富士山登山（山頂日出 及 鉢巡路線）

< 東京﹑富士山﹑飯能9天遊 >

第六天

身處富士山之中，海拔3400米本八合目之上，已經可以傲視日本群山，除左本身富士山外日本已經冇其他山比呢道更高，而家位置比日本第二高山「北岳」仲要高二百米；黑暗中望唔到富士山山頂，我只知道山頂離我好近，就係上面大約三百米高既地方



山小屋咁既環境都唔訓得耐架啦，一點就醒左，出黎食下早餐做下熱身，太約兩點向山頂出發；溫度比之前更低，將所有外套著晒上身，冇風之下感覺好溫暖


除左好多登山人士之外，仲有滿天星星陪我上山，好耐好耐都冇見過咁靚既星空，一路上山一路望住咁多星星，感覺輕鬆自在，呢個世界自然環境真係好靚，只係我地平時比城市蒙蔽而見唔到，難得今日遠離城市，隨意抬頭已經可以見到呢個美麗世界；我只係拎部DC仔影咋，用眼去感受比呢相張靚更多


由本八合目慢慢行又影下相，二十五分鐘上到八合五勺，去到位於海拔3450米吉田/須走路線之中最高既山小屋「御來光館」，好多人都選擇住呢道貪佢去山頂最近；頭先係下面唔記得去廁所，路過有都去一去先啦，可能呢道廁所太多人用，冇下面トモエ館個廁所咁乾淨仲有臭味，入一入去好快出返黎


望落去下面，嘩...好多人上緊黎丫！冇特別係道停留，好快繼續向山頂前進


再行多二十分鐘，上到海拔3600米九合目，仲有400米路程就到山頂！夜晚行山冇咩距離感，但呢個都係好處黎架，好多時行下行下就會突然間去到目的地


九合目有座小鳥居同小神社，冇停留繼續跟大隊慢慢向山頂移動




行行下有個位兩條路二合為一，開始塞左啲人係道，排左陣隊行過呢個位就暢通返可以繼續慢慢移動；大隊上山速度唔係好快，行得好舒服，隨左有兩個西方人好心急不停爬頭上山之外，其他人都好有秩序一個跟一個行；不過有時候我想行慢啲都唔得，遇到前面有行山團停低休息，爬佢地頭之後無啦啦變左隊頭帶住一大條入龍，幾咁唔好意思即刻行快小小追返上前面大隊




半夜3:10，由本八合目山小屋行左大約一小時十五分鐘，上到山頂入口既鳥居啦！只要行多幾級樓梯就係山頂！




黎到呢道可以停落黎抖一抖，靜靜欣賞富士山下呢片美景；遠方城市燈光，腳下一條長長火龍，呢個係難得一見既風景




滿天星星一直陪伴大家


遠方開始出現微微晨光，要上山搵個靚位等待日出


吉田/須走路線山頂終點，位於海拔3710米既「久須志神社奧宮」




山頂好熱鬧，有野食有野飲有野買，所以有「富士銀座」之稱，呢個位可能旺過旺角，哈哈，唔黎過都估唔到山頂可以咁旺




三點半時山頂仲有好多位，好易就搵到個頭位，坐低靜候一個鐘之後日出


天色慢慢變光，仲有好多人努力上緊黎！其實上唔到山頂睇日出都唔緊要，沿路都可以睇到日出架，好多人會係山小屋睇完日出先上山；有時候可能山頂睇日出仲冇係下面小屋睇咁好，因為富士山山頂好多時都比雲覆蓋（早一晚係河口湖就見到咁啦），山頂視野未必有下面咁好；睇唔睇到日出好講緣份，一場黎到我都係選擇上山頂睇


所有人一齊面向東方，期待呢個日本最高「御來光」（日本人叫日出做「御來光」）




山頂好凍，氣溫低過零度之餘，仲要一路抵受住三號風球以上風力，我件外套夠厚唔覺凍，只係對腳著住條薄行山褲凍好多，要收埋自己一舊（其實我有條厚褲架，不過咁多人望住冇理由拎條褲出黎著架）；一路等個時，後面黎個幾個香港人，有一個不停大大聲講粗口，唔係以為冇人知掛？


