雲南大理﹑昆明6天遊 @ 2014 夏

< 雲南大理﹑昆明6天遊 >

今年上半年本來都無計劃過任何旅行，機緣巧合之下出現左今次雲南大理之旅^^事源三月時中國旅遊雜誌有個送機票活動，本來我都無諗住參加，直到月尾又收到宣傳電郵，咁岩當時係地鐵無聊就隨意打幾個字參加一下，估唔到過幾日就收到得獎通知，獎品係香港快運航空送出既來回昆明機票，最後就變成左呢個雲南大理之旅！四月頭已經知道有機票可以用，不過我一直都無諗住去，都唔知去到有咩好做，又唔係太想去，直到四月尾，諗諗下覺得無理由有飛機都唔坐掛？平時又少坐飛機，當係遊機河都好，所以就嘗試訂機票啦^^出發前大約兩星期訂機票，搞左幾日終於成功，價錢係Tax$471加Fare$40（唔係免費咩？我都唔知呢個係咩費用，不過40蚊就算啦唔去問啦），總共$511，未試過坐咁平既飛機！而今次旅程主要都係四圍行下hea下，洗錢既地方唔多，返到來香港計算一下雲南洗費時先知道原來用左咁少錢，如果唔計最後一日係昆明超級市場買手信比媽媽，只計機票、保險、食住等等其他開支，只係用左$14xx咋，而且仲係港幣，今次既洗費真係少呢，算係喜出望外，哈哈^^

我知道雲南有好多靚地方，但突然間要我去我都唔知 去邊道好，本來諗住係昆明hea兩日就走，但上次去雲南時已經感受到昆明實在太無聊啦，都無地方想去…之後又諗過近近地去昆明東川紅土地，聽聞紅土地五月 風景唔錯；但原來紅土地話就話係昆明範圍，距離就好遠，要坐幾個鐘車不特只，仲要每日得晨早一兩班車，見到咁煩都係唔去啦，我都係想去hea下唔想諗咁 多；最後諗到去大理hea下都好似唔錯，大理方便易去又近昆明，最重要係唔洗煩咁多搭車問題，隨時上車都可以，所以就決定去大理一轉^^出發前個段時間比較忙，我都無咩時間去研究行程，大約諗好去邊，book好火車票同住宿，買好保險後安心等出發，大理我黎啦！！



雲南大理（雙廊﹑喜洲﹑古城）﹑昆明6天行程：
Day 1： 香港 - 昆明 - 大理
Day 2： 大理。雙廊
Day 3： 大理。雙廊 - 喜洲
Day 4： 大理。喜洲 - 古城
Day 5： 大理。古城
Day 6： 大理 - 昆明 - 香港
     雙廊住宿：榕驛國際青年旅舍
     喜洲住宿：芒果小屋
     古城住宿：慢吧國際青年旅舍

12-5-2014

第一天

上午5:30，坐上頭班巴士去機埸，真係好早丫！上車時仲係天黑都未天光；咁早出發係想去探一位係機場工作既朋友，不過最後因為唔識路所以搵唔到...唔緊要啦有緣一定會再見既^^


去到機埸首先去check in，早啲去就可以霸到最鐘意既窗口位^^check in時職員突然問我呢張係唔係staff飛？心諗係就好啦，你間公司都唔請我...


咁早去到機場又搵唔到朋友，就係機場入面四圍參觀下，以前好少搭飛機，都未有機會比我參觀一下呢個咁靚既機場；就好似大鄉里出城由頭行到尾，再由尾行返上頭，不過都係搵唔到傳說中既萬寧，想買支水飲下都唔得，唯有係汽水機買支貴水出來


要坐接駁車出去上飛機；車上有好戲睇，旁邊有位乘客郁黎郁去撞到另一位乘客，比人撞當然會出聲啦，但撞人個位唔肯認錯，不斷話係個背囊唔小心撞到唔關佢事（背囊自已有手有腳識郁？），仲要連埋朋友四個人x返人地轉頭，正宗蛇鼠一窩，見佢地講埋啲歪理真係笑死人；呢件事仲未完，昆明落機個時見到佢地四個仲講緊呢個話題，唔係講足全程飛機咁痴線掛？


