Hello Kitty Cafe & Canton @ 2013 夏

八月既時候有事要去廣州一轉，諗落坐幾個鐘車去又坐幾個鐘車返，如果咩都唔做咪好蝕底？要好好諗下廣州有咩好玩先得！廣州其實真係冇咩特別野好玩， 特別既地方唔多，加上之前都去過廣州n次，想去既都已經去晒啦，拎起本廣州旅遊書諗有咩玩真係諗到頭都暈，既然廣州冇地方想去就不如諗諗廣州附近有咩正野啦；最後用左唔洗一秒時間即刻有答案：Hello Kitty Cafe！！之前如果要去Hello Kitty餐廳，最近應該係台北Hello Kitty Sweet，再唔係就要去首爾，估唔到今年竟然係佛山出現一間Hello Kitty Cafe（係正版唔係山寨），喜歡Hello Kitty既我當然要去朝拜一下！！

原本去Hello Kitty Cafe呢D咁可愛既地方都唔打算話比人知，自己靜靜雞去完就算，但出發前幾日比朋友知道左之後竟然有多3位朋友加入，真係估唔到大家咁有興趣，不過大家都唔敢同人講自己去Hello Kitty Cafe，所以呢3位朋友身份要絕對保密，怕比人知道會笑死人bor；不過我唔怕既，比人知道咪比人知道囉，邊個叫Hello Kitty咁得意咩，哈哈

由廣州去Hello Kitty Cafe好方便，只要坐地鐵到祖廟站，出站後行大約10分鐘就到；Hello Kitty Cafe就係祖廟站旁邊嶺南天地入面


門口大大隻Hello Kitty，唔洗擔心搵唔到，夜晚仲會發光


要踩住Kitty入去tim，Sorry


入到裡面，原來係行英倫風格，真係唔錯；時間尚早客人唔係咁多，可以安心四圍影相，店入面點影都得，唔洗擔心比職員鬧


影相之餘要睇下有咩好食啦，有唔少選擇，不過價錢就有少少貴，一心來到就當然就唔會計較價錢啦，話之佢幾多錢食左先講


揀好野食要先係呢部機選擇，咁高科技既野第一次用有少少難度，但唔洗擔心，職員服務好好，會幫你搞掂所有野


完成揀野食呢個重任就可以過來比錢；之後會收到一個接收器，當所有野食完成之後接收器就提醒你去取野食


有好多好靚既甜品選擇，完全係花多眼亂，都唔知點可以整到咁多咁靚既美食出來，我都唔知點揀好，最後只係隨意點左一款；每一款美食都咁靚，唔洗刻意去選擇


見到D Kitty咁可愛又點捨得食左佢呢








屋頂都有唔同裝飾


櫥窗上有好多可愛既Kitty，太多啦唔影佢地lu


大堂位置有紅色大梳化，再加上Hello Kitty咕o臣，吸引好多相機影唔停；大家來到就算唔食野都可以隨意影隨意玩，想點影都得




從開放式廚房可以望見職員好用心泡製美食，偷偷地影左呢張相，唔可以比佢地發現


大堂另一邊有好多座位，想入去就要先買野食再入去用餐




等左唔係好耐，接收器就響啦，拿拿聲去拎野食先；所有餐具都係Hello Kitty，超得意


嘩...我既Hello Kitty cheese cake咁可愛，真係唔捨得食左佢丫


仲叫左其他美食，全部都有Hello Kitty logo架


如果入來搞搞震冇幫襯就唔可以上2樓參觀，我地有幫襯就可以衝上去




上層首先見到一大棵許願樹，寫滿晒願望；對住Hello Kitty 許願會成真？


偷睇下先


同下層一樣都係親切的英倫風格


轉一轉頭就望見巨型Hello Kitty & Dear Daniel手牽手，好幸福


二樓大堂座位設計好正，一個個綠色獨立包廂，好有私人空間


包廂入面有粉紅色Hello Kitty梳化&蝴蝶結咕o臣，卡哇兒呢


Hello Kitty無處不在，總會係你想像唔到既地方出現




上層後面分開兩個房間，左邊房間同出面係兩個完全唔同既風格，光猛陽光襯淺藍色白色，有一種舒服溫暖感覺，又帶一點童話故事feel


天花板仲有好大個Kitty頭，好似一直望住你笑既感覺，不過呢道太開陽唔適合我地，如果比其他人見到我地幾個男仔去Hello Kitty Cafe真係笑死人都似，為左其他顧客著想都係避一避好D


閃去右手邊房間，同出面一樣係綠色森林風格






我地就坐係右下角既梳化上，坐得好舒服；係道食下野吹下水上下網，唔經唔覺就可以坐幾個鐘，快樂不知時日過


唔知坐左幾耐，夠鐘同Hello Kitty講ByeBye啦，呢道都開始多人


再見親愛的Hello Kitty，I will be back！！


如果呢道請人就好啦，我即刻咩都唔理衝黎呢道做野先
當年去日本就係為左去Sanrio Puroland睇Hello Kitty，今次去到佛山就為Hello Kitty Cafe而去，唔之下次又會去邊道探Hello Kitty呢？