阿里山。祝山日出﹑國家森林遊樂區

< 台南﹑阿里山﹑高雄5天遊 >

第二天（續）

奮起湖之後，將會去今日另一個重點「阿里山國家森林遊樂區」，即係平時我地叫開既阿里山！


奮起湖上阿里山既火車暫時未通，要上阿里山可以乘搭巴士，火車站行一分鐘就會見到奮起湖巴士站


呢道可以坐台灣好行阿里山B1線上阿里山，不過一日好似得兩班車到阿里山，下午2:40已經係最後一班，如果miss左就要自己諗辦法啦；為左唔好走左班車或者上唔到車，早左15分鐘去到巴士站等


上阿里山係呢種小巴，車尾仲有輪椅位，車箱座位唔多，手快有手慢冇


明明火車有好多人，不過連埋我地坐呢部車上阿里山既都只係得3個乘客，等我仲以為有好多人迫車tim，唔知坐火車黎個啲人去晒邊呢？


沿路冇人上落，用左45分鐘去到國家森林遊樂區大門口，3個人要落車買門票，收費每人NT$150，唔係好貴


上返車坐多兩分鐘就到達阿里山巴士站，阿里山旅程開始！落車時有人問我地係唔係住ＸＸ旅館ＸＸ酒店，話帶我地去？？！但感覺伏伏地唔敢跟佢行！後來發現佢應該真係旅館職員，可能係我地怪錯左佢，sorry...


呢道溫度明顯比山下同奮起湖都凍好多
阿里山火車站4點半就關門，落左車即刻去火車站買左火車飛先，唔早一日買聽日一定會後悔




地下冇開要上上層買




成功買到聽朝上祝山睇日出既火車飛，Yeah！去祝山車費單程NT$100來回NT$150，多數人都會買來回，話晒我都叫有力行下山所以買單程算啦，行落山應該唔會好辛苦


望入去月台，好多小火車丫




除左祝山線呢道仲有沼平線&神木線，聽日都會坐


阿里山火車站又大又靚


而家係海拔2216米高


沼平﹑神木線係有固定班次，不過祝山線就特別啲，係睇日出專線，只會係日出之前行，日出時間日日都唔同所以開車時間都會唔同，而且又會因應賣左幾多火車飛而定班次，所以我買飛呢一刻都未知聽日幾多點開車，要4點半之後先會有公佈


買好飛就行去酒店check in先


阿里山呢道有二千幾米高，所有咩都高過人，呢就有全台灣最高7-11，又有最高郵局




由車站行去酒店好近，幾分鐘就到


阿里山大部分酒店都集中係呢道，好方便


有紅葉




今晚住呢間青山別館
阿里山住宿比起山下貴好多，呢間已經算平架啦，都要HKD$526一晚，係全個trip最貴一晚！


我好遲先決定去台灣，個時阿里山已經冇咩平住宿揀，相對平既就只有呢間「青山別館」同另一間「萬國別館」，「青山」同「萬國」兩個名對香港人黎講都尷尬小小，好難揀...阿媽題意我住青山咁就青山啦


係酒店攤左一陣，旁晚時份出去行行；呢道半夜都唔怕買唔到野食，大大間7-11係道（呢道地方細細已經有兩間7-11）






高山氣壓比平地低，啲包裝都變得脹卜卜




台灣香蕉感覺好貴，要一枝枝計？


天黑後變得更涼，亦都多左好多霧




上返去火車站睇聽朝開車時間，聽日6:43日出，火車5:20開出，要準時黎坐車


係道發現左張日出狀況表！前幾日連續幾日都見到日出，但今朝就見唔到！感覺上聽日都凶多吉少！我對上山睇日出一向冇咩緣，早就冇咩期望，咁就唔怕失望，哈哈^^睇個表先知係阿里山睇到日出既機會唔係咁大，春夏天機會更細，秋天已經算好少少啦，可以用句對白鼓勵一下自己，希望在明天丫ma


阿里山國家森林遊樂區最旺就係呢個位，停車場﹑巴士站﹑餐廳﹑商店，大部份既野都係晒呢個位，大家食飯都要黎到呢道




有幾間餐廳選擇




又有鋪頭買野






今晚計劃去呢間「山賓餐廳」開餐，價錢都幾經濟，而且我係酒店住客仲會多一碟菜送tim




呢間實在好旺，等左陣都係咁多人，山上凍冰冰又餓餓地唯有忍痛放棄呢道...唉...


行返去頭先經過既「九九九餐廳」，見有唔少食客，又有位就入去坐低，就算中伏都有好多人一齊中；咁岩後面兩台都係香港人，香港人係阿里山都算少見，而家係山上大部份都係台灣本地人




兩個人食，叫左3餸1飯，紅燒豆腐﹑炒山豬肉﹑炒高麗菜﹑炒飯








四樣野總共NT$470，除左紅燒豆腐正常一啲之外其他都麻麻，有得揀都唔好食呢間...


