東北紅葉。群馬。伊香保溫泉・秋田。角館

< 日本東北紅葉之旅 >

第二天

今日行程一樣好豐富，上午會去長野縣既伊香保溫泉，下午會坐車去秋田縣，所以今日六點幾就起身，又會好似琴日一樣由朝玩到晚



七點三拎齊行李check out，帶住所有野出發，暫時仲係第二日行程所以背囊唔係好重


由hostel呢邊去伊香保溫泉需要搭四程車，首先由鶯谷站搭一個站去上野站，「山手線」同「京濱東北線」啲車好密隨時去到都可以上車


今日正式用呢張pass啦，呢張東北pass可以係十四日入面自己隨意揀五日用，又可以搭奧入瀬溪流既JR巴士，係香港買平啲只係¥19000，又方便又抵用


上野站好大，去到即刻搵新幹線月台，原來上野站既新幹線月台係地底，就好似坐地鐵一樣；車上好多人，好彩琴日已經換定指定席，唔怕冇位


上野去高崎站大約45分鐘車程，由上野至大宮係城市風景，離開大宮之後就變成鄉郊景色




係車上食下早餐望下風景好快就到「高崎站」；今次我係專登坐呢班上越新幹線列車，因為佢係E4 Max雙層新幹線，坐上層睇風景正好多，而且傳聞雙層新幹線幾年之後就會全部退役，所以襯仲有快啲坐下先






去到高崎站要轉在來線列車，有晒只指示好易搵到






轉「吾妻線」到「涉川站」，路上又係田園風景




去到涉川站再轉巴士就會去到「伊香保溫泉」




巴士站係正火車站出面，睇黎去伊香保既人唔多




大大個字貼住車費¥570


本來想去石段街站落車，唔小心早一個站落左，好彩影響唔大，行一分鐘就去到石段街




真正既石段街站係正石段街出面


呢條石段街係伊香保溫泉既標誌，由呢道行上去最高既伊香保神社總共有365級


係巴士站旁邊見到有locker，仲要係¥100咁平，即刻放個大背囊入去，一陣可以輕輕鬆鬆慢慢行，之後拎返背囊個陣時個¥100竟然跌返出黎比我，咁咪即係呢道locker免費！


今日既天氣都係好好，有藍天白雲實在太好啦


咁遠黎到呢道既原因其實都係黎朝聖架！繼續係登山少女朝聖，哈哈




比你出下鏡先






呢度都叫係有少少紅葉，算係有驚喜






有溫泉水流出，因為溫泉水帶有鐵質，所以啲石睇落好似生銹既顏色


話就話有三百幾級樓梯，慢慢行上去一啲都唔辛苦


群馬縣既吉祥物小群馬


藍天襯托紅葉風景好靚




唔知咩事有咁多鴨仔呢？


就算唔住溫泉旅館都有溫泉浸，不過呢個今日咁岩休息




可以見到遙遠既谷川山脈，有機會既話我想行上谷川岳




一路有溫泉水向下流




溫泉旅館依山而建，伊香保係一個特別既溫泉區






上面唔知拍緊咩節目呢？


沿路睇下風景又睇下店舖，繼續慢慢行上去




伊香保溫泉係好耐以前就已經好出名，不過講起群馬縣大家都會諗起草津溫泉，伊香保溫泉我諗冇咩人識，如果我唔係睇完登山少女我都唔識呢道








不知不覺就行到樓梯最高點伊香保神社




黎呢道既人唔多，神社又裝緊修，感覺好冷清






路過神社繼續向山入面行，見到樹葉有少少變紅






而家去緊呢啲地方


經過一排好舊式既商店；沿唔既環境好舒服，左右兩旁都係樹








去到伊香保溫泉睇紅葉最出名既地方「河鹿橋」，當然我黎唔岩時候啲樹葉仲係青綠色，不過都可以感受到橋配上紅葉係一個非常靚既配搭


工作人員裝緊射燈，呢道係夜賞紅葉既好地方




夜晚就係poster咁靚啦（如果有紅葉）


Hello~


條橋係邊個角度睇都係咁靚










河水啡啡地色，所以呢道有「 黃金之湯」之稱






繼續向山入面行


路過呢個可以飲溫泉水既地方，夠膽既話可以試一試溫泉水






頭先見啲溫泉水咁既色我就唔夠膽試啦，唔想飲到肚痛，而且未飲都知道啲水係鐵味，更加唔想飲




行上小小就到伊香保溫泉最後一個想到既地方「露天風品」，呢道阿葵同阿洸都浸過我緊係要試下




有佢地既相


泉眼就係溫泉旁邊，呢道既水係最天然；溫泉收費¥450，溫泉入面當然唔影得相，咁就借用佢地既相啦；呢個溫泉係硫酸鹽泉，味道唔係好大，溫泉就好似圖中差唔多，有一個圓形分開兩半，換衫就係locker前小小既位置；呢道冇沖身設備，只可以用水淋一淋自己；雖然呢道好多設施都冇，不過係山入面，四面都比大自然景色包圍，係一個好正既天然嘅露天溫泉




