富士山登山（吉田路線上山）

< 東京﹑富士山﹑飯能9天遊 >

第五天

上富士山日子終於到，今個日本旅程最大原因係為富士山而黎，目標係上到富士山山頂睇日出同去日本最高既地方--海拔3776米劍峰，今次可唔可以成功除左要靠信心之外，運氣都係一個重要因素，富士山咁高天氣變化可以好大，萬一山上大風大雨基本上唔洗行啦...定好上山日子後只可以寄望呢兩日有好天氣 

五點半起身準備起程，咁早太陽已經出左黎，而且非常好天，窗外清晰見到河口湖同富士山，睇黎今次運氣唔錯




整理好行李，六點多啲由酒店出發；咁早酒店未有車接送，咁自已行出去啦，行去河口湖站唔係好遠，沿路仲見到富士山，人都特別精神




係車站旁邊便利店買定山上食物，買左麵包﹑三個飯團﹑朱古力，仲有2公升水同500ML果汁上山，加埋自己仲有一枝水，我諗應該夠啦；其實山上有錢就可以買到水同野食，但會貴好多，比唔起錢唯有辛苦啲自己帶野上山


黎到河口湖站等車上山，富士山就係後面；如果可以既話放低啲冇用既野係道會舒服好多，我唔會再返黎就唔可以放低，所有野都要拎晒上山，背囊比好多人都重，慘慘...




等車期間拎個岩岩買既炸熱狗出黎食


開車前幾分鐘巴士黎到，我仲以為自己排到好前唔怕冇位，點知呢班車冇得入錢，即刻同幾個一樣情況既傻豬跑入河口湖站買飛，永遠最緊急既時候前面總有人係道問黎問去阻住成條隊，好在司機好人等埋我咋


有驚無險上到車，成程一路恰住眼訓向富士山前進！


先講小小關於上富士山既資料！
富士山主要有四條唔同既上山路線，分別係「吉田路線」﹑「須走路線」﹑「御殿場路線」﹑「富士宮路線」，每條路線出發地方唔同，大家都一樣可以直到富士山山頂，而各條上山路線因應長度同路況等等因素可以分為唔同難度，上山最易係吉田路線，之後係富士宮路線同須走路線，最難係御殿場路線


自己知自己事，平時都無做開運動體能差到爆，咁一定係揀最易既吉田路線啦，最多人揀就係呢條路，大家都貪佢易行，而且上山路小屋多，補給好方便


由東京出發去吉田路線亦都係最方便，夏天時間新宿有高速巴士直到五合目，唔想坐呢班車都可以由東京坐巴士或火車到河口湖，再轉登山巴士上五合目，咁就可以順便玩埋河口湖啦，我就係先坐火車到河口湖，浸過溫泉第二日再上山，亦有更多人鐘意行完富士山再落河口湖浸溫泉，辛辛苦苦行完山去浸溫泉一定特別舒服




