香格里拉。虎跳峽

< 北京﹑西安﹑成都﹑雲南23天遊 >

第二十天

今日終於到可以順利出發去香格里拉啦，等左咁多日總算係冇白費；我講既香格里拉當然唔係香港都有既香格里拉酒店，而係小說《消失的地平線》裡面描述既一個「永恆和平寧靜的土地」；藏語之中香格里拉意思係「心中的日月」，亦即係藏民心目中一個最理想既生活環境，為左呢個咁靚既地方，我無論等幾耐都要去！而家就向香格里拉（原名係迪慶）出發！


一朝早咩住小背囊，向南門方向出發，旅遊巴已經係南門等住我啦，好彩我係住南門呢邊所以好快就行到；一早麗江古城人影都唔多個，望上天空萬里無雲，相信今日一定有好天氣，暫時要同古城講再見


車開左冇耐，開始穿越一座座大山，小小既車就係大山之中轉來轉去；要由海拔二千三百米既麗江爬上海拔超過三千三百米既香格里拉唔係一件容易既事，需要係迂迴山路之中行駛，車程要大約四個鐘；就咁睇四個鐘以為好耐，但只要望住沿途風景就完全唔覺得耐，因為風景實在太靚啦


經過一個叫雄古觀景台既地方，可以落車走動一下，又可以睇風景


右邊就係日日都見到既玉龍雪山，中間係哈巴雪山，左邊既我都唔知係咩雪山（左邊既山已經位於香格里拉，今日天氣好望到好遠）


zoom近啲睇先


兩座大山之中就係金沙江，亦即係我地平時叫既長江




高山之上都有唔少人住bor，有田地有屋




大山懷抱之中，好好享受美麗風光




係觀景台有間廟，有專人負責介紹！呢間係咩廟就唔知啦，只係知佢會叫你做咩做咩，又叫係摸呢個，又叫你做個個，最後九成九當然係收你錢啦！我都冇佢咁好氣，出去睇下風景好過，但好多團友係入面聽左好耐，佢地最後發生咩事就唔知啦，哈哈^^


返到馬路上車，繼續向香格里拉進發


陪左我地兩日既小巴


離開觀景台，汽車由山上落到河邊，沿金沙江向北行


跨越金沙江後，好快就會到下一個目的地


就係呢道啦--虎跳峽


「虎跳峽，中國最深的峽谷之一。在雲南省玉龍納西族自治縣龍蟠鄉東北。峽谷長16公里，南岸玉龍雪山主峰海拔5596米，北岸中甸雪山海拔5,396米，中間江流寬僅30～60公尺。虎跳峽的上峽口海拔1,800米，下峽口海拔1,630米，兩岸山嶺和江面相差2,500～3,000米，谷坡陡峭，蔚為壯觀。江流在峽內連續下跌7個陡坎，落差170米，水勢洶湧，聲聞數里，為世界上最深的大峽谷之一。」



虎跳峽有16公里咁長，分為上虎跳﹑中虎跳﹑下虎跳，而我到呢個就係最易去最輕鬆既上虎跳；上虎跳仲有細分為麗江上虎跳同香格里拉上虎跳景區，今次好好彩去左兩個之中最輕鬆既麗江上虎跳景區^^至於中虎跳下虎跳，一般旅行團就唔會去架啦，因為要行山路又上又落，唔係個個人都咁好體力應付，所以都係上虎跳最適合我呢啲懶人


經過一堆小食檔就正式入場；不過...虎跳峽呢道唔承認香港學生證，想慳返少少入場費都唔得，好彩入場費只係五十蚊唔係大貴




左邊係香格里拉哈巴雪山，右邊係麗江玉龍雪山，兩座五千幾米高既高山之間小小既峽谷就係虎跳峽，當時導遊話虎跳峽係世界最深既幾個峽谷之一，同美國大峽谷呢啲峽谷齊名：事實係點就冇去考究，不過我知道虎跳峽計算高度係由最高既玉龍雪山山頂計起，而唔係計算而家可見既峽谷高度，所以除左坐飛機之外係好難見到虎跳峽有三千米落差




