台南。赤崁樓﹑林百貨﹑度小月

< 台南﹑阿里山﹑高雄5天遊 >

第一天

台灣小旅行終於都出發啦，今日目的地係台南，會先到高雄再轉火車；今次坐朝早8點鐘飛機，半夜4點就起身準備出發，坐N車去機場，旅行咁重要點可以遲到呢！


未夠6點就去到機場，咁早人唔多好快完成chenk in，然後即刻入去搵地方食早餐




出面唔多人但入面啲餐廳就好多人，差唔多間間都排長龍，本來想食香港唯一一間分店既大力水手炸雞都食唔成，真係好多人！


間間都好多人，唯獨呢間最少人，唯有搵呢間最少人排既「味X拉麵」食啦，不過自從幾年前食過一次之後都冇再食第二次，因為真係唔好食，仲哀過自己煮幾蚊包個啲...


呢碗麵咁多年都冇進步過，唔怪得咁少人排隊啦，麵又唔掂湯底又唔掂塊肉又唔掂，又貴又唔好食，咁就百幾蚊...係個餃子正常小小...


食飽就出發，期待台灣美食仲好


今次坐港龍航空，機票比想像中平，來回連稅都唔洗一千蚊！又會可以咁平既！


Online check in時揀左第一行座位，比其他位係闊少少不過就要面壁思過，呢個位都有好處既，可以快啲落機，我因為咁所以揀左呢個位




香港byebye


大帽山係雲之中突左出來，如果今日上山頂就可以見到好靚既雲海，希望下次上山時都會見到




好多年都未食過飛機餐，唔知係咩呢？


原來係中式早餐
頭先食完拉麵仲好飽，不過都係食晒佢先，哈哈^^


個零鐘機程就飛到高雄，話咁快就到


坐第一行好快落得機，好快完成過關手續順利入境台灣


出到接機大堂第一時間就係買電話卡，一行出來就見到中華電信櫃位，另一邊有大哥大，旁邊好似仲有遠傳


睇過中華電信同大哥大5日無限上網都係NT$300，我就隨意揀左中華電信，冇人排隧唔洗5分鐘就買到卡；我申請既Plan B寫住有5日上網，不過實際唔知點解係多一日有6日無限上網


