< 福建土樓4天遊 >
第三天（續）
午餐過後繼續睇土樓，去到一個比較冷門既地方「南溪土樓群」，呢邊唔似之前振成樓個邊咁熱鬧，除左我地之外其他遊客一隻手數得晒，環境寧靜舒服
南溪土樓群有好多土樓，方又有圓又有
首先去到「衍香樓」，「繁衍子孫昌盛發達，書香門第世代流傳」，個名又改得幾靚
衍香樓唔似之前去過既土樓統一收費，佢屬於私人性質，由樓主自己收費私人開放參觀，當時樓主收費10蚊一位，平平地就入去睇下
土樓中間都有建築
可以上樓隨意參觀；土樓入面住左好多居民，算係比較原汁原味
再去其他地方參觀；河入面竟然有一家外國人玩水
前面係被戰火損毀既「立本樓」
只係得返外牆，入面咩都冇
繼續四圍行
「環極樓」係一座比較出名既土樓，已經睇到悶冇再入去參觀lu
睇完土樓後上車去到今晚住既地方，我都唔知係邊道，只知佢係永定一條鄉村，亦都係包車師傅屋企，師傅好多屋企人都住呢道
師傅屋企係一座小型方形土樓，好平凡好普通理論上遊客唔會黎呢道，今日可以體驗到真真正正既土樓生活
土樓房間就係咁簡單，唔好諗有咩設施，廁所要係地下先有，當地人就係咁生活
外面環境好舒服
放低行李後出去市區（應該係鎮仔）搵食
先去街市買野，黎街市唔係想買菜，而係想買煙花
成功係士多買到
去左一間小餐廳食晚餐，都係食菜多，鄉村蔬菜就最新鮮
食完飯時間仲好早，有人提意去唱K，咁就去左lu...我一向都對卡拉OK冇興趣，只係陪大家坐下咋...
返到去土樓對出既空地，煙花出場！買左一大堆盡情燒晒佢！好多年冇玩過煙花啦！
今個晚上，係我現時為只見過最靚既星空，比富士山頂既星空更靚；全個天都係星星，就好似全天空都發光一樣，我都唔知可以點形容，對我黎講好震撼！可惜當時唔識點影星，星空只可以留係心中
第四天
一早起身早餐都未有時間食，要出發去火車站搭火車
係永定街頭落一落車買早餐，再繼續去火車站
包車師傅幫我地預先買好火車飛，同佢分別後入去等車啦；今次遇到一個好好既師傅，大家都係後生仔又玩得又傾得，而且一路都按我地要求車我地去玩，令今次旅程玩得特別開心
由永定返深圳行車時間都係日頭，咁坐硬座算啦，一班人一齊玩時間過得好快
大埔
返到深圳，土樓小旅行完滿結束
連續睇左兩日土樓其實都睇到悶，不過冇所謂啦一班人嘻嘻哈哈一樣玩得好開心；土樓係一個好特別既建築，值得大家花小小時間去參觀，由其而家交通比以前方便得多，坐和諧號舒舒服服就去得到，班次又多又唔洗坐舊式火車咁耐咁辛苦；住土樓都係一個好特別既體驗，好多人話土樓冬暖夏涼，不過我覺得夏天去就要考慮清楚，傳統土樓係冇冷氣，天氣熱難啲訓得著架，而且又冇私人廁所，唔知大家可唔可以接受到呢？
PS.呢篇原本爛左尾既遊記終於係今日（二零一六年十月九日）完成，雖然遲左足足一年，不過遲到都好過冇到啦，總算係完成左，Yeah！
PS.馮兄唔好話我爛尾啦
沒有留言:
發佈留言