廣島。平和記念公園

< 福岡﹑廣島﹑尾道﹑山口6天遊 >

第一天

今次旅程決定左去廣島之後好快就book好酒店，有小小麻煩既地方就係廣島附近好似冇出名既溫泉區，我對廣島又唔太熟，只可以係google map上跟住火車路線沿路搵溫泉，又好彩比我見到個好方便既溫泉區，最後上網book埋JR pass就可以等出發



朝早七點幾機，未天光就坐巴士到機場，預早左好多到，可惜有人遲好多，差唔多close counter先到，搞到我想坐低食早餐都冇時間，只可以買麥當勞係登機閘口前一路等一路食


個天好灰，好彩飛機準時起飛


話咁快就到福岡機埸，國際線入境大堂好細，一眼睇晒




上次到福岡時我係無聊到係機埸直接行出博多，相信呢個世界冇幾多機場可以近到行去市中心都得；今次坐接駁巴士去國內線大樓再轉地鐵到博多站




到博多站第一時間係換JR pass，預先網上訂平￥1000緊係訂左先，只係撳幾個掣好方便；冇為意JR西日本同JR九州係兩個地方，結果排錯左JR九州，好彩排左陣有職員提點，即刻去返JR西日本counter，呢邊冇咩人好快就搞掂




換好pass已經一點幾，要搵地方食午餐，博多站有個地方好多餐廳，見到呢間拉麵鋪就入左去，黎到博多當然要食博多拉麵；呢間鋪個名熟熟地，原來香港都有分店




呢個就係今次日本旅程第一餐，係好好食既拉麵


上車前仲有時間，可以係超級市場行下，媽媽以前黎過博多，估唔到佢認得啲地方，博多站我反而唔係咁熟


有pass唔洗再買飛可以直接入閘






今次用呢張「廣島&山口地區」pass可以由博多坐到尾道，呢五日主要車程都係靠佢，又抵用又方便




先由博多坐新幹線到廣島，列車座位好舒服，舒服到唔想落車




大約一個鐘車程黎到廣島啦




廣島站對出就係路面電車站，係廣島主要公共交通公具




揀岩要坐既路線上車






坐到「原爆屋頂前站」落車




當年原子彈係廣島上空爆炸，廣島市區絕大部份即時炸成平地，呢座建築因為石造先僥倖冇完全被炸毀，但已經係頹垣敗瓦






一個咁舒服既地方，點想像到幾十年前原子彈就係旁邊幾十米爆炸




平和記念公園環境寧靜舒服，公園內有「平和記念資料館」展出相關歷史資料，可惜媽媽覺得恐怖唔敢參觀，我都冇機會入去lu，想像得到當年真係好恐怖






沿本通商店街行去酒店，順便當行街




今晚住呢間酒店，價錢唔貴




三人房唔算細間


第二日唔洗執房服務，酒店送左咁多枝比我飲


係酒店攤左一陣，出去搵地方食晚餐；廣島風御好燒好出名，去左專食御好燒既「御好燒村」睇下，可惜媽媽話呢個唔岩佢口味，暫時冇得食lu




路過間快餐店就入左去，佢話呢啲更岩佢口味




飯後去行商埸，媽媽行超級市場我去睇比卡超，百貨公司八點關門就要返去




夜晚冇地方去，早啲返酒店休息，今朝咁早起身相信佢地都辛苦；聽日好多地方想去，又要早起身啦