日本17天鐵路之旅。天氣之子Cafe﹑搖曳露營△聖巡篇

< 日本十七天鐵路之旅 >

< 天氣之子Cafe﹑搖曳露營△聖巡篇 >

第十一天

兩日一夜鳥取旅程完成返到東京，緊接開始另一個小小朝聖旅程，今次主要目標係「天氣之子Cafe」同「搖曳露營△」，天氣之子係新海誠作品我諗多啲人識，搖曳露營△都係一套好好睇既動畫，睇到我都想去露營

上午一早已經返到東京，搵妹妹食過早餐之後有一個下午時間冇咩好做唔知去邊好，結果自己一個坐新幹線去左輕井澤，本來諗住出去行下，見天氣咁熱唔想行出去就去左旁邊outlet，好彩都買到少少野返來

旁晚返到東京又搵返妹妹開餐，去左「天氣之子Cafe」；呢道冇特別佈置，只係係間餐廳劃左啲位置出黎做Cafe

好多陽菜！食物賣相還好，不過味道就奇怪少少，冇所謂啦都係為左個樣唔係味道

夜晚送妹妹去機場之後繼續自己旅程

第十二天

琴晚一點都未訓，今朝七點已經上左新幹線出發，開始「搖曳露營△」聖巡旅程

先去到「靜岡站」，再轉開去甲府，途經「身延線」既特急列車

列車離開海邊之後轉向內陸方向行，沿途好多鄉村農田，富士山亦都越黎越近

首先去到「內船站」落車，見到個站都算大，但其實係一個無人車站

出到站主要都係一條街，行遠少少有條河同埋好多住宅，呢道就係撫子住地方「南部町」

四圍行下行到夠鐘就返去等車

桔梗信玄餅好出名，本來都想買啲返屋企，但佢大約一個星期就過期，放唔到帶返香港所以唔買啦

好多山可以行

上左普通列車繼續出發，沿路都係田地

去到「身延站」落車，相對頭先內船站呢道熱鬧好多，起碼有職員當值，又有野食賣

好多poster

出到黎都係一條街

又見到一路陪住係身邊既「富士川」

坐得係呢個位食野一定係fans！

係呢道一定要入去買「身延饅頭」，我都買左啲一陣係車食同埋夜晚食，又平又好食

又見到凜同撫子

繼續坐車去到下一個地方「甲婓常葉站」，呢個站好細，環境更加寧靜，除左有間便利店之外基本上咩都冇

最大就係呢條馬路

呢道係學校所在地，沿路有指示教大家行去學校

上面就係學校啦

咁岩操場呢道有活動，好多人著晒衫帶齊裝備黎露營，之後睇返先知原來係搞緊凜既生日會！！

見到大家啦

學校貼滿晒大家既相

入面有圖書館場景

睇到差唔多時間就落返山搭車

坐火車去到「山梨市站」，算係返到城市地方，食左小小野之後就搭尾班巴士上山

去到「笛吹川 フルーツ公園」

過左五點舖頭同足湯都關門，我要係道乖乖地等夜晚，話晒呢道自稱係「新日本三大夜景」

山上風景開揚，可以見到富士山同山下大片平地

而且仲有溫泉，可惜怕唔夠時間唔敢浸

慢慢等慢慢等，終於等到夜晚可以睇夜景，撫子佢地都有黎睇過架，風景當然唔錯啦

睇到差唔多時間就要走，夜晚係冇巴士落山，我要預多啲時間行返落去

頭一段路連街燈都冇，好彩一早已經準備左電筒，但夜媽媽人得自己一個又聽到啲風聲都唔好話唔驚，好在一路有個咁靚既夜景陪住我

最後比預期行得快，大約45分鐘就行到火車站，連上一班火車都未開，但呢部車係全車指定席，諗左諗上唔上車好呢？結果都係放棄，等多一個鐘坐返自己訂好飛個班穩陣啲

係車站等左成個鐘，最蠢係唔記得出面有超級市場可以行；上到車先發現呢班車應該可以上車補飛，座位上面有唔同顏色燈顯示個位有冇人，冇人既話就可以坐落去

返到新宿食啲野，今日朝聖旅程圓滿結束，仲圍住富士山轉左一圈

聽日將會開始另一個鐵路旅程，再次北上去東北地區