香格里拉。石卡雪山

 < 北京﹑西安﹑成都﹑雲南23天遊 >

第二十一天

最期待既日子終於來到啦，來到香格里拉最想就係上雪山，所以今日好早就起身食早餐，食飽左先有力上山架


由酒店房間向外望，一地都係雪，唔知夜晚係唔係有落過雪呢？城市入面都積滿雪，我諗上到雪山就唔怕冇雪睇啦，面家反而要希望雪山唔好落咁大雪，雪太大既話纜車可能會唔開，到時冇得上山就喊都冇用lu...




出發後導遊先車我地買氧氣，車上導遊不停話上山會有高山反應又可以會變痴呆又點點點，嚇到好多團友都買枝氧氣旁身，價錢當然係好貴啦，唔記得係六十蚊定六十八蚊啦！！近來朋友唔係太舒服，所以就算貴都買左枝旁身，連同係客棧拎個枝而家就有兩枝啦，不過最後兩枝都冇用到，留左係客棧等下位有緣人拎去用啦；呢道都可以租定大褸上山，大大件紅噹噹，我都唔怕凍唔洗租都得


去雪山途中會經過納帕海，一大片都係雪地；如果夏天來到就可以見到水源充足既納帕海真係一個海






路旁有好多木架，用來曬草曬青稞用，而家冬天草都冇條所以就冇野曬啦


呢啲木架有個得意既傳聞，據說以前美國衛星發現呢啲一排排既木架以為係導彈發射架，所以就派人去調查，一望之下先發現擺左個大烏龍（美國都唔係第一次擺烏龍，土樓都中過招，哈哈^^）


行行下好似天氣唔多好bor


經過雪地，去到一個山谷之中落車，終於去到我最想去既雪山啦！眼前所有地方都係雪，就好似係冰雪世界之中，等呢日等左好耐好耐好耐啦......




好多團友都著住紅色大褸
而家仲要過多一關，如果去到纜車冇開就慘啦，求神拜佛一定要上到山頂！！


「“石卡”一詞來源於香格里拉藏語譯音，含義為“有馬鹿的山”，而馬鹿在藏傳佛教裡面是正在聆聽佛祖講經說法的蕓蕓眾生馬，因此，馬鹿是藏傳佛教吉祥動物之一，表示“吉祥長壽、驅邪正法”，所以石卡雪山在香格里拉藏民的心中就是香格里拉的保護神。」

上左纜車，正式登上香格里拉神山--石卡雪山
去到時見到纜車係冇開動，幾驚冇得上去，職員見到我地到纜車就開返啦，成個雪山除左我地十幾人之外就冇其他人，所以我地未到之前開來都冇用；石卡雪山同玉龍雪山相比算係好冷門，而且冬天人更少，來呢道就唔怕人滿為患


大約兩公里長既纜車帶住我地升到好高


十五分鐘後就降落係山中間一片雪地之中


仲未到山頂bor？要再坐多一程纜車先到，再係纜車站等車


呢道纜車好得意，唔似海洋公園咁不斷有纜車到，纜車係一組組來到，來完一組幾部車之後就要等一段時間先有下一組車；纜車行行下仲會突然減速，咁係因為有車埋站所以全部車都會一齊慢，咁仲好啦多左時間欣賞風景


離開雪地繼續向山上出發，又係大約兩公里路程，二十分鐘就會到；我見網上有遊記話上左第一段纜車之後因為山上太大風所以第二段纜車唔開放！好彩我已經上左車就唔洗擔心呢個問題


到山頂啦，一落車令我最驚喜既地方就係廁所，係山有竟然有熱水比你洗手，好暖丫！唔想去廁所都要來幫襯一下


出左纜車站就要開始上山
山上山下天氣差好遠，下面係藍天白雲，上到山變成大風雪，啲雪打到瞼上好似比針吉咁痛，要包實塊臉一步步慢慢行上山頂


好唔容易先行到咁高


山頂就係一舊大石頭，又平又大都算易行




行到上上面觀景台就停左雪，仲出太陽


但出面天氣始終唔好，好天既話係山頂可以見到好遠好遠，傳聞唔只可以望到玉龍﹑哈巴﹑梅里呢啲雲南雪山，連四川稻城亞丁等等既雪山都可以見到，不過今日咁既天氣唔好話雪山，前面係咩都唔係太見到






隱約可以見到後面既山脈，算係唔錯啦




要向更高地方進發




唔知係唔係係麗江住得耐定太開心，係山上走來走去都冇出現高山反應，可以安心係山頂玩，Yeah！


一路都有木棧道行，完全冇難度




望到下面頭先轉車既平地，呢道真係好高丫




另一面就全部都係山


最後來到呢個可以到既最高地方，大約4500米高；不過事實一定冇4500咁高，因為石卡雪山高度得4499.5米，而且真正既山頂係後面；呢道係我暫時到過最高既地方，要好好記念一下


