日本17天鐵路之旅。鳥取﹑出雲篇

< 日本十七天鐵路之旅 >

< 鳥取﹑出雲篇 >

第九天

咁耐以來都未試過係日本搭寢台列車，今次難得拎住全國JR Pass，唔洗再比錢點都要試一試；寢台列車係日本已經越來越少，平民版寢台列車只係得返Sunrise瀨戶/出雲，所以都係搭左先算；難得去到鳥取個邊順便都玩一玩啦

一早起身就開始鐵路旅程，先由東京坐新幹線去大阪，食過午餐後就係大阪上呢部Hello Kitty新幹線

Hello Kitty新幹線除左外面之外，入面成部車都係Hello Kitty

呢部車係由500系新幹線改造出黎，500系都係越來越少，唔知幾時會冇得再坐

去到岡山轉「八備線」北上，今次係部好傳統既特急列車，咁岩個位前面冇野，可以伸直對腳都得

離開市區之後入左山區地方，山陽地區去山陰地區中間基本上都係鄉村地方

去到「備中高梁站」落車，呢度可以搭車去「備中松山城」；車站同旁邊相連既圖書館都幾新

假期會有巴士去備中松山城，平日就要搭每日4班既共乘的士遊去，一個人¥500單程，不過最麻煩係要早一日打電話黎預約，好在有朋友幫手約到；中午呢個時間只係得我一個人坐車，我諗冇咩人去呢個地方

備中松山城係十二現存天守之一，而且係山上面，就算部車上左山都好，落車都有一段仔山路要行

可以望到下面成個高梁市

上到去啦

過幾日就加價

拜見城主

呢個城好細，因為佢係現存天守之一，所以入面冇乜特別改動，保留左原始風味，而且佢係山城，可以睇到風景，算係一個唔錯既地方，如果朝早黎既話仲有機會見到雲海

的士未到回程時間已經等緊我，上車返去火車站，中途經過呢道另一個出名既地方武家屋敷，的士司機都有同我介紹，不過要趕住搭車走唔停低行啦

繼續坐火車向北出發

去到「米子站」落車，天已經黑

等左一陣之後轉「山陰本線」特急列車

最後去到今晚目的地鳥取

只係八點鳥取既街已經超級靜，想搵間岩食既餐廳坐低食野都有難度，都係去便利店買野食算；本來有諗過再坐火車去啲鄉村地方行下睇下星，最後都係懶郁，坐低食下野寫下Postcard仲好

第十天

八點就坐巴士出發，去鳥取最出名既地方「鳥取沙丘」

今日天氣好好又唔熱，感覺好舒服，慢慢行下真係好寫意，唔知點解特別鍾意呢個地方唔想咁快走

就咁睇相可能唔覺得大，見到啲人仔就會感覺到其實呢個沙丘真係好大好大

上左沙丘頂就係無敵大海景

係呢道慢慢Hea下就過左個幾鐘，又係時候要回程

坐山陰本線向西面出發，沿途有山有水，風景都係好靚

今次去到「出雲市站」

轉「一畑電車」去出雲最出名既地方「出雲大社」

窗外風景都係好靚

「出雲大社前站」

出雲大社好大，呢道好似係求良緣既好地方，今次冇求蝕左tim

舊電車

黃昏時間就坐電車翻去

係車站食埋晚餐就去等車，今次主角「Sunrise出雲」黎到啦

今晚訓呢個最平既nobinobi座席，用JR Pass係唔洗錢，個位睇落去好闊好舒服

開車之後四圍行下，其他車卡有單人房有雙人房，比貴啲有好多唔同選擇

火車上面有浴室沖涼，¥320買張沖涼卡就可以沖，沖涼卡係先到先得賣晒就冇，我係出雲上車基本上冇咩乘客所以唔洗同人爭，遲啲多人上車就未必買到啦；難得可以係火車上面沖涼點都要試下

參觀完火車之後就返去自己個位，今晚冇咩特別野做九點幾就訓著左，第二朝訓醒既時候望一望出面部車已經停左係熱海站，我諗呢晚係全個旅程訓得最長時間既一晚；琴晚訓之前部車仲係山陰地區，成卡都係得幾個人，訓醒時全車卡差唔多滿人，我都唔知佢地係邊道上車

大約七點就到東京站落車，短短兩日山陰鐵路之旅完成，寢台列車比我想像中舒服；返到東京準備開始新一日既行程啦