飯後冇野做，四周圍行下睇下；以為上到黎睇到星，結果咩都見唔到...






夜晚大霧左好多


呢道好細冇咩好行，返去旅館lu




旅館大堂




走廊




小小既房間




仲有部好耐都冇見過既舊式電話


阿里山上就算冇冷氣都好清涼，係床上寫寫下postcard越寫越眼訓，最後都係頂唔順訓著左...聽日四點就要起身，得幾個鐘時間訓咋



第三天

半夜起身天氣特別凍，「感覺猶如2度」？唔係真係咁凍掛？而家就好似係大雪櫃裡面一樣，呢種感覺好正！


未夠5點就由酒店出發，路上已經遇到好多好多人，大家為睇日出都犧牲左好多訓教時間，唔知大家睇日出既希望會唔會成功呢？




售票處超多人排隊，而家顯示器顯示仲有80張飛，數目仲不斷下降，排後面好多人都唔會買到飛lu，之後好快就聽到廣播話所有飛買晒，想上祝山只可以行路上山，話個零鐘可以行到！唔上祝山睇日山都仲有其他選擇既，不過就冇得坐火車咁解，小火車都係一個重點黎架


5點鐘上到二樓平台見到超多人排隊，人仲不斷咁黎，仲以為自己早不過好多人更早！排住隊冇野做可以拎個麵包出黎慢慢食，大家秩序非常好，一個跟一個排好整齊






5:20第一部火車開走之後到我入月台等車，今日總共有3部車開上祝山，我就坐第二列火車；每部火車可以載350位乘客，三部就可以載千幾人上祝山，山上一定好多人！




車到啦






小小既車箱已經迫滿人，我迫左係車頭司機位旁邊，都叫做係個好位




準確出發


柴油火車頭係車尾位置，車頭呢位司機負責睇路同緊急停車


沼平站都有人上車


由阿里山上祝山向上爬升二百幾米，車程大約半個鐘，由天黑漸漸坐到天光




6點到達祝山車站，距離日出仲有好耐；祝山車站海拔2451米，係台灣最高既火車站！






呢道得一個出口，大家都向出口行


一出火車站就已經係「祝山觀日平台」，好多人係呢道霸好位等日出，旁邊亦有好多小商店比人買早餐




感覺到天氣不似預期


見觀日平台咁多人，向左行上去觀日樓睇下有冇一個更好位置，上到去見到寫住因颱風造成嚴重山泥傾瀉，觀日樓範圍要封閉，咩都冇得睇...


即刻落返去火車站，今次向右行，去小笠原山個邊




見面就係小笠原山360度觀景台


呢道風景都幾好，不過見到咁多雲唔洗等都知冇可能見到日出啦






可以見到台灣第一高山玉山，主峰有3952米咁高！


一層層山，好似山水畫一樣




不過觀景台出面既植物生到好高，檔左好多視線，想睇到山下景色有小小難度，企高左都係唔夠高










大家都係道等運到，不過又冇日出又冇雲海，大家都係冇運既人










望出去全部都係山




望出去又有薄薄一層霧，山下睇得唔係好清楚








無無聊聊行到7點3返去到火車站，呢道冇咩人lu，最後一班車就快開出大部份人都趕住坐火車落山








我就唔搭火車啦，今日咁多時間慢慢行落去都得，當係行山都好；由祝山行返落阿里山火車站唔係好遠，行得快唔洗一個鐘就可以行到落去，慢慢行都只係個零鐘


咁岩見到最後一班火車落山












行行下見到寫住對高岳觀景台只係100m路程，咁近順便去睇睇啦；係呢個位遇到兩個香港女仔影相，我有幫手影架！好多人都對火車路軌有種講唔出既特別感覺，次次見親都想踩上去，哈哈^^








對高岳觀景台呢道望出去都係差唔多風景，冇咩特別








冇火車停但又有個咁靚既月台咁奇怪？


轉入山路向沼平車站行去




穿過大樹之下，一步步向山下走






呢條路又易行又舒服，最正係天氣唔熱空氣又清新








呢條係未開放行車既水山線，可以去到水山神木，見人地影既相個邊都幾靚架，今次就冇咁多時間行去啦


落到黎沼平，繼續向出口方向行




呢個係阿里山好出名睇櫻花既地方，呢個時間就咩都冇，邊棵係櫻花樹我都唔識分






最出名影火車加櫻花就係呢個位置啦










海芋




呢個位望到對面山眠月線路段，可惜因為88風災嚴重破壞其中一段路，暫時都未有計畫維修...見佢景觀咁開楊望出黎風景一定好靚，可惜可惜...






就快返到落去啦，呢個時間先見到有藍天，太遲lu






8點半終於落到阿里山呢個大門口




短短幾個鐘祝山日出之旅完成啦，今次睇唔到日出都唔會話好失望，本來就覺得唔易睇得到；今次可以坐到小火車上山已經好開心，不竟小火車都係阿里山其中一個賣點ma，而且我又鐘意坐火車，今次好滿足啦，哈哈