坐綠皮火車到廣州

< Hello Kitty Cafe & Canton 3天遊 >

1/8/2013

 

平時去廣州坐直通巴士比較多，貪佢夠平，單程90來回170；但今次要先到深圳處理銀行戶口問題，冇得搭巴士lu，就趁機過下火車癮坐火車上廣州


點解山長水遠去到深圳西站而唔係深圳站？就係呢道有正野搭，可以坐到傳說中綠皮火車，趁佢仲未被完全淘汰之前坐返次；今日藍天白雲，有個好開始


第一次去深圳西站，一個比較舊既車站，人唔多買票唔洗排隊


綠皮火車唔好睇佢望落殘殘地，真係平靚正架，去廣州只係¥34.5（而家已經冇左呢班車啦）；如果想更平去廣州仲有另一個選擇，深圳東站開去廣州東站既K1208價錢只係¥24.5，更加平而且係冷氣車，1小時21分鐘到廣州只係慢和諧號少少，下次要試下呢班車先


好多車箱都係冇人既，唔洗同人迫，自己一個人霸一個車箱都得


夏天天氣雖然熱，但火車一路行一路吹住吹風，咩熱都吹走晒啦；差唔多廿年前曾經坐過呢種火車上廣州，如果遲少少就想坐都冇得坐啦




個個都話食在廣州，去到廣州就緊係要食下野啦

每次到廣州一定會食最鐘意既腸粉（廣州又叫拉腸），搵左間算係有名氣既銀記腸粉，味道都唔錯好岩我口味，不過始終唔及以前一個廣州朋友帶我去食既一間路邊小小腸粉店咁好味，但又搵唔返係邊道；話時話佐敦都有一間好出名既腸粉店，講左好耐都未去試過，搵日一定要去試下






去到荔灣就自然諗起荔灣艇仔粥，今次去左又係比較有名氣既陳添記，都ok好食既但冇咩驚喜；都係上次夜晚坐係芳村馬路邊食好feel好多，芳村個間食完之後先知佢以前真係係艇仔上賣艇仔粥，上左岸係芳村繼續經營，個道有驚喜好多


朋友話呢個魚皮好好食，不過我唔食魚所以冇試啦


仲有個好滑既豬油腸粉


再去有百年歷史既餃子店，鮮肉餃粟米餃味道唔錯，不過都係冇特別驚喜，可以廣州香港飲食文化太接近，或者跟本就一樣，呢D野平時都食唔少所以唔覺得特別






食唔飽再加多兩碗雲吞




夜既去到好多人排隊既明記甜品，真係好多人，多人到連所有奶類甜品都賣晒......唯有過對面是但搵間食啦......


對面呢間D甜品就真係好一般啦，唔係咁食得落......


有時候食野又唔洗刻意去搵，可能隨意係街邊都搵到好野食；路邊幾蚊一碗既麵都可以食到好滿足


好多時去到廣州都會搵個廣州朋友，次次都好好客帶我地去食一D廣州人先識得搵既好野，今次都唔例外，廣州朋友知到我到廣州，收左工即刻係惠州趕返廣州，食完又要返惠州，真係好好客；今次就帶左我地去一個不知名既地方，食左一餐好豐富既晚餐，有D餸菜好有特色見都未見過；我同呢位廣州朋友相識過程都好特別，係某年會展一個展覽上面，我去到佢負責既攤位買野，就係咁認識左


臨離開廣州之前，貪方便去左巴士站旁邊既「澳門街」食晚餐，呢道以前廣州朋友都帶過我去食，估唔到間野咁貴，是但叫幾樣野食都食左成舊水一個人... 唉...食完之後心都痛，就係咁衰係最尾一餐手上，知咁貴拎D錢去Hello Kitty Cafe飲多杯野好過...不過呢間澳門街勁多人，明明間野已經好大間，坐到全full不特只仲要有勁多人等位，有冇咁好食丫......










係廣州另一樣好想食既野就係呢個啦，自從香港有左21蚊餐之後就冇再食過脆辣雞腿包，終於等到係廣州食到啦，而且比香港辣好多，只係15蚊咋~


廣州都冇咩特別地方想去，行行下行左去有百幾年歷史，由法國興建既石室聖心大教堂，歌德復興式風格教堂望落去好宏偉，但除左外表之外，教堂內所有野都曾經係幾十年前完全被破壞...任你再用幾多錢去重建都冇可能回復到原本既價值，唉...可惜......有個有趣既地方係原來興建教堂用既花崗石係由牛頭角同 茶果嶺開採，真係山長水遠運上去




又行左去越秀公園，夏天四圍行熱到出煙


晚上的廣州塔，到此一遊




今次住係呢間7月新開既Lazy GaGa Hostel，Hostel係由一個香港年青人開，佢仲係我朋友既朋友既朋友，咁當然要去支持一下啦，地點係北京路&上下九路之間，又近地鐵站都 算方便；近排呢間Hostel越做越出名，咁快就可以係Hostel排行塝排係中國Hostel頭十名之內，其實真係好勁


所有野都係全新，張床又好大張




偷影到傳說中既香港老細


最正既係有好大個common area，好多野玩，當然有我最like既三國殺啦，玩到好夜先訓






三日無無聊聊就係咁過，不過我覺得廣州真係好好好好好悶，都係唔好去咁多，留係香港行下山仲好

< Hello Kitty Cafe & Canton 3天遊 >
< 完 >

↓ Hello Kitty Cafe & Canton ↓ 
http://arho25.blogspot.hk/2013/11/hello-kitty-cafe-canton-2013.html