呢個位置仲未可以見到最出名既虎跳石，要行大約2公里棧道先到；呢條棧道好好行，全條都係平路完全冇難度，行下影下相唔覺悶，所以我話呢道上虎跳真係最輕鬆


好快就進入峽谷之中




沿路都係好靚既平路


棧道由山中間開挖出來，睇落有少少驚險，都係行快啲先


有啲地方原本係山邊棧道，但就封左要改行隧道，可能某啲路段太危險；見到地下有好多碎石我估係由山上跌落黎，所以行隧道係安全啲


出左隧道就繼續沿江邊行，咁樣凹左入去就唔怕比石頭扑中啦


對面有山泥傾瀉？


冬天水流少，河都窄左好多，夏天水量足一定好澎湃


過左橋就差唔多到啦


前少少有個位河水特別急？




呢道就係今次既目的地，上虎跳峽既虎跳石


「上虎跳是峽谷中最窄的一段，離公路邊的虎跳峽鎮9公里，其江心雄踞一塊巨石，橫臥中流，如一道跌瀑高坎陡立眼前，把激流一分為二，驚濤震天。傳說曾有一猛虎借江心這塊巨石，從玉龍雪山一側，一躍而跳到哈巴雪山，故此石取名虎跳石。」

中間呢塊就係傳說中既虎跳石
石頭係正河中間，就咁睇石頭距離兩岸好遠，正常老虎應該就唔可能跳得過對岸；但傳說為虎跳峽增添左令人幻想既空間，可能將來真係有人影到老虎係虎跳石之上跳過都唔定呢


而家係冬天枯水期，虎跳峽流水依然兇湧澎湃，發出巨大聲音，夏天來到既話流水會更強，感覺一定更強烈


有人會覺得要辛辛苦苦去到中虎跳先叫欣賞到虎跳峽美景，但我覺得輕輕鬆鬆來到上虎跳一樣可以睇到美景，睇到咁澎湃既流水我已經好滿足啦


平凡人到此一遊


行返上天橋就可以沿路去返出口


望到對面屬於香格里拉既虎跳峽景區，有一條長長既樓梯由山上伸到河邊，好好彩今次唔係去左對面，落山個時就舒服，要行返上去就唔好玩啦...




麗江呢邊就舒舒服服沿河邊行返到出口










出來比入去行得更快，好快就出到來啦




虎跳峽有碼頭？可以坐船去邊道呢？


係停車場搵返自己部車，等埋其他團友就可以離開


下一站就係去到路邊一個不知明地方午餐


唔知係咩地方唔緊要，最重要係知道呢個係靚地方；今餐就對住呢個咁靚既雪山開餐，唔好睇呢個雪山冇咩雪，其實佢就係麗江日日都見到既玉龍雪山，只不過係換左另一個角度去觀賞，原來玉龍雪山唔只得一個山峰，係由好多個山峰組成架


風景唔睇住，食飯重要啲；大家都唔知叫咩食好，最後幾個人坐埋一齊夾分叫一個二百蚊既套餐，佢比咩就食咩大家都唔洗煩；呢餐不過不失，可以食得飽


飯店就係開係咩都冇既山邊


就係因為咩都冇所以風景特別靚，一面面向玉龍雪山，另一面係金沙江靚景




食完就上車繼續向香格里拉進發；行左冇幾耐窗外景色突然有好大變化，出面所有地方都係雪，馬路變成凹凸不平既冰面，車速要減到好慢好慢




沿途景色好壯觀，一路都係大山之中行走，可惜我坐係左邊影唔到相，坐右邊就正啦，所以去香格里拉最好就係坐右邊座位，會開心好多


一路都係好靚既雪景
有人話坐車去香格里拉最好唔好訓教，因為訓左會比較大機會出現高山反應；但睇住咁靚既風景又點捨得訓教呢，當然要好好欣賞啦，仲會越睇越精神架






一路都係雪地，前面有鏟雪車來回開路，唔通岩岩又落完大雪？








去到一個叫「小中甸牧場」既地方可以落車休息一下，又可以慢慢觀賞美景




話明係牧場就當然有馬仔啦；牧場春天會開滿紅色紫色杜鵑花，夏天會有黃色小花，秋天又會開滿紅色既花，而冬天就咩都冇，所以野都被大雪覆蓋；今次我黎呢道既目的就係睇雪，所以仲開心啦，哈哈^^


藍藍既天空配合雪白純潔既白雪，係一個完美配搭；天空好似突然變得好近，伸手就可以摸到...




