富士山登山（須走路線落山）

< 東京﹑富士山﹑飯能9天遊 >

第六天（續）

富士山日出順利睇過，日本最高既劍峰又上左，登山之旅可以結束？話就話上山目標已經完成，實際上呢啲都唔會係今次登山之旅既終點，大家最終目的地係五合目先真；唔好以為上到劍峰就可以鬆懈，落山先係真係既地獄，老土啲都要講句「上山容易落山難」，落山流既汗比上山更多！ 



食完烏冬出到黎陽光超好，但氣溫仲係好低，完全唔會覺得而家係夏天；一路都有人努力向山頂行上黎，大家都經歷過上山既路，明白有幾辛苦





人唔多可以靜靜欣賞呢片美景，由高山望出去感覺特別好








望住靚景就算唔捨得走，始終都要一別，附近遊人走得七七八八，我都差唔多時間落山




係走之前幫金剛杖燒返個山頂印，咁就完滿啦


大約八點半開始望住個靚景落山；上山同落山好唔同，上山係望住座山行，而落山係可以望住呢個咁靚既風景行，所以落山景觀係正好多，就好似一路係天空行緊一樣，不過睇風景還睇風景，唔想碌落山最緊要睇住條路


吉田/須走路線有專用落山路，同上山個條唔同；落山路主要係斜路，一開始已經係漫長既「之」字路，一層層向下行




一路對住咁靚既風景行，好唔捨得但又想快啲行落去；條路話難又唔係特別難行，話易又唔係易，開始時主要係呢啲沙石路，一路行一路向下滑，唔想仆低就要行得小心啲，呢個時候行山杖就係大家既好朋友，不過見有啲人可以好似平地一樣輕鬆跑落去...口罩而家好有用，一行就會飄起好多沙塵，冇口罩行人地後面會不停食麈


山上小屋物資係靠推士機運上去






見到啲人坐係上面都覺得牙煙，因為條路真係好斜




睇相好難感受到路有幾斜，睇下呢部推士機可能了解到小小




沿斜路向白雲方向行去；行行下朋友見有位台灣大哥冇行山杖落斜落得好辛苦，就將自己枝杖送左比佢，不過佢冇行山杖都行得好快追佢唔到...某程度係我懶行咁快，而且佢聽日將會為今日行咁快而付出代價，哈哈；講真無論體能運動天份等等所有野佢都比我好好多，一路都係佢等我，我好多謝佢




慢慢行中途又掛住影相，用左個幾鐘先去到八合目江戶屋，係呢道吉田路線同須走路線要分開啦；絕大部份人都會行吉田路線落山，會繼續係無窮無盡既「之」字路，不過我地將會行須走路線落山，貪佢可以玩「滑沙」；跟據官方時間，行須走路線落山只係需要三個鐘，以我既進度一定冇可能三個鐘行得完，哈哈；一路越行越熱，除低兩件衫休息一下繼續上路




繼續沿沙路落山


大約10:10落到本七合目「見晴館」，係呢邊須走路線最熱鬧既地方




有成22度，好熱丫！


呢道買野都係貴架啦，但燒印比吉田個邊平，只係￥200咋


而家先落到3200米，仲要落多超過千二米高度先到五合目，感覺好遙遠


佢地上山一定好辛苦，一上到黎就攰到訓低；由須走路線上山上升高度比吉田路線高，路又難行，由呢邊上山會辛苦好多，所以呢邊算係冷門路線唔多人行


差唔多落到雲層高度




望落去好快就要穿入雲入面


係見晴館休息左一排又食啲野先再出發，10:45終於去到七合目；呢邊少人行，不過有人情味好多，每次同人相遇大家都會打招呼，簡單一句問候對登山者黎講係好大動力，大家都要加油！


呢邊有好多呢啲白色小花，仲有好多蜜蜂採花蜜，佢地飛到咁高真厲害


下面間小屋屋頂曬滿綿被，唔怕大霧潮濕既咩？




10:52去到七合目「太陽館」，終於突破三千米落到2960米！


坐左一陣，見過最後藍天之後要行入大霧裡面lu




離開太陽館好快就要挑戰「滑沙道」，地圖可以見到滑沙道一條直線向下落，仲好長tim；行呢條路會有好極端既結果，可能好輕鬆好似滑雪咁滑落去，又可能適應唔到而吋步難行，無論點都好，入左滑沙道就只可以勇往直前，冇得行返轉頭架


前面已經有人係滑沙道落緊去，我又黎啦；一開始時遇到幾個香港人都係呢條路滑落去，不過其中一個似係行唔慣呢種路，只可以一小步一小步咁行落去，爬佢地頭之後就冇再見過啦，唔知佢到行成點呢？冇野可以幫到手，只可以祝福佢平安冇事；呢條路好極端，行之前要諗清楚


