東北紅葉。茨城。築波山登山

< 日本東北紅葉之旅 >

第一天

等左咁耐，出發去日本既日子終於到，為左慳返啲假期又可以用盡時間選擇坐凌晨航班，天光去到日本就可以開始玩；飛機半夜兩點先起飛，收工返屋企食晚飯再執行李先出發都未遲，對我黎講呢班機時間好正；我去旅行會盡量帶少啲野，加上出發唔會有好多野拎，隨意塞晒啲野入背囊就可以出門口；今次旅程有妹妹同我一齊出發，我地頭兩日會一齊玩，第二日我就會自己出發去東北，而佢會留返係東京附近玩


預早兩個鐘去到機場，check in後入禁區坐低食少少宵夜，估唔到廉航既登機閘口都可以咁近，行幾步就到，飛機亦都好準時起飛，今次日本之旅有個好開始


今次坐得比較前，好快就可以落機，過關亦都好順利


出去後第一時間拎電話卡，呢張電話卡係免費，本身只係得500MB，因為我用佢個app book左一晚酒店所以變到無限數據，而佢比想像中好用，除左最後一日係秋葉原有大約15分鐘唔知點解用唔到之外咁多日都問題不大，所以一路都繼續用佢，本身係香港帶左上網卡去最後都冇用過


向上望估唔到會見到亞絲娜！機場竟然有動漫聖地介紹，今日時間緊迫暫時唔去睇住


先去JR遊客中心換之後幾日要用既東北pass，紅色招牌睇唔慣第一眼唔小心miss左，其實佢就係入閘機對面好易搵


換好pass再換好聽日既車飛後就開始正式今日旅程；今日行程係去茨城縣既築波山，由成田機場去冇直接車到，要轉幾次車；先由機場坐京成特急到「東松戸站」




再轉JR武蔵野線到「南流山站」




再轉TX築波快線到「築波站」（つくば）


去到築波站先放低大背囊，用細背囊上山就夠，好彩呢道有locker


一出地面就係巴士總站，即時見到部寫住去築波山既巴士上緊人，好彩係上車前諗一諗，我唔係要坐呢部車；行去另一個站睇下，終於見到我要坐個部，上築波山係要坐去「つつじヶ丘」呢部先岩


唔係好多人去築波山咋，車費￥870


大約五十分鐘去到總站「つつじヶ丘」，呢道已經係山腰位置；築波山係日本百名山之一，雖然高度只有877米，但佢位於關東平原之上又係茨城最高峰，四圍都係平地所以築波山好突出，山上風景都非常好，同日本最高既山富士山有「西富士、東築波」稱號


巴士站旁邊係手信店同餐廳，見有時間就行下順便食埋午餐先上山，叫左蕎麥麵同雞飯




呢道最正既地方就係風景，望到好遠


食飽野買多兩枝飲品正式出發


有纜車可以坐到山頂，今次既然話行山咁緊係唔坐，要用腳一步一步行上山


築波山算係一個旅遊冷門地方，黎既人唔多，更加冇遇過有人講中文，係日本真係好難得；其實我黎呢道最重要既目的就係「朝聖」！又係「登山少女」（ヤマノススメ）「朝聖」！（今次係妹妹想黎唔關我事架）








呢度既蟾蜍好出名，蟾蜍油聽聞有護膚效果


1.8公里就到山頂，相信唔難行


上山入口位置有一個荒廢左既遊樂場，睇落荒廢左好耐，如果夜晚黎到相信會好恐怖






今日天氣好好，視野好清楚，又有藍天白雲






一開始既路好易行






呢道行山既人唔多，每當遇到其他行山人士既時候大家自自然然就會互相打招呼，行都行得特別開心






築波山有兩個山頂，分別係男體山同女體山，而家我地就向住最高既女體山前進






由開揚既山路轉入樹林之間，係日本行山比係香港行舒服好多，空氣好溫度亦都非常舒服，而且冇咁多人環境又好寧靜，可以好好享受大自然環境




去到一間古代茶屋「弁慶茶屋」舊址，可以好好坐低休息，飲啖茶再出發






好多好大既大樹


穿過奇怪既石頭


路過一間小神社


傳說穿過呢個「母の胎内潜り」會好似新出世既BB咁有個新開始




沿路有好多奇岩怪石，會有牌介紹佢地






上到750米啦


繼續向山上行，仲有二百米就到！去到最後路段算係比較難行少少，石頭好大舊有時要用手幫手爬上去












好快就見到開揚既風景










再行上小小過埋神社就正式去到築波山女體山山頂






仲差小小！




就係呢道啦！下面係關東平原，風景超靚！










啲細路好大膽，係啲石上面爬黎爬去，其實山頂範圍就係得呢啲石頭，旁邊就係懸崖，見到佢地都驚驚地


因為呢道風景太靚而且太舒服，原本行完呢邊就會過另一邊既男體山，最後都係放棄左，寧願係呢度留低咩都唔做，慢慢欣賞風景






今次既主角出場啦，多謝佢地介紹我先會黎到築波山山頂，見到呢個咁靚既風景，原本我完全唔識築波山




都比你出下鏡先


其實佢地上山係睇夜景，呢道望到東京既夜景好靚，不過今日係星期一纜車唔開夜晚，就算行路落山都唔會有巴士走，所以唔可以睇夜景啦，只可以欣賞到日景，就算係咁我已經好滿足


玩到差唔多四點係時候返去啦，我地會搭纜車落山




纜車站要再行落小小






纜車岩岩走左，行多陣搭下一班


纜車站有觀景台，一樣可以睇到靚景








太陽準備落山


另一邊山峰就係男體山


行多陣就去排隊上車，單程車費￥620，六分鐘就落到山


車箱可以坐70人




由纜車望出去風景都係好靚








落返山時間岩岩好巴士上緊客，趕到4:30呢班尾二班次返去築波站




「TX築波快線」可以直接由築波站去到秋葉原，部車行得好快，最快45分鐘就到；我地去到「北千住站」轉車到「日暮里站」，再坐到「入谷站」，即係今夜hostel所在地




放低行李即刻坐車去池袋


黎池袋最重要緊係行animate


周圍睇下夾公仔機，行到十點就返車站




係池袋站見有餐廳開門就入去食晚餐，食烏冬同章魚燒，食飽就返去啦




今日第一日黎到日本旅程已經好豐富，由朝早玩到夜晚，就算琴晚係飛機冇點訓過都一樣好精神，相信之後既行程一定會更精彩