啲雪睇落好似綿花咁鬆軟，好想一腳踩落去




踩左落去啦^^呢個位算淺，出面既雪有膝頭咁高，係好難好難行到路架


最後影多張相就要上車繼續前進啦，距離香格里拉仲有三十多公里，一個傳說中既世外桃園好快就可以去到啦


車繼續係雪地上慢慢向前行，越來越接近呢個我期待左好耐既地方，我係麗江等左咁多日就係為左呢一日咋，希望香格里拉唔好令我失望啦（岩岩睇到牧場雪景我已經非常開心，我相信呢兩日短短既旅程一定好滿意）






條路乾晒，我諗就快到目的地啦


到第二十日，終於去到香格里拉啦！首先去到月光廣場


月光廣場對上龜山公園之上有一個世界最大既轉經筒，係香格里拉呢道第一次感受到藏族文化，旁邊既建築﹑佈置都帶有藏族氣息


月光廣場邊有一間博物館，但入面只係一個呃人睇藏醫既地方，唔入去唔洗煩


快啲行上山睇個大轉經筒
香格里拉位於三千三百米高既高原之上，唔想出現高原反應上樓梯最好慢慢上，我都係慢慢碌上去


全個香格里拉都係平房


慢慢行，終於去到呢個高21米，重60噸既轉經筒旁邊


所有轉經筒外面都刻有六字真言，裡面刻有經文；藏傳佛教認爲，唸六字真言越多就代表對佛越虔誠，而轉經筒每轉一個圈就代表將筒內經文唸一次，所以係西藏或者藏族地方會見到藏族人不停轉不停轉；呢個大轉經筒入面一定記載左好多經文，我都轉返幾個圈當唸左好多經先，不過一個人係轉唔郁呢個超級大轉經筒，要叫其他朋友仔幫手一齊轉


轉經筒之下就係被大雪覆蓋既獨克宗古城，可惜當時冇去，而家古城被大火燒毀想去都冇得去啦...可惜可惜......






望向月光廣場


係山上轉左轉經筒又睇完風景，係時候離開啦








最後望多一眼呢個美景就上車繼續去下一個地方


好快就去到松贊林寺；松贊林寺係雲南地區最大既藏傳佛教寺廟，遠睇松贊林寺好似布達拉宮，所以有「小布達拉宮」稱號；暫時去唔到拉薩布達拉宮，黎呢道睇下小布達拉宮都好過冇啦


要先去售票處買票，再轉車去松贊林寺


好快就行到去售票處，但售票處職員話就快夠鐘關門，叫我地唔好入去！咁遠路來到門口都冇得入！好彩我對寺廟興趣唔係咁大，唔係因為松贊林寺先來香格里拉，所以都冇咩感覺，唔入去咪唔入去囉！但最後連松贊林寺係咩樣都未見到就要走啦......


冇得睇就算啦，係個牌前面影張相當去左（個雪人成個外星人咁）


冇得睇就坐車走人啦，唔知係唔係因為落雪所以一路車速都比較慢，結果就去唔切松贊林寺...算啦我來香格里拉係想睇雪睇雪山，見到一地都係雪已經好興奮，呢次係我第一次去到會積雪既城市，Yeah！




時間唔早啦但仲係日頭，我地先坐車去酒店；香格里拉位置比香港西好多，日落會比較遲，所以會多左日頭時間玩，當然日出都一樣會遲好多，但就岩晒我呢啲遲訓遲起身既懶人


去到酒店放低行李（其實都冇野放），就同幾個團友一齊出去食晚餐；附近可以選擇開餐既地方唔多，見有餐廳就入去，隨意點左幾個菜，六個人五餸一湯又完成一個晚餐


食飽就返去酒店休息，但仲係日頭時間算係早；如果當時可以醒少少就自己搭車去古城行下啦，跟住條馬路直行就到，但個時咩都唔識，結果係戇居居返左酒店冇野做...咁就浪費左一個去古城既好機會......


夜晚可以去睇歌舞表演，有團友選擇唔去，不過大部分都有去，雖然我對呢啲表演完全冇興趣，但既然唔洗錢出去行下都好過係酒店訓教，跟大隊出發


去到一個咁既地方


有青棵酒酥油茶招待，但我又唔飲酒又唔飲奶，唔鐘意呢兩樣野，叫做試過就算


大家都好落力唱歌跳舞，似係表演藏族舞蹈，最後仲邀請大家上台一齊玩








睇完就返酒店lu；呢道可以話係全個旅程住得最高級既地方，亦係唯一一晚住酒店，呢晚當然住得好舒服啦




夜晚冇沖涼就訓覺啦，大家都話去到高原唔好即時洗頭沖涼，因為會容易引起高原反應；但我覺得係麗江住左咁耐已經適應晒高原環境，唔擔心有咩高原反應lu，明天可以安心上雪山玩