買完電話卡就到旁邊ATM拎錢，成功係右邊台北富邦銀行呢部拎到台幣出來，唔怕冇錢洗啦（想係香港以外地方提款一定要先開通境外提款服務）


拎好錢就行出去坐車，捷運站入口係客運大樓旁邊




列車上人唔多，原來高雄捷運有5種語言廣播，好誇張


今次就係咩呢個大背囊去台灣，好耐都冇用過


係捷運入面試上網，速度唔慢丫，有42.1Mpbs！速度仲快過係香港地鐵上網！


坐捷運去到左營站；正常轉火車應該去高雄車站先岩，不過我要拎野比朋友所以就坐多幾個站黎到呢道


左營站亦係高鐵站，但去台南咁近冇咩必要坐高鐵，坐高鐵既話去到仲要轉車入市區可能仲要用更多時間


唔坐高鐵唔緊要，呢道仲有台鐵可以坐，買好飛之後好似坐地鐵咁自己入閘落月台就得




電話check到下一班係區間車，咁就買區間車車票，去台南車費唔貴，只要NT$56，即係大約14蚊港幣


搵岩月台等車到


區間車到啦，車頭又幾型bor




車箱唔多人，坐位又舒服，行車又寧靜，呢程車坐得好舒服


行行下車突然有職員查飛，買左飛當然唔怕啦


沿路好多都係田園風光






好似熊仔餅隻熊？


大約40分鐘車程，去到今日既目的地台南啦






出發去酒店放低個大背囊再出去玩


係離開火車站之前先買定聽日去嘉義既車飛，聽朝就唔洗急住買飛


臺南車站1936年啟用，係國定古蹟黎架


原本book左住兩晚「鐵路大飯店」，即係火車站對出呢座，又平又近火車站，不過比台灣朋友嚇一嚇就cut左唔敢住，上網睇啲人講到好恐怖架，都係轉過另一間好啲！


轉左另一間遠小小既酒店，沿火車站對出大街行大約10分鐘就到，都算方便


就係呢間啦「富朗飯店」，就咁睇都OK靚，咁早未夠鐘攞房，先寄存個大背囊，咩個細背囊比去正式開始台南旅程






第一站去到台南一個重要古蹟「赤崁樓」，入場費NT$50


赤崁樓係咩黎呢？？！
赤崁樓作為台灣國定古蹟，當然有返咁上下歷史，赤崁樓前身係1653年荷治時期興建既歐式建築「普羅民遮城」，又叫「紅毛樓」（紅毛係當時台灣人對荷蘭人稱呼），曾經係全台灣統治中心，到後來清朝時歐式建築已經損毀，再改成而家見到既中式建築




樓前有鄭成功受降圖，表揚鄭成功打敗荷蘭人，從荷蘭人手上收復台灣




近睇赤崁樓




原本既普羅民遮城已經唔存在，而家只可以見到以前一啲遺跡






以前既赤崁樓係咁既樣，而家赤崁樓有兩座主建築，分別係海神廟同文昌閣


南面係海神廟，北面係文昌閣，入面都係一啲赤崁樓歷史介紹








當年赤崁樓既文物




中國傳統飛簷建築




可以上兩樓睇風景




赤崁樓前面有九座乾隆時期建造既石龜馱碑，由大南門城邊遷移過黎；傳說石龜係龍生九子之一，因可以負重而變成龜狀，所以又叫「龜碑」




小小花園風景


赤崁樓唔係好大，好快就行完lu，出發去下一個地方；赤崁樓感覺上都幾悶，本身自己都唔係好識台灣歷史，睇上去冇咩特別感覺，而且赤崁樓真係好細，入面冇咩野好睇，所以唔係話好吸引，不過入埸費咁平入去睇睇無妨，算值得到此一遊


離開赤崁樓，慢慢行15分鐘去到「林百貨」；林百貨座落係日治時期繁榮地段末廣町，當時曾經係台灣南北兩大百貨公司之一，1932年開幕時更係當時台南市最高建築


林百貨有南台灣第一部商用載人電梯，而家都保留住當年特色


上到天台見到電梯井，由窗口可以睇到電梯運作，不過今日欄住左冇得睇


林百貨俗稱「五層樓仔」，不過係五層樓之上仲有一層面積較細既六樓，所以呢道係有六層樓


另一個特色就係屋頂上有一間神社，係台灣唯一一間擁有頂樓神社既百貨公司


由頂樓向外望風景




林百貨除左做過百貨公司，亦曾經做過好多用途，2014年6月林百貨又重新開幕，變成一間文創百貨公司，不過賣既野好貴下，哈哈






係林百貨附近就有台南好出名既擔仔麵始創店「度小月」，既然黎到台南緊係要試試；呢間好似係佢既老店，陳設比較懷舊




呢道除左擔仔麵之外仲有其他野食，不過我只係叫擔仔麵算lu，其他野好貴


等開餐，發現到有超得意既鴨仔紙巾


擔仔麵出場，賣相都幾靚；一碗擔仔麵NT$50，感覺上唔係太貴，不過呢碗份量超細，一啖未必食得晒，不過大啖啲既話兩啖都可以食完，可想而知有幾細碗；呢碗擔仔麵好唔好食真係唔識講，只知道味道幾特別，只係細左啲...


好快就食完走人lu...可以睇到佢煮麵架


身為一個遊客去度小月食擔仔麵好正常，不過有位台南朋友就話其實佢地台南人想食擔仔麵係唔會去度小月，佢地覺得度小月只係一個遊客去既地方，貴之餘分量超細好唔抵食...哈哈，既然我都食左啦冇計啦，都只係食一次姐應該唔會再食第二次，叫做試過就得，哈哈^^