日本關東。東京8天櫻花之旅。2019。春

< 日本東京櫻花之旅 >

近年都有去過日本唔同地方，紅葉﹑雪景都有欣賞過，賞櫻就未試過；平時睇動畫睇日劇見到好多櫻花美景，一直都好想去感受櫻花季節，今年終於有機會啦，係四月頭拎左假，博一博睇下遇唔遇到櫻花滿開；今次選擇飛東京，方便如果遇唔岩櫻花滿開都仲可以北上或者南下，最後唔洗去好遠，係東京同附近地方都可以欣賞到超靚櫻花


日本東京櫻花之旅八天行程：
Day1： 香港 - 東京 - 上野恩賜公園﹑千鳥ヶ淵﹑目黑川
Day2： 東京 - 皇居﹑隅田公園
Day3： 東京 - 代々木公園﹑新宿御苑
Day4： 東京 - 權現堂櫻堤 - 鬼怒川溫泉
Day5： 鬼怒川溫泉 - 熊谷櫻堤 - 東京 - 上野恩賜公園
Day6： 東京 -﹑土合站
Day7： 東京 - 日立 - 国営ひたち海浜公園
Day8： 東京 - 香港

第一天

坐凌晨機出發，天光到達東京即時去市區開始櫻花旅程，第一個目的地係櫻花聖地「上野恩賜公園」，一出京成上野站就到好方便；一行上公園就見到好多好多櫻花！一直都好想見到雪白色既櫻花，今次黎到第一日就完成呢個夢想，Yeah！上野公園全部都係櫻花！






公園種左好多櫻花，朝早九點半都未夠已經有咁多人賞櫻，超熱鬧，公園仲有好多小食同遊戲攤檔，就好似嘉年華一樣




公園另一邊不忍池都種滿櫻花，配上湖水小船又係另一種風味






好靚丫！




行完上野恩賜公園，坐地鐵去到另一個賞櫻熱點「千鳥ヶ淵」，可以划船由河上賞櫻，當然呢啲時間一定會有過百人排隊，而且我都冇興趣，係岸邊睇下已經好開心






千鳥ヶ淵旁邊就係「靖國神社」，順道入去睇睇，神社門口又係有好多小食攤檔，食小小野後繼續賞櫻，神社入面有好多櫻花




好多人圍住其中一棵櫻花樹，原來係東京用作櫻花予想既「染井吉野櫻」標準木


夜晚時間去到目黑川欣賞夜櫻，河兩旁都開滿櫻花，好多人都一路行一路拎住杯酒賞櫻，加上燈光照射特別有浪漫氣氛












第二天

第二日朝早去左「皇居」賞櫻，皇居既櫻花唔係最多最靚，但呢個地方夠晒特別，要櫻花季節先會開放一部份比遊人進入，咁難得岩時間黎到緊係要排隊入去睇下




行完皇居順路去左旁邊「皇居東御苑」行行，有塊大草地


之後去到「淺草寺」，呢邊都有櫻花




黎淺草既目的主要唔係參觀淺草寺，係想去旁邊既「隅田公園」，呢道都有好多櫻花樹，可惜黎得比較遲，已經冇咩陽光








隅田川兩旁都係櫻花樹


第三天

朝早暫時唔睇櫻花，陪朋友去築地行下，朋友第一次黎到東京都要黎行下既


下午去左「代代木公園」，公園好大我都要花啲時間搵個入口；一入到公園就見到櫻花樹下坐滿人，好羨慕日本人可以有啲咁靚既地方同朋友聚會；今日好大風，有時候一起風就吹起好多沙，會吹到成面都係沙






係關門前一個鐘成功去到「新宿御苑」，呢道既櫻花都係好靚；黎呢道除左賞櫻之外另一個目的係黎「言葉之庭」朝聖，終於成功黎到




池水都變成粉紅色，超靚






夜晚去到秋葉原「刀劍神域Cafe」食野，咁都比我遇到想唔幫襯都唔得啦




第四天

今日暫時離開東京，去到幸手「權現堂櫻堤」睇櫻花，呢道除左櫻花之外仲有油菜花，唔同色彩交錯之下風景超靚，全個旅程覺得呢道既風景最靚；由東京黎都好方便，有鐵路可以直接坐到幸手站落車，落左車行大約2.5公里就到，我見有巴士去就去左坐車，結果塞車塞到爆起碼塞左個半鐘，如果行路一定快好多