睇完就要返去纜車站啦




一層層既雪睇落好似軟綿綿咁，訓上去一定好舒服


又返到來纜車站


有纜車到站啦；遠處既平地就係納帕海




等車既時候大家都對個雪人好有興趣，唔知係邊個咁多時間係山頂堆左個雪人出來？唔通等車等到悶？


當有車到站大家就要快啲閃開


坐車落山啦


首先去到纜車中轉站亞拉青波牧場，呢道既雪咁靚當然要玩下啦




佢地玩得好開心bor


我都唔執輸玩下先，成個人仆落地都唔會痛，雪地就好似海綿一樣好舒服


呢張相好鐘意，已經成為我電腦wallpaper幾年啦


望到啲纜車，又係時候落山啦；而家先出現藍天，好似遲左少少bor...




穿過一片樹林，一轉眼就落到山




落左纜車，石卡雪山之旅正式完成；冬天既石卡雪山係一個玩雪既好地方，雪又厚又靚，想點玩都得，雲南我最期待最鐘意既地方就係呢道啦，真係冇來錯架




而家又咁好太陽既！最後影多兩張相就開開心心返去香格里拉




要用到冰鏈！！


穿過雪地先可以返到去；係雪地上行車感覺上好似好危機，成日都諗部車會唔會停唔到又或者搧左出馬路，不過我地呢位司機大哥揸車好穩定冇出現呢啲問題


去到市中心一個地方落車


有太陽曬住既路面就冇問題，但冇太陽曬到既路面就係凹凸不平既冰面，行上去就好似溜冰一樣，一唔小心就會...仆低...我行得咁小心當然冇事啦


見到一間比較多人既米線小店，就入去開餐啦


我碗熱辣辣香噴噴既砂鍋米線，睇個樣就知正啦（第一次食砂鍋米線咋）


有配料可以加，但唔知係咩所以唔敢加


枱底有暖爐取暖，一路食都覺得好溫暖，但好驚如果唔小心踩左入去咪變炭燒豬腳！


食完野仲有時間，去左路邊街市望望




夠鐘就要出返去大馬路等車，準備離開香格里拉




香格里拉好多細細部既三輛車，幾得意


巴士站頂都結左冰


望住藍藍既天空，要同香格里拉講再見啦，唔知幾時先再有機會見到呢個咁乾淨，完全冇污染既藍天呢？


回去麗江路上，冇好似琴日咁一路都係積雪，行得好順暢




經過一個又一個雪山，越向前行雪都越來越少






行左冇幾耐，外面冇晒雪lu，代表距離麗江已經唔遠，我既冰雪之旅完滿結束








離開高山再次返到河邊




又來到長江啦，過左長江就正式進入麗江






係返到麗江之前先去一個地方，自稱係「長江第一灣」


望落去就係咁啦！灣呢灣呢？
同我係網上見到既「長江第一灣」差好遠bor，灣都見唔到，都唔知呢道係唔係呃人！不過算啦都冇對「長江第一灣」有任何期望，當係落車走動一下




路邊有個小小市集，但就冇一檔開門，證明呢道係冇人黎...




望多兩望就上車走人啦


路過拉市海


望到麗江啦，將會再次回到美麗既麗江古城


今晚就要上火車去昆明，先係古城搵地方晚餐；又再次去到食開個間餐廳，食到連餐廳職員都認得我地...


呢間餐廳座位又真係坐得幾舒服，所以已經食過幾次啦


同午餐一樣又係食砂鍋米線，都係好好食


最後一次返到木頭人客棧；整理好行李，同老闆老闆娘道別後，就上老闆娘幫我地預備好既車離開；係道住左咁耐，真係好鐘意呢間小小既客棧，不過就算再返去麗江都搵唔返木頭人客棧啦......


坐上車，路上會合另外兩位團友一齊去火車站，麗江之旅亦都結束啦；麗江係個咁靚既地方，唔怪得人人都咁嚮往；由古城環境，以至藍藍天空，好多好多都只可以係雲南﹑係麗江搵得到，所以麗江吸引到數以萬計遊人；遊人雖然不斷帶比古城大大小小衝擊，對比以前麗江古城可能已經變質，但冇變既係麗江古城由此至終都係美麗既麗江古城，我覺得古城依然非常吸引，不過如果想到麗江古城既話就越快越好啦，因為唔知將來麗江古城會變成點呢？