日本17天鐵路之旅。北海道。2019。夏

< 日本十七天鐵路之旅 >

< 北海道篇 >

今次旅行首選既地方唔係日本，本來係想去歐洲，後來懶plan行程就將歐洲旅程延遲到2020年春天（今年春天都係去唔成啦...），今次就去啲唔洗諗咁多既地方，咁當然就係揀日本啦，基本上買張機票去就得，唔洗點plan行程都冇問題，最後媽媽話未去過北海道就變左呢個北海道旅程；而我因為有假期所以會繼續玩多陣先返香港，買左張14日JR Pass瘋狂搭火車，搭去邊道都可以，當然頭幾日有屋企人係道唔會搭得咁誇張，之後幾日先會亂咁坐，哈哈

日本十七天行程：
Day 1：香港 - 東京
Day 2：東京 - 函館 - 自由市場﹑金森紅磚倉庫﹑函館山
Day 3：函館 - 函館朝市 - 大沼公園 - 北海道舊廳﹑大通公園
Day 4：札幌 - 二條市場 - 旭川 - 旭山動物園
Day 5：旭川 - 美瑛 - 富田農場 - 富良野 - 小樽
Day 6：小樽 - 小樽運河﹑三角市場 - 青森
Day 7：青森 - 仙台 - 松島 - 青森
Day 8：青森 - 東京
Day 9：東京 - 大阪 - Hello Kitty新幹線 - 備中松山城 - 鳥取
Day 10：鳥取 - 鳥取沙丘 - 出雲大社 - Sunrise出雲
Day 11：東京 - 輕井澤
Day 12：東京 - 內船 - 甲斐常葉 - 山梨県笛吹川 フルーツ公園
Day 13：東京 - SL銀河 - 盛岡 - 青森
Day 14：青森 - 十二湖 - 不老ふ死温泉 - 盛岡
Day 15：盛岡 - 松本城 - 諏訪湖
Day 16：東京 - 天氣之子展 - 神田明社
Day 17：東京 - 秋葉原 - 香港

第一天

由香港飛到東京！

第二天

旅程正式開始，朝早由東京坐新幹線到北海道，四個鐘車程去到「新函館北斗站」，再轉多程火車去到函館站，一到北海道就感受到北海道天氣比東京清涼舒服好多

第一站去左自由市場食野，掛住行冇影相

函館路面電車

酒店旁邊就係「金森紅磚倉庫」旁邊，呢道都係啲買野既地方，岩屋企人行多啲

傍晚時間去到函館呢條好出名既斜坡，影左幾張相就走

搭纜車上函館最出名既地方函館山，話晒係日本三大夜景

上面風景係幾靚，仲好多人，我諗係上面企左唔夠15分鐘，仲未逼到去欄杆邊影相，突然間廣播話將會有風雨，纜車會係半個鐘後停止行駛，好多人又迫番去纜車站搭車，我唔想落唔到山都去排隊搭車走（最後雨都冇落過粒）

好多人等車

落山後去咗函館好出名既「小丑漢堡」食野，漢堡包同薯條都係超好食

第三天

朝早去左「函館朝市」食早餐，呢道一早就已經好多人，有野賣又有海鮮食，可以即時揀新鮮既海鮮即時煮

媽媽買左隻蟹食，得佢一個食唔可以買太大隻，佢話超好食

¥500魚生飯，真係好平！可惜我唔食海鮮所以唔岩我，我都係要食其他野

坐「超級北斗」向北出發，去到「大沼公園站」

大沼公園環境好舒服，行左一陣就要繼續坐車去札幌

由函館坐火車去札幌有三百幾公里，特急列車都要坐成四個鐘，加上頭先又落左車行公園，去到札幌又到開餐時間，去左妹妹想食既炸豬扒店，基本上次次去日本都會食一食呢間，平平地又好食又坐得舒服

見到陽菜！

經過舊「北海道廳」，入面有啲歷史介紹

大通公園個似做緊北海道物產展，全個公園都有超多攤位，頭先食飽左已經食唔落野只係行一行

市中心「狸小路商店街」

札幌其中一個熱鬧既地方「薄野」

買冬甩返去慢慢食

第四天

札幌「二條市場」都係好出名，但感覺上冇函館個市場咁好行，而且函館市場多新鮮海鮮，呢度多雪藏

札幌電視塔

時計台，冇咩特別就唔入去

繼續坐火車北上去旭川

去到「旭山動物園」，呢道除左好多動物睇之外，設計都好有心思又整得好靚，好岩小朋友去玩，當然大朋友都適合，呢道係我去過最好既動物園

動物園入邊買既炸薯角超好食，真係超超超超超好食

夜晚既旭川唔多人

去左呢間旭川算係出名既「成吉思汗大黑屋」食晚餐，主要係食羊肉，好多人排隊，不話食完屋企人話冇咩特別

夏天有咁正既氣溫真係好舒服

第五天

一早坐火車向美瑛出發

美瑛自然風景好靚，周圍行下睇下時間好快就過

坐「富良野·美瑛慢車號」向下一個地方出發

去到只有呢部火車先會停既「薰衣草花田站」落車

富田農場入面既薰衣草好靚

店舖都整得好靚

試左呢道既特產薰衣草雪糕同埋蜜瓜，都係超好食

返去車站搭車去下一個目的地富良野

係呢道食下野同埋行下，最主要目的其實都係等火車返札幌

坐「富良野薰衣草號」

坐呢部車個時都覺得奇怪，點解成車人不停拎住相機行黎行去影相，路過啲荒山野嶺都有人係出面影火車，後來落左車上網check先知道原來呢班車係最後幾日行駛，行多兩日就退休

第六天

朝早係小樽起身，去到小樽出名既「三角市場」，都係好多海鮮同埋水果賣

小樽地標「小樽運河」

超好食既蜜瓜雪糕

係小樽行左一陣就返去札幌

係札幌食碗拉麵就走

買左泡芙上車食，超好食，買少少野都包得好靚

夜晚去到青森

第七天

今日本來想去「奧入瀨溪流」，但有颱風黎緊青森呢邊所以都係唔敢去，唯有搵地方避開颱風，最後去左仙台

又見到陽菜！

去左「松島」行下，今次又係唔好天，好在未至於落雨

返仙台市區周圍行下就行到夜晚

晚餐去左食牛舌，大家都話好好食

坐新幹線返青森

第八天

颱風走左之後青森好好天，行多陣手信店就要離開返去東京，返東京既新幹線比想像中多人，下一班去東京既車竟然冇位，要再等多班

其實今日冇咩特別野做，返到東京都係四圍行下，行左去上野公園

食埋晚餐就送媽媽去機場搭飛機返香港，妹妹都同我分開，佢返酒店休息繼續留係東京玩，而我就留係機場過一晚，第二朝一早出發去新地方

短短幾日既北海道旅程好快就結束，北海道咁大遲啲要再去過，下次想係冬天去，北海道要有雪先至係真正既北海道ma