開始多人啦




係鴨仔燈飲返杯傳統涼茶下下火，冇記錯既話係0.9一杯咋






芽菜雞呢邊有好多打門柚賣，感覺上係呢啲遊客地方買唔係太好，行返去頭先見到既一間路邊士多買，價錢果然平好多，好似大個十蚊細個五蚊咋；打門柚有分甜同酸，即時買左個甜既開黎食，真係又甜又多汁，買多兩個返香港慢慢嘆






行另一條路返hostel








屋企人見我話個打門柚好食就叫我買多兩個，快步來回左一轉頭先買柚間士多，係天黑前成功返到去，今晚都冇再出去啦；今晚晚餐冇出去食，食左半個打門柚已經好飽


今晚住既hostel好大，但唔多人入住，沖涼房廁所都冇遇到其他客人




好鐘意呢種款式，可以拉簾自閉，又有獨立冷氣夠晒凍，價錢好平大約65港幣一晚




有水同毛巾提供


床下有locker


仲有位比我寫postcard


怡保半日旅程好快結束，冇去玩既地方只係作為中轉站同黎食野咋，呢兩個目的都成功達到，仲買左好多手信返香港，好滿足