部車仔越迫越多人；之前新聞話機管局買錯車我諗就係呢部，又細又載得少人


坐到去好遠既地方，見到飛機可以上機啦


上次坐完HK Express，今次又係坐佢，佢就變成我搭得最多既航空公司，佢既機票真係好平好平好平


呢排香港天氣一直都唔好，日日落雨，好彩上機呢個時間冇雨咋，落雨既話未上機可能已經濕晒


準時上到飛機，坐返個靚位就等出發；呢班機好滿，上面坐左幾個旅行團，我同其中一個旅行團係唔同地方相遇過四次，真係好有緣


等左45分鐘，飛機順利起飛，暫時要同香港講再見
一個多小時之後，飛機飛到雲南上空，我又黎到雲南啦！天空真係好藍丫，雖然天氣報告話今個星期昆明大理都係多雲，但我相信雲南一定會好天既，今次都要繼續「在雲上看藍天」


上次去昆明時仲係用緊舊既巫家壩機場，今次已經係去新既長水機場啦；長水機場又大又靚，比起巫家壩機場好好好好好多


我只係得一個小背囊冇寄倉行李，唔洗等就可以直接出來，呢段時間只係得我坐既呢班國際航班到達，過關唔多人，好快就可以出到機場


出到來就要趕住坐車出市區！長水機場有地鐵有巴士，不過地鐵而家只係起到一半，坐到去半路要再轉車出市區，呢個方法係最平但又煩又要用最多時間，我就唔坐佢啦；而巴士就分空港快線同普通巴士，兩款就好似香港既A及E線，空港快線係快到啲﹑貴啲﹑多車啲；個時我唔知有普通巴士既存在所以就上左空港快線，係售票亭買飛就得，25蚊一位


空港快線有好多路線選擇，我坐2號線去總站錦江賓館，最近火車站


上到車見有少少餓就拎個蛋糕出來食，由於昆明海拔有大約千九米咁高，蛋糕都變得漲卜卜；食食下見到不準飲食既牌，即刻係開車前極速食晒冇比人發現偷食！巴士15分鐘一班，好快夠鐘就開車啦，車上只有大約十位乘客，不過部車咁多位有一個係要迫係我旁邊，害我全程抱住個背囊...車上有乘務員會介紹昆明，有咩問題都可以問佢，又會逐個問你去邊題醒你邊個站落車，又會咁好既；不過佢都會sell下酒店﹑旅行團既野，好彩只係講幾句唔係講好多


大約45分鐘到站落車，向前行一小段路就係火車站；昆明天氣非常好，陽光普照但又唔係太熱，好適合行街


好靚既藍天白雲^^昆明火車站保安嚴密，就算入去火車站對出廣場已經要經過安全撿查，入面好多持槍﹑長棍既特警巡邏，感覺好安全


入來火車站既目的係想拎定今晚去大理既車票；唔需要排隊，好快就係拎票櫃台拎到網上訂好既火車票，不過拎票過程有少少阻滯，事緣網上好多人話要用簡體字姓名先可以訂票，我就唔信架啦一於用繁體字訂睇下拎唔拎到，拎票時售票員應該發現到呢個問題，走左去後面問左兩個職員，見佢地應該都唔知點算，最後有人係入面拎左本大字典出來查字，查完之後就成功拎到飛，Yeah^^


由火車站北面正門，行左20分鐘，兜個大圈行到去火車站南面，成功搵到地鐵站入口，呢個地鐵站開左兩星期唔夠，地圖上未有顯示；天氣實在太好，我最怕就係曬太陽，行去地鐵站途中頂唔順啦，要著返件外套，戴返頂帽，搽好防曬再繼續上路