4:31，太陽出黎啦！突然後面間鋪頭播啲唔知咩歌，仲一齊大叫「萬歲」！




現場睇既日出真係好靚！




大約十分鐘太陽出晒黎，大家逐漸離開，入一入鋪頭避寒先；本來係想食返個麵暖暖身，見咁多人等緊開餐都唔知要等到幾時，出去行下好過係道坐




出面人山人海




麵食唔成，先圍住火山口行一圈，叫做「鉢巡」；鉢巡大約要個半鐘時間，途中會經過日本最高峰﹑日本最高郵局﹑日本最高神社等等，咁遠上到黎山頂冇理由唔行既；鉢巡路線七月十號先開放，之前改上山時間就係為左就佢開放，出發！




向劍峰前進




好多地方結左冰，證明天氣好凍好凍






呢個就係劍峰，位於富士山頂西南面，係正東北面吉田路線山頂對面


沿路都係靚景，就好似係天空散步一樣，呢條話晒係日本最高既路黎架




富士山到而家都被分類為活火山，1707年曾經爆發過，不過可以放心專家估計再爆發既機會好低；話明係一座火山，富士山中間就有大大個凹入去既火山口




回望富士銀座，仲係有好多人




呢一刻離天空好近，離頭頂上面飛過既飛機好近，離前面劍峰都越來越近；係飛機上面望富士山就試過，調轉由富士山望返上飛機感覺仲特別




仲有五百米就到山頂！


去到日本最高郵局！今年山頂郵局營業時期係7月10日至8月21日，時間係上午6點至下去2點；而家只係五點半，唯有行埋一邊避避風等佢開門，上到黎一定要入去幫明信片蓋返個山頂印；呢道仲有登山證書賣，我就冇買lu，見好多人都買呢個






終於等到郵局開門搞掂所有野，繼續向山頂前進；由郵局行上小小就係日本最高神社「淺間大社奧宮」




旁邊仲有日本最高既商店，見到有人係入面食杯麵，相信呢個應該係日本最高既杯麵！




劍峰就係前面，仲差小小咋




劍峰之前呢一段路係上山頂最後一個挑戰，條路勁斜所以有「馬背」稱號；路斜唔係問題，最大問題係路面好多沙石，每行一步起碼向後跌半步，大家都依靠行山杖同欄杆一小步一小步向上行




努力左幾分鐘，成功上到黎，可以見到條路有幾斜！


清楚見到好大個火山口


再行上氣象站就係日本最高點！


二零一六年七月十一日上午六時三十分，我上到日本最高既地方啦！任務完成，Yeah！




上到黎大家都想同條柱影相，要比啲耐性排隊


望住曾經走過既路，估唔到自己都上到黎！而家日本我就係最高啦，哈哈哈哈哈！




係山頂影完相，繼續沿路圍住火山口順時針行，完成埋下半部份鉢巡路線


見到富士山倒影


見到山下一片樹林同遠方山脈






一路都係向下行行得好舒服，去到臨尾竟然有段上斜路！雖然對比之前既路係非常易行，但個心明明係諗住落山，突然又要人上斜，內心唔係幾好受...我接受唔到囉！




另一個角度睇火山口


挨埋最後一段上斜，富士山所有斜路都上晒，可以舒舒服服欣賞眼前美景




啲雲好似綿花糖咁軟綿綿，好想一啖咬落去




用左差唔多兩個半鐘，又返到黎富士銀座，而家少好多人，我估大部份人都落緊山啦，其實而家時間仲係好早，只係七點半咋，平時呢個時間都未訓醒






我完全唔趕時間，難得黎到緊係hea到夠先走；頭先好多人既餐廳已經靜晒，可以靜靜地開餐，順便整理下行李，最重要係要做好防曬準備，出面個太陽又大又近


山上食野預左比平地貴好多，一個烏冬￥900，仲算係可以接受


係一個咁凍既地方食到一個熱辣辣烏冬，你話係幾咁幸福呢，呢￥900抵比啦


食飽hea多陣，整理好背囊，準備迎接富士山旅程最後一個挑戰，就係無窮無盡既落山路；好多上過富士山既人都話落山比上山更難，睇黎唔可以放鬆住，戴好護膝做足準備出發！