睇完櫻花繼續坐車北上去到「鬼怒川溫泉」，黎呢道唔係為左櫻花，係一直以來唔知點解好想去鬼怒川溫泉呢道睇睇，今次旅程見都算順路所以就黎左啦，算係完成一個小小心願


第五天

望住鬼怒川舒舒服服浸溫泉，再開始新一日行程，其實呢道冇咩特別，但比我既感覺好好，係一個令人放鬆既地方


路邊都係櫻花樹


巧遇蒸氣火車


坐火車去到熊谷，去呢道最出名既賞櫻熱點「熊谷櫻堤」，呢道既櫻花種係堤壩旁邊，長長既堤壩都係櫻花，多到行都行唔到去櫻花既盡頭，係小小油菜花點綴之下風景都係好靚，當然冇琴日權現堂櫻堤咁震撼；今次我都學人地買啲野黎慢慢食，今日主要都係黎呢道賞櫻可以慢慢hea都得










有櫻花既地方點小得美食，又熱鬧又多人但唔會覺得擠迫




返到東京仲有時間就去多次上野公園，夜晚都有好多人賞櫻，現場睇比較暗，要靠燈籠點點燈光照亮櫻花








今晚再次去到刀劍神域cafe，今日轉左餐單可以試到新野，一個月前已經book定黎呢道食架啦




第六天

今日要去想去好耐既地方「谷川岳」，朝早去到越後湯沢轉車先知睇錯時間表，睇錯左一班不存在既班次，咁冇計啦唯有食下野等下班車，呢啲偏遠地方一班車有排等...最後成功去到「土合站」，有「日本第一地下車站」之稱，車站一個月台係地面，另一個月台係地底大約70米深，我懶行緊係揀係地面月台落車




車站附近已經係雪地，春天都可以見到雪景真好


坐纜車上山，上到去真正係冰天雪地









見有人由山上纜車站滑雪滑到落山腳纜車站，好勁！


黎谷川岳既原因就係為左佢，如果夏天黎到就可以行去山頂，而家成山都係雪唔敢行


落山去返土合站搭車，今次要落地底月台上車，望住一條又長又暗又冇人既樓梯都feel到恐怖，但唔落去就冇車搭所以點都要落去，好彩有朋友陪住唔會驚，又好彩係行落唔係行上唔怕辛苦；未行落去，只係經過下面呢條通道已經聽到十號風球咁大既風聲，唔洗估都知下面有車行緊


傳說中既樓梯！樓梯中間有座椅比人休息用，行落去好快就行到，落到底望返上黎心諗如果要行上就大獲




下面月台有候車室有廁所，設施都算齊全


第七天

一早坐火車去到「日立站」，車站由玻璃外牆建造，係車站望出去就係一望無際既太平洋






日立對出既馬路就有好多櫻花樹，但呢幾日睇得太多櫻花，就算櫻花好靚已經冇之前咁好心機去欣賞




睇完櫻花就去到「國營常陸海濱公園」，呢道係一個好大好靚既公園，一入門口就見到好多唔同顏色既鬰金香同水仙花，又香又靚，第一次見到超大朵既水仙花








公園最出名就係粉蝶花，我黎呢個時間尚早仲未見到粉蝶花花海，過多兩星期就會見到成個山都係粉蝶花；見唔到滿開粉蝶花唔緊要，本身呢個櫻花時間就唔預見到，就咁行上山望下海都好開心






第八天

最後一日去左Pokemon Cafe，呢道要早一個月book定，佢好快就full，Cafe除左食物可愛之餘仲有比卡超行過黎同我握手，大人同小朋友都好開心






八日櫻花旅程完滿結束，睇櫻花呢個願望順利達成，仲可以話係超額完成，日日都可以係藍天之下欣賞到滿開櫻花，日日都超開心；櫻花除左係賞櫻熱點可以見到之外，係一般大街小巷都可以見到，只要行出門口就係櫻花樹，好羨慕日本可以有一個咁靚既春天