指宿。山川砂むし温泉・砂湯里﹑玉手箱溫泉

 < 鹿兒島﹑宮崎﹑指宿﹑熊本6天遊 >

第三天（2）

西大山站好細，參觀過又欣賞夠風景，再行埋手信店後出發去下一個地方，去體驗指宿既沙浴；指宿有兩個地方可以試沙浴，其中一個比較近指宿站，另一個就遠啲要坐車去，咁岩我去呢日近指宿站個間關閉一星期，咁我都唔洗揀會去另一間


西大山站除左鐵路之外冇其他公共交通工具連接，而家呢個時間冇火車坐就只可以靠自己行出去，係Google Map計過由西大山站行去沙浴距離係4.3公里，係可以行得到既距離，大約一個鐘就可以行到，咁我就決定行過去lu；穿過火車路軌，向海邊行去




今日陽光好好，氣溫十零度行起黎好舒服唔會覺得熱，所有路都係馬路好易行






沿路都係農田，種滿好多唔同農作物，欣賞住咁靚既風景完全唔覺得累；呢啲農村地方唔好話人，連車都唔見一部，成個地方好似比我霸晒一樣，不過我都覺得奇怪點解一個農夫都見唔到既？












同開聞岳越黎越遠


行返出大路終於見到有車經過，有指示牌帶路




前面海邊有煙出個道相信就係我要去既地方


落到海邊繼續行




終於到啦！呢道就係「山川砂むし温泉・砂湯里」，即係沙浴既地方，沙浴旁邊係「玉手箱溫泉」，兩個地方都係必試，沙浴+溫泉兩張門票一齊買會平啲，事不宜遲即刻買飛入場


著好沙浴既浴袍後行出沙灘，會有人安排沙浴位置，出去時要拎毛巾同可以拎電話請職員幫手影相，不過就要小心會入沙；沙浴就係咁將個身埋係啲熱沙下面，試過先知原來咁樣都幾辛苦，下面啲沙好熱，熱到patpat同對腳都覺得痛，雖然可以隨時起身走，但既然黎到都係訓多陣聽下海浪聲啦，等到旁邊一齊黎既人都起身後我都彈起身lu，個人舒服晒




沖乾淨涼出返黎已經三點，午餐都未食就到下午茶時間，呢道冇餐廳，但係入口地方有兩樣野食賣，係由溫泉蒸出黎既蕃薯同雞蛋，每個￥50自己夾起食就得






雞蛋係普通蒸雞蛋唔係溫泉蛋，蕃薯好甜好好食，如果唔係趕時間想食多幾舊；望住大海食野飲野，等個人涼返之後出發去浸溫泉




溫泉係沙浴旁邊，行過去幾分鐘就到，由小山丘上望返岩岩沙浴既沙灘，係正海邊風景好靚架，不過訓係沙上面係望唔到風景，只係望住個天




經過荒廢左既製鹽工場，好多蒸汽噴出






路上風景






黎到好出名既「玉手箱溫泉」，呢道曾經比人選出為日歸溫泉第一位，好期待試試咁靚既溫泉


呢道有兩個溫泉，男女會隔日對掉，我揀今日到係為左試對住開聞岳個邊既溫泉，傳聞呢邊靚啲而且仲可以見到日落；浸過之後都覺得溫泉超正，溫泉好大而且係正海邊，坐係溫泉入面就可以欣賞無敵海景，第一名當之無愧（啲相係溫泉網頁圖片，現場比相片更靚）






一路望住太陽落山，只可惜時間所限，等唔到日落結束就要離開，換好衫出到黎見到大陽已經落山...




行到出馬路天已經暗左好多


好多人等緊巴士返指宿站，冇計啦5:10已經係最後一班車，想留耐少少都唔得，本來有諗過睇完日落夜啲走可以行大約一個鐘去火車站坐火車返指宿，但諗起日本火車站鬼故，要我自己一個夜媽媽係個冇人既火車站等火車相信係一件好恐怖既事，所以放棄左


今日5:10尾班車，見網上有啲人貼出黎既時間表係六點幾，我諗唔同季節會有唔同班次，好彩去之前有check清楚時間，走左尾班車會好麻煩


坐巴士到「山川站」落車，呢個係JR最南有人站，落車打個卡先




返鹿兒島既火車由山川站開出，上定車慢慢等；呢啲細站人影都唔多個，要去返指宿站先多人上車




普通列車站站停，一個鐘多啲返到鹿兒島中央站，車站有聖誕市集，有野食有表演，仲有聖誕樹








入商場行下，有好大間戲院，可惜呢期冇戲岩睇




又去左睇人夾公仔


最後去左AEON，抽一番賞第一抽就中到大獎figure，Yeah～有一大盒拎走～


路過屋台村，有好多間屋台餐廳，係門口望一望就走




去返天文館通食呢間係鹿兒島有小小名氣既「我風流」拉麵店


食中間既燒豚肉拉麵


可能比較夜，差唔多十點店內好靜，可以專心望住師傅煮麵




我既兩塊豬肉燒緊


拉麵黎啦，好大碗好豐富，湯底好味豬肉好味流心蛋都一樣好味，呢餐好滿足


食飽後就返去lu，係hostel遇到一位香港人，大家傾下計又好夜先訓，又係充實既一日