昆明1﹑2號線係4月30日先全線貫穿，距離今日唔夠兩星期，地鐵站又新又冇人，不過呢個自稱係昆明火車站既地鐵站咁唔方便都唔知邊個會去


七彩地鐵飛，好切合七彩雲南呢個主題


暫時1﹑2號線相通，由1號線坐到去2號線唔洗轉車，方便好多


地鐵上乘客唔多，好易就搵到個靚位；出面天氣越來越熱，相反地鐵車箱冷氣好舒服，有一種唔想落車既感覺；地鐵真係好快到，以前巴士要成個鐘車程，地鐵只係15分鐘咋，最衰而家好多地方都唔通地鐵，坐地鐵未算太方便




到達星耀路站落車，地鐵亦都由地底走到上地面




真係好好陽光！來到星耀路係想去官渡古鎮；以昆明黎講官渡古鎮都算係好冷門，我都未見過有朋友會走來呢道；我張機票其實係因為官渡古鎮而來，在公在私之下我都黎呢道睇睇啦


出到來古鎮就見唔到，新樓就見到好多；住既話呢道應該幾好住，環境靚交通方便，而且又冇市中心咁迫咁多人




我都唔係行得慢既人，由地鐵站行去古鎮都行左25分鐘，可想而知路程其實唔近；行行下見到間士多，諗都唔洗諗即刻買返支可樂降溫，2.5蚊一枝好平，飲過之後即刻成個人舒服晒


過左條河就係官渡古鎮啦，坐地鐵來真係唔方便


「官渡是滇文化的發祥地之一，古稱「蝸洞」，原是滇池東岸一片突起的小丘，3500年前就有人類在此活動聚居。南詔鳳迦異在此設置渡口，官紳往來不絕，吟詩作賦，陶然忘返，故名官渡。距今已有1000多年的歷史，至今仍較完整地保存了昆明地方傳統歷史文化風貌。」

正式進入官渡古鎮
不過而家諗起官渡古鎮就嬲，呢道係今次旅程唯一一個失敗既地方，好彩今次係自己去咋，如果同朋友去既話就累街坊！


古鎮其中一個小小既入口有一座「凌雲閣」，經過凌雲閣就正式進入古鎮


上面有動物bor，諗起故宮都有好多呢種裝置係屋頂之上


望入去古鎮，有種奇怪感覺，入面都唔似一個古鎮


古鎮既建築尚且可以話係「古」，不過街上全部都開滿晒時裝店、理型屋，仲有好多潮男潮女係街上拉客，當時我真係想問下自己係唔係去錯左地方？有冇搞錯丫同我想象中既古鎮差咁遠囉，做咩個古鎮係咁既樣架？






我都冇點影相，因為冇野好睇冇野好影


好快就行到去古鎮最重要既地方「妙湛寺」同「妙湛寺雙塔」；而家見到既妙湛寺1325年已經建成，有成700年歷史




明明呢道係妙湛寺，點解會係少林寺？
原來2008年時少林寺接管左妙湛寺同古鎮其他幾間寺廟，變成「官渡少林寺」﹑「昆明少林武術職業學校」，成為第二十幾間少林寺分店；而家少林寺竟然係集團經營咁厲害！


少林寺係可以入去參觀，但當時天氣熱到唔想郁，而且又覺得昆明都有少林寺好似假假地，入去都唔知會唔會中伏，所以就冇入去，後來先知道呢道係少林寺其中一間分店，唔算係假...


少林寺牌匾後面紅色既就係妙湛寺牌匾，不過已經比前面既少林寺遮住左啦；一間有成700歷史年既寺廟都係要屈服係強權之下，唉...


十三層高既妙湛寺雙塔




妙湛寺對出有一座古戲台




再對出就係「妙湛寺金剛塔」；妙湛寺金剛塔係中國現存歷史最長既金剛塔，亦都係中國唯一一座全部用砂石砌成既古塔；金剛塔有好多佛教特色設計，不過我就唔識欣賞，當時亦都冇心情欣賞...