就咁睇可能唔覺斜，事實係好斜架，我估有三十度以上！全條路都係軟綿綿既沙土，最好玩既地方係每行一步會滑落去幾步，可以行到飛咁快都得，可惜我冇呢個本事，跌左唔知幾多次，只可以保持正常速度滑落去


一有人行過會掦起好大沙塵，天氣熱我又除左口罩，長期都食到成口灰，哈哈


見啲日本人好似滑雪咁玩，當對鞋係滑雪板，超快咁衝落去；呢個時間鞋套超級重要，冇鞋套就好似我咁對鞋不停入沙又要不停倒沙，入左石仔仲會好唔舒服；呢張相望上去可以睇到真係好斜架！


當以為滑完沙，穿過草叢之後又再滑過，沿路冇地圖又冇距離指示完全唔知自己去到邊道，只好見路就行


滑沙都好啲，有時候要穿過碎石，或者遇到大石就好易仆低，成段路都好講注意力同平衡力；開頭我滑得好慢，慢慢試下跌過同見到其他人點玩之後已經快左好多，不過小朋友快我更多，哈哈


就好似係一個大沙漠之中，所有地方都係沙；可以沿富士山山體直線向下滑，諗起都覺得痴線，而家我就做緊呢件咁痴線既事！


唔知過左幾耐終於見到有指示牌，仲有二百米行完，好野！


12:15終於完成滑沙道去到沙拂五合目，身處高度比吉田口五合目更低，不過距離須走口五合目仲有一段距離


玩得咁辛苦，係間冇開既小屋出面坐低休息下；成身出晒汗，連外套都濕晒，係道差唔多飲左成枝水！而家可以收埋件外套，只著t-shirt就OK；唔知點解呢道好多烏蠅，係好多好多好多


休息夠出發行埋最後一段山路落山，經過頭先既路，呢啲路唔當咩一回事啦，只係普通山路






呢啲樹林行山徑完全冇難度；頭先朋友行得咁快，而家到我威返次，呢啲山路係追我唔到，哈哈




沿路又係冇路牌標示距離仲有幾多，只有不停行不停行，直到見到呢個牌我就知好快到終點，終於落到2000米！


軍人都行富士山？


經過小神社即係仲有幾步就到，加快腳步衝落去


下午一點正，成功到達五合目，順利完成富士山旅程，好感動，萬歲！萬歲！




呢道職員好好人，主動教我地點坐車離開，又講比我地知開車時間；呢邊只係第二日開放登山，職員仲未見過吉田口既富士山保存協力金個小木牌，係呢邊就算比左錢都冇木牌留念，要吉田個邊先有


五合目只有兩間小商店，同吉田口比靜得多，但又好客得多，一見有人行過就送上蘑菇茶，我係第一次飲呢種咁特別既茶架


仲有個幾鐘先開車，坐低食住野舒舒服服慢慢等


臨尾食返個富士山咖哩飯；佢個樣係靚，但冇山上咖哩飯咁好食


2:30坐車離開須走口五合目




大約五十分鐘車程去到御殿場JR站，今次登山之旅真真正正結束！呢道可以坐巴士或者坐火車返東京都得，我為左慳錢選擇左慢慢坐火車返去


今次富士山之旅好幸運，遇到一個咁靚既天氣，兩日都藍天白雲，風景超靚；亦都好幸運今次可以順利上山落山，而且平平安安冇病冇痛，好值得感恩；自從上過富士山之後，以後睇富士山既感覺唔同晒，每次見到富士山都會諗起當日曾經係山頂行過一圈，永遠唔會忘記曾經上過呢座咁靚既富士山！

富士山對我黎講唔算難行，都叫行得舒服，反而早排上大東山行到頭暈（暈到個人飄飄下），不過又唔可以話富士山易行過大東山，只係富士山氣溫夠凍特別適合我，如果天氣熱我就大獲...除左運氣外，行山最重要係要按自己最舒服既速度行，唔好見人快就跟上去，座山唔會走左去架，就算慢慢行一樣可以行到終點，仲要唔好勉強自己一定要上到去，必要時要有放棄既勇氣，第日想去行幾多次都冇問題；始終山上地方高可能會有高山反應風險，希望以後所有上山既人都平平安安，睇到靚靚風景

由「御殿場站」坐車到「松田站」，再轉車返「新宿站」，經過兜兜轉轉返到hostel沖個靚涼，夜晚出動去新宿行街


黎到新宿都冇咩特別野好做，只係係街上隨意行下，算係感受一下東京大城市感覺；咁岩見到有間平價拉麵店就行左入去


我可以講我未食日本食過咁難食既拉麵，仲難食過香港個啲！難食都算，入面兩個女職員服務態度勁差，所有人都好似得罪佢地咁，食食下先知兩個都係大陸人，仲以為自己去左大陸！都唔明點解咁難食服務又差既鋪頭可以係日本存在！更唔明啲人點解會排住隊去食！




食完麵個肚硬係覺得有野「銀」住唔舒服，返去訓教算lu...