台南。孔廟﹑神龍街﹑花園夜市

< 台南﹑阿里山﹑高雄5天遊 >

第一天（續）

今日一早就黎到台灣，去到台南都仲有好多時間玩，行完赤崁樓林百貨，又食過擔仔麵，時間仲係好早，要繼續台南旅程


由林百貨個邊起程，慢慢行20分鐘去到孔廟


孔廟對出有個花園，環境都幾靚，就係呢道先隨意行行，暫時唔正式入去孔廟住










我都未食過好似頭先咁細碗既擔仔麵，食完同冇食冇分別，所以而家都係去搵下有冇咩野好食；向台灣朋友問問附近食咩好，佢推薦去孔廟旁邊既府中街，亦即係孔廟商圈位置

府中街就係呢條啦


話就話係商圈，開頭我以為係好多百貨公司，不過呢道其實係一條有特色既老街，賣一啲特色物品同餐飲之類；朋友推薦我係呢道食炒泡麵（炒公仔麵），不過我以前做茶餐廳時食得太多啦...台灣應該唔係好多地方食到炒公仔麵，府中街呢間好出名，好多台灣人會專程黎食


平日黎到好多店鋪都冇開門，條街好冷清


朋友推薦我食府中街呢間黑輪，不過冇開門...佢要星期五六日先開...（我一路都唔知黑輪係咩，返到香港先知黑輪原來就係關東煮）


行出大街再搵野食


跟住朋友指示去到呢間專門食肉圓既鋪頭，肉圓係台灣應該好出名，不過我未聽過更加未食過，所以都唔知係咩黎，咁要試一下


呢間友誠肉圓（定係肉丸？）係老字號，入面好大，我就冇入去食買左外賣出黎嘆


肉圓就係咁啦，唔識點形容


加啲汁上去就可以食，入面有大大隻蝦，味道好特別唔識形容，值得試試


食完之後穿過府中街行去另一邊


朋友推薦我試試呢間台南老字號克林台包






當中最出名就係呢個「八寶肉包」，要NT28一個


又真係幾好食既，哈哈


呢道有間好出名既窄門咖啡，佢道門真係好窄，一過唔留神係門口行過就見唔到


好彩我仲入到去




見到門口貼住呢張紙唔敢上去參觀，算啦...


食飽左就正式去返孔廟參觀


如果想入廟參觀要比入埸費，正價NT50，今日特價所有人都係NT25；其實係出面都望到入去裡面，知道冇咩野特別好睇，見入埸費咁平只係幾蚊就入去望望


台南孔廟係明朝時期已經興建，係台灣第一間孔子廟，之後亦曾經成為學校，所以門口寫住「全臺首學」


孔廟大殿






入面有小小資料介紹孔廟，亦有小小展品展出








可能時間比較晏，差唔多五點啦，入面人唔多都幾舒服，感覺上台南好少人，無論係呢道定係街道上人都非常小，行得好舒服




大家只可以係側門出入，正門係唔可以亂行架


出返來出面公園，環境都係咁舒服，有時間係道hea下都唔錯


離開孔廟就行返去酒店check in順便休息一下，途經供奉延平王鄭成功既鄭成功祖廟，係門口望左一望就走，冇特別入去參觀，頭先入過孔廟後對廟覺得悶悶地唔想再睇lu...（其實都唔係悶悶地，孔廟同赤崁樓比我既感覺真係好悶...）




鄭成功同媽媽董氏（兩個都好圓潤？）


鄭成功祖廟旁邊仲有一間三官廟，都係冇入去睇




天就黑，快啲返去酒店休息lu


六點半天已經黑晒，我都係時候出動


行到去台南其中一條保存得最完好既老街「神龍街」；清朝時神龍街曾經係台南最熱鬧既街道，而家建築依然保留落黎，變成一條藝術街




夜晚好多店鋪都冇開門，都冇咩好睇




神龍街冇咩好行，行左一圈好快就去今晚晚餐既地方「花園夜市」；由神龍街呢邊去花園夜市係冇巴士到，咁唯有搭的士啦，但係台南搭的士都唔係一件易既事，因為係台南平時都唔多見有的士，係想坐既時候就更加難搵，今次就一路係海安路行一路搵，用左20分鐘先見到一部冇人既的士成功上到車；台南的士收費唔費，起標收費NT80，唔洗跳標就去到花園夜市


花園夜市係台南最大夜市，總共有成400個攤位，離遠都見到一大片旗海；花園夜市曾經係網路投票上比台灣人選為「心目中最受歡迎的夜市」冠軍，總之去台南就一定要去去花園夜市


我既台南朋友都出到黎搵我啦，今次有佢帶我係夜市搵野食
先係夜市行一圈睇下有咩正野，除左有野食之外，仲有好多遊戲攤位，又有好多賣衣物既攤位；買野個啲我就冇興趣，我對台灣美食有興趣啲




夜市已經好大，不過都係人山人海，日頭係台南市區人影都唔見多個，估唔到咁多人黎晒呢道




炸皮蛋燒係咩黎既呢？係香港都未見過


九龍城香港茶？又真係有奶茶檸茶飲bor


周圍都有港式奶茶


雞比包飯


正式開餐啦！首先試試台南既臭豆腐，同香港既臭豆腐有冇分別呢？


呢個臭豆腐唔似香港臭豆腐咁有臭味，但食落都係咁滑，幾好食架


跟住就試下呢檔好出名既滷味




買左滷豆腐同滷蛋食


跟住食左呢個，唔記得係咩啦，第一次食覺得都幾得意又好食


又試下台灣章魚燒同香港章魚燒有咩分別！其實冇咩分別




再試下咖哩魚蛋同香港有冇分別先？


呢道魚蛋可以配其他野一齊食，平時香港好難先見到鴨血就係呢道食下先


魚蛋同香港就冇分別啦，鴨血配埋啲湯真係好好食，好鐘意呢個


黎到台灣緊係要食炸雞扒


仲以為呢個好似豪大大咁脆卜卜，但原來佢好似KFC雞扒咁好厚肉，而且又大塊飽到食唔晒，認輸lu


食完野飲返杯台南好出名既冬瓜茶下下火




行到九點已經飽到食唔落，都係時候返去啦，今日已經早起身聽日都一樣要早起，今晚早啲休息好啲


夜市門口就有好多的士，直接坐的士返酒店，車費只係NT100，又快又方便；台南搭的士已經難，搭巴士更難，因為班次少路線又唔多，都係坐的士比較好


今次台南呢間富朗飯店可以話係又平又靚，雙人房連早餐都係HKD$306一晚


房間同張床都好大架，呢晚係台灣旅程住得最平既一晚，但間房反而係最大既一間，哈哈




廁所都又大又乾淨，今次冇揀錯


今朝未夠四點就起身，到而家已經玩足成日啦，都係早啲休息期待明天阿里山旅程^^聽日要九點前去到嘉義再轉火車上阿里山，即係話又要早起啦，晚安啦！