2018年8月4日星期六

指宿。指宿之玉手箱﹑西大山站

 < 鹿兒島﹑宮崎﹑指宿﹑熊本6天遊 >

第三天

今日行程輕鬆過琴日好多,今日會去位於鹿兒島南面既指宿,因為去指宿既火車冇咁早開所以遲啲出門口都冇問題



陽光好好又有藍天,銀杏葉閃閃發光




行到「鹿兒島中央站」,火車9:58先開出,慢慢行都未遲;由鹿兒島去指宿雖然早啲都有車,但我想坐特色列車最早都只係呢個時間




黑白色呢部就係今日要坐既列車「指宿之玉手箱」






車頂會噴出蒸汽


早兩日揀位個時同職員講想要左邊單獨一個個既位置,又好彩比我揀到,一陣左邊呢位向窗既位置會對正海景,比另一邊靚好多


列車有梳化位同普通位,連兒童位都有








呢部車既布甸好出名架,黑白色代表列車既顏色,開車後好快賣晒


呢個就係我個位,火車得兩卡車箱仲要全車指定席,旺季既話唔早啲book定應該好難坐到,十二月頭鹿兒島算係旅遊淡季我先好彩坐到佢


全程車都可以望住個窗,由一開始既鹿兒島市區景到之後望住大海,睇住櫻島火山越黎越遠,不知不覺就去到指宿








大約50分鐘車程黎到「指宿站」


下一班車仲未開出,先係指宿站四圍行行




車站外見到類似椰樹既蹤影






指宿溫泉好出名,站外就有足湯比人浸,係呢道慢慢嘆住等車




上車繼續向南方前進,往南既車班次好少,有時候幾個鐘先一班,車上設備比起特色列車簡單好多




偷睇司機揸車


中途站好少人上落,有啲站仲超細,就咁幾個位已經係一個車站


坐三個站就到我既目的地「西大山站」,列車停站只有兩分鐘,車一開門好多人即刻衝落車影相,準備開車時又即刻上返車


火車離開後就只係得我一個人係月台,下一班回程火車係成兩個鐘之後既事,冇人揀呢班車黎都正常,多數人都會等下一班唔洗等咁耐時間回程既車




月台變返平靜,可以慢慢欣賞風景;「西大山站」最特別既地方係佢係全日本JR最南面車站,係呢道仲可以清楚欣賞到開聞岳,開聞岳形狀好似富士山,所以又叫「薩摩富士」,好靚架!如果可以行上山頂睇風景仲更加正,可惜今次冇機會




唔知有冇機會去埋其他地方呢?




全個站一眼睇晒




車站旁邊有郵筒有鋪頭


傳說係黃色郵筒寄出郵件可以帶比人幸福


傳說敲響幸福之鐘都會帶比人幸福,真唔真就唔知啦


鋪頭可以買到明信片,又可以買到最南車站既證明書,當然仲有好多當地特產賣,咁遠黎到點都要幫襯一下




係西大山站逗留期間有幾部私家車黎到,呢啲鄉村地方自己揸車黎會方便好多,我諗冇咩人會好似我咁由西大山站行返出去,哈哈

4 則留言:

  1. 「指宿之玉手箱」列車好有特式,銀杏好金喎好靚,你影完最南端張相後,重有咁多時間,你行邊出去邊?

    回覆刪除
    回覆
    1. 銀杏真係好靚:)
      睇完火車站之後行去浸沙浴同溫泉~

      刪除
  2. 架鍾無艷火車好靚
    我都成日偷睇司機揸車XXXD

    回覆刪除
    回覆
    1. 我好多時都睇司機揸車,當左自己係司機,哈哈~

      刪除