呢條街終於有返少少古鎮既感覺


我覺得呢個畫面好溫馨，所以影低左^^兩個人可以一起互相撐扶走到老，真係一件又溫馨又幸福既事，唔知有幾多人可以做得到呢？


來到古鎮門口啦


由下面望返上去


見到地圖顯示我已經行到街尾，當時諗呢個古鎮會唔會搵笨左啲，得咁細地方學人叫古鎮？難得我山長水遠去到就係睇啲咁既野？所以如果有人問我我一直都話官渡古鎮係冇野好睇！直到個幾月後寫遊記既呢刻發現我一路都係怪錯左官渡古鎮！




成件事就係因為呢張地圖出錯，好心就唔好放啲錯野係道呃人啦
地圖上顯示我而家係左邊黃色圈遊客中心旁邊，當時我信以為真，見行到街尾就走人啦，但岩岩我先發現原來我當時位置係右下角先岩！即係話地圖左邊古鎮大部份地方都冇去過！都唔知邊個玩野放張假地圖出來呃人！不過又唔怪得晒人地，如果自己睇清楚地圖就唔會出現呢個問題，如果有預先睇定官渡古鎮既資料都唔會搞成咁！經過今次我相信以後都唔會重複呢個錯誤，第日睇地圖一定會小心啲！


當以為行完就再次入返去古鎮，而家又熱又唔知想點，沿路行返去走人算




如果係呢道轉左就可以去到官渡古鎮主要既地方，但當時已經唔想再四圍行，跟住黎既路轉右走人


係呢個失望既時候，遇到官渡古鎮其中一種最出名既小食「官渡粑粑」


呢間眼鏡粑粑係官渡古鎮最出名既一間，今日午餐只係食左一個雪芳蛋糕咋，已經有少少餓，美食當前緊係去買返個品嚐下啦，呢個粑粑算係來到雲南第一樣品嚐既地道美食


好多大大個既粑粑！睇落同以前食過既麗江粑粑好唔同，官渡粑粑好厚，就好似一個放大左既燒餅，食一個就等如食左好多個燒餅，而且價錢好平只賣2.5蚊，真係平靚正




眼鏡粑粑有四款味道，我就揀左玫瑰豆沙；粑粑睇個款好似唔太好食bor？


拎上手時熱辣辣，唔理咁多食左先算；一食落口真係好驚喜，新鮮既粑粑包含住玫瑰花香豆沙，又有玫瑰味又有豆沙味，都唔知點可以整到咁好食！而且皮薄餡靚，唔似香港個啲空心麵包咁得個樣，入面既豆沙係多到溜出來，總之就好好食啦！食一個就食飽左啦，想食多個都食落到lu，本來想買多個之後慢慢食，不過都係算啦，粑粑要新鮮先好食，留返個好印象係心中就夠啦


食完粑粑就走人啦，官渡美食除左粑粑，仲有米線同餌絲，之前我有諗過想係呢道食官渡米線，但一間米線店都見唔到，想食都冇得食；而家睇返地圖先知自己起碼有五分四古鎮地方都未去過，連走馬看花都冇所以唔可以話自己到過官渡古鎮...算啦，當自己冇去過會開心啲...


經過一個長長既市集向地鐵站方向前進，唔知昆明人係唔係好鐘意食薯仔，一街都係賣炸薯仔，其實我都超級鐘意食薯仔，只不過唔敢亂係街邊食野...


出返到河邊lu


大約20分鐘終於返到地鐵站，天氣已經冇中午咁熱，舒服好多；最慘既係無論天氣幾熱都唔可以除低件外套，因為外套係用來擋太陽架，我唔可以曬到變燒豬！




好快就有車到啦，衝上車涼下冷氣先


都係地鐵最舒服，又有冷氣座位又正，係出面行到咁累終於有位可以坐低，好感動




地鐵實在太正啦，曾經有一刻想坐耐啲唔落車，不過諗還諗最後都冇咁做，去到東風廣場站就落車啦