浸完溫泉舒服晒，行返過去神社會合妹妹










行返落去既時候，發現前面有好多人，原來又有攝製隊係道拍緊野，呢道咁多野影？


揭開塊玻璃直接影啲溫泉水




等攝製隊過左之後可以繼續落山，估唔到行多幾步又有另一隊攝製隊，我諗伊香保溫泉係日本真係好出名，咁多人黎拍野


呢條石板街其實都幾靚






足湯




一路欣賞紅葉，一路向山下行






而家多左好多雲，好彩今朝已經欣賞到藍天白雲靚景




呢個時間多左好多人，不過對比起其他出名既景點呢道算係好少人




今次我地只係行左石板街呢邊，纜車個邊冇去到，不過已經好夠啦，呢個行程非常滿意


拎返背囊坐巴士返涉川站，伊香保溫泉再見




咁岩差唔多時間有班特急列車準備到站，即刻去售票處換呢班車既指定席，成功換到即刻過去等車






咁岩火車黎個時相機冇電，影唔到火車相...


十幾分鐘車程就返到高崎站，會係呢道轉新幹線；到站後已經即時去售票處換飛，估唔到下一班車full晒，揀過另一班車又full，咁就求其揀過班算


未咁快上車，係高崎站四圍行下
















好多地方賣群馬縣吉祥物「小群馬」






妹妹買個便當就去月台等車




見到對面月台有今日坐過既E4 Max列車，16卡車坐到一千六百幾人






我坐既E2列車都到站啦，車上已經有好多人，又會咁多人去東京




座位可以向前又可以挨後，坐得好舒服


我係「大宮站」落車，妹妹繼續坐返東京；大宮站好熱鬧，出去望下順便買定便當上車慢慢食






早左上月台睇車，黎左部E6+E5新幹線列車，兩部車暫時係日本營運速度最快既新幹線，可以行到320km/h；兩部唔同顏色既車駁埋一齊好有趣




兩款車除左顏色唔同之外，外形感覺上差唔多，而另一個唔同之處係紅色E6列車會行駛秋田迷你新幹線路段，即係會行經在來線，要就返在來線闊度所以車身會比標準新幹線窄，係新幹線月台要申塊板出黎比乘客上落


下班車就到，去15號車廂排定隊




我坐既E6秋田新幹線列車到啦


車箱座位以2+2排列，好舒服；呢班車都係坐滿人，我旁邊座位乘客係仙台同盛客落左車之後都即刻有其他乘客坐


東北地方四點零鐘個天就開始暗，去到五點個天會黑晒，要習慣一下呢道既時間


由大宮去秋田縣角館車程大約兩小時四十五分鐘，咁多時間可以慢慢嘆鐵唔便當




好多行李


終於黎到「角館站」，呢道應該算係一個熱門旅遊地方，但車站比想像中冷清，除左一班台灣人之外就只有幾個人，少人到我仲諗自己會唔會係落錯站




站就冇落錯，不過就真係人都唔多個，夜晚冇野好做就慢慢影下相先行出去








夜晚七點幾角館站燈火通明，同站外好似兩個唔同世界，出面只有小小街燈發光




由角館站行去住既地方大約20分鐘，沿路黑媽媽人影都唔多個，仲要路過墳場都咪話唔驚，唯有行快兩部步




順利到達今晚住既民宿，因為民宿既check in時間只係到九點，為安全起見我搭早一班車，八點前就黎到；房間簡簡單單好舒服，最重要係張床好好訓，不過呢道係冇浴室，沖涼可以去附近既溫泉，我今日先浸過溫泉所以今晚要懶一下，最後係冇沖涼，哈哈




而家先八點鐘冇理由咁早就訓既，係房間抖左一陣就出去，民宿有免費單車提供，我就踩單車出去睇下，好彩單車係有車頭燈，仲有個大月亮陪住我


去到武家屋敷呢個角館睇紅葉既好地方，夜晚會開燈比人夜賞紅葉，只可惜我黎得太早，今年呢道絕大部份葉都未紅，唯有當係睇夜景，感覺都唔錯






返去既時候經過兩間便利店，買左Lawson炸雞同FamilyMart三文治做夜餐，終於第一次食到好多人都話好食既Lawson炸雞啦！又真係好滑








又過左充實既一日；期待左好耐今日終於比我黎到東北地方，一向都覺得東北距離我好遙遠，坐車要坐好耐好耐先到；東北比我另一個感覺係世外桃源，一個天然美麗冇污染既地方，好開心而家我已經致身於呢片世外桃園之中