阿里山。沼平﹑神木

< 台南﹑阿里山﹑高雄5天遊 >

第三天（續）

阿里山有5個特色自然美景合稱為「阿里山五奇」，包括日出﹑雲海﹑晚霞﹑森林同鐵道，日出﹑雲海﹑晚霞今次就無緣見到，森林﹑鐵道都叫體驗過；阿里山國家森林遊樂區除左祝山之外，沼平﹑神木都有鐵道連接，今日繼續漫遊森林與鐵道


由祝山返到停車場，已經見到有大量旅行團進駐阿里山，平靜既阿里山即刻噪到拆天，此地不宜久留，要搵地方閃避




而家又咁好天！我住既青山別館有包早餐，不過就唔係旅館食，而係係一間叫松閣餐廳既地方食，而家首要任務要係九點之前搵到呢間餐廳，遲到就冇早餐食！


係最尾間鋪搵到佢啦




嘩...好多人，所有旅館住客都被安排到上層


叫做有得食自助早餐，見到賣相都唔會期望好食，但求可以維持生命




食完早餐就去7-11買定落山車飛，再返旅館check out，然後去火車站繼續阿里山旅程


今次坐火車去沼平，來回NT$80


去沼平火車大約半個鐘一班，去到即時買車飛就可以上車




唔係好多人


幾分鐘車程就到沼平車站




見火車冇人影下相先


火車頭係日本製造，有種好懷舊既味道






阿里山樹高過人，連電線杆都特別高




冇櫻花既櫻花老街




冇咩紅葉既秋天










好多人都會由沼平車站起步，經姐妹潭﹑神木步道，去到神木車站坐火車返阿里山車站，沿路由高向下行唔會覺得辛苦；出左沼平車站後大家就向住姐妹潭方向行去


沼平都有酒店


不論大人細路或老人家都係咁鐘意行路軌




轉入森林享受一下森林浴


以前阿里山係林場，將大量巨型紅檜砍伐，紅檜而家已所餘無幾，取而代之係種返一啲生長比較快既杉樹，杉樹睇落好幼但都生得好高






紅檜砍到得返個樹頭，可憐...






向姐妹潭行去




首先見到妹潭，唔睇都好啲一睇真係冇眼睇，一潭污水竟然係阿里山咁出名既姐妹潭，都唔知好嬲定好笑






冇眼睇走人


好彩姐潭都叫做正常小小，起碼唔會係污水先






水中倒影好清楚




睇完個潭繼續落山


好多似係未開既櫻花，仲有木蘭花






行到去一個熱鬧既地方，有好多商店，亦都有好多人






見到有超多人係道排隊，仲以為有咩特別野睇咁多人排，原來係啲旅行團係道等車




呢道有阿里山園區入面規模最大既寺廟「受鎮宮」










離開呢道，進入巨木群棧道，棧道穿過幾十棵巨大紅檜木之下，紅檜樹齡最少都一千幾百年，大既二千年都有，由下向上睇感覺到真係好高好高








紅檜配上編號，無論樹齡大或少，總之棵棵都又高又大




森林之中空氣特別清新










原來係行緊2號棧道


終於去到神木車站








阿里山之中曾經有一棵三千年既紅檜作為地標，稱為「阿里山神木」，神木車站因佢而名命，遊人坐火車上阿里山都會一睹佢風采，可惜神木始終挨唔住雷擊同大雨，最終都要倒下...我地只可以見到佢訓係地上咋






離開神木就要上山，要辛苦小小




呢個位冇雲海冇晚霞睇出去冇咩特別






去到慈雲禪寺，門口兩旁有好靚既銀杏樹，可能天氣未夠凍銀杏仲未好金黃








慈雲禪寺係一間日式寺廟，已經有差唔多一百年歷史












有間小小既博物館，入面有阿里山相關介紹






樹可以數年輪去計樹齡，八百幾年樹真係可以數到八百幾個年輪出黎




經過台灣最高學府香林小學，真係係最高架




三代木可以見到樹有3層，底層係第一代，第一代樹有1500年樹齡，枯死後上面生長出第二代，而家第三代仲生長緊




似象鼻？




呢道特別多人




二千歲巨木






由另一條巨木群棧道行返去神木車站










神木車站呢邊突然間大霧左好多




有啲霧先似仙境ma，朦朦朧朧覺得特別靚








就係神木車站坐車返去阿里山車站，用返頭先沼平個張車飛就得；呢道超多超多大陸旅行團坐車返去，等車時係咁迫差啲比班人由後面推落路軌，好彩有職員開聲教佢地排隊！上到車都唔好過，車已經迫爆人佢係仲要不停係車入面大叫，唔知佢地想點！




幾分鐘車程迫到返阿里山車站...星期六郵局冇開門，冇得買郵票（7-11好似有郵票賣，不過我唔敢問...）


去返郵局對面既山賓餐廳，今日終於有位啦


今朝買左下午3:40去嘉義既車飛，而家先兩點，可以慢慢食個飯先走


今次有四個餸，比起琴晚個餐今餐好食好多，而且更加平，記得呢餐唔洗四百蚊台幣，可以話係平靚正








最後清晒所有野


食飽冇野做出去散散步




行出左去大門口出面睇風景


唔知呢啲算唔算係雲海呢？風起雲湧，為呢個阿里山小旅程畫上句號










時間差唔多，行返入去準備坐車走啦；出黎一定要帶門票，經過收費站望一望就可以入返去




岩岩先爆出關東煮既負面新聞，唔敢食


今次就係搭呢部車落山，又大又舒服




上左車就落大雨，時間岩岩好，阿里山再見


巴士開得好快，用左2小時8分鐘就去到嘉義車站；阿里山有二千幾米高，巴士不停落山，足足落左個半鐘先落到平路，我應該係第一次咁短時間上落咁高既山


大約六點返到嘉義市，天都黑晒；今次坐車專登坐頭位睇風景，比我留意到原來路邊真係有好多檳榔賣架，不過檳榔西施就留意唔到，哈哈


到站落車


去到嘉義冇時間留係道玩lu，企係道望望之後就入去火車站坐車返台南，我既行程開始要回程啦




阿里山小旅行完成，今次睇唔到日出叫做有小小美中不足，不過我都係覺得阿里山好靚好好玩，好值得去！以前要買阿里山來回奮起湖既火車票太麻煩，令到好多人想買都買唔到，由其我地唔係台灣要買到既話更加難，不過而家有個好消息，由今個月1月14號開始火車飛可以係網上購買再用信用卡比錢（不過我未試過唔知work唔work呢！），咁就易買好多啦，但我相信要買到飛既話都要同好多人爭，所以想去阿里山既朋友就要加油啦！而且最好係買上山個程，坐火車上山係開心過坐落山架！