新宿來回五合目同河口湖既高速巴士可以預先係網上預訂
http://highway-buses.jp/chi/

行富士山唔似係香港行山咁簡單，準備既裝備要充足一啲，我同大家分享一下我帶左啲咩上山（同專業既行山人士比我應該算帶得少野，我盡量都唔想拎咁多，如果大家真係要上山可以上網搵搵資料，好多網站都有專業介紹）：
＊御寒衣物：正常黎講每升高100米氣溫會低0.6度，富士山高三千七百幾米正常比平地要凍超過二十度，我上山個日好凍，上到山頂見啲水都凍到結晒冰，而且超級大風，好彩拎左上雪山用既風褸去咋，可惜我只係著條薄行山褲，等日出時對腳超凍（我有帶左條厚褲上山架，不過換褲唔係咁方便就懶得換），而我既衫褲都係防水，以防落雨濕身，山上唔可能開到遮
＊防曬用品：山上路段絕大部份都係無遮無擋，一定要帶帽同用太陽油
＊食物食水：山上小屋會有食物同水賣，但價錢比平地貴好多，我呢啲窮人都係自己帶上去算，最多辛苦小小；今次帶左麵包﹑飯團同朱古力上山，知道自已出得汗多所以帶左2.5L水同500ML果汁上山，到落完山岩岩好飲晒；係就係辛苦啲，為左慳返啲錢都要辛苦下，而且落山路線無咁多小屋就算幾有錢點都要帶定一啲
＊行山杖：有行山杖上落山會輕鬆好多，由其係落山；好多人都會去到買金剛杖當行山杖用，咁都好多無啦，但始終行山杖好用一啲
＊行山鞋：上落山好多路都係泥路碎石路，如果著普通波鞋或其他鞋未必可以保護到對腳；行須走路線落山既話最好用埋腳套，唔用對鞋一定入晒石仔同火山灰，會行得唔舒服
＊手套：有啲路要手腳並用上山，有手套可以保護好對手，又可以保暖
＊口罩：落山唔想食灰既話一定要用
＊頭燈：睇日出要半夜出發，山上係無路燈，有頭燈比用普通電筒方便好多
＊氧氣：自問身子弱又怕有高山反應，一早準備定枝氧氣以防萬一，還好無高山反應情況唔需要用到；大吉利事如果到時真係要用既話係山小屋都可以買到，價錢介乎￥1100-￥1500，我支係amazon買唔洗四百日圓，平平地買個安心都好
我帶上山主要就係呢啲，當然仲有好多立雜野要帶；話說係上富士山前兩日行其他山時有少少拉傷一邊膝頭，當日即刻係東京買左對護膝，唔知係唔係因為有護膝幫助，行完富士山膝頭都無再有問題，太好啦

上富士山要係山上小屋住一晚，小屋價錢唔平架，但唔好期望小屋有啲咩設施，小屋係用黎保護大家安全而唔係比人嘆世界，係小屋只係訓睡袋咋；出發前個幾月book左本八合目小屋，當時除左某幾日之外七﹑八月大部份日子都有位；直到七月頭我要轉時間再睇先發現七月中暑假開始之後大部份日子已經冇位，好彩我想要既十號仲有位；七月頭先知道今年七月一號富士山開山只係開吉田路線，另外三條路線同山頂鉢巡路線要十號先開，所以即刻改時間，亦都因為改時間避開左大雨，超好彩


呢道有一啲山小屋資料作為參考
http://www.fujisanguide.com/forms/menutop/menutop.aspx?menu_id=1650

廢話講完而家開始富士山聖地巡禮！無錯我其中一個黎呢道既原因係因為漫畫，哈哈；日本有一句說話：「唔上富士山係笨蛋，上多過一次富士山係大笨蛋！」為左唔做笨蛋準備上山啦！

大約五十分鐘車程去到吉田路線登山口「富士斯巴魯線五合目」，已經上到海拔2305米，清涼好多，距離富士山頂仲有一千四百幾米咋；呢道嚴格黎講唔可以話係吉田路線起點，吉田路線真正入口係山下既一合目，只係大大大大大多數人都會坐車上黎半山開始行




八點幾五合目冇咩人，大多數上山同落山既人群未到，晏小小旅行團黎到將會迫滿人


如果好彩既話五合目都可以見到靚雲海，今日雲層太高望唔到出去lu


先到五合目郵局買定郵票，上到山頂郵局唔洗同人迫




好多人會黎「小御嶽神社」參拜求旅程順利




黎到五合目唔洗咁心急上山住，可以先休息一下比身體適應高山環境，傳說可以減低高山反應出現既機會；既然休息咁重要，我都慢慢行下鋪頭，順便食多個早餐；話說琴日食完個刨冰之後已經肚痾左好多次，今朝係便利店同呢道餐廳都痾左幾次，幾驚上到山要搵廁所，好好彩食完呢餐之後冇晒事


係五合目留左三個鐘，買好野做完熱身運動後，出發既時間已經係十一點半，呢個時間五合目熱鬧好多，迫滿上落山既人，仲有好多遊客




唔想行可以騎馬，好多遊客騎架




日本夏天又早日出又遲日落


正式向富士山頂出發！
上山門口有「富士山保存協力金」攤位，以自願方式收￥1000作為保護富士山經費；呢￥1000係自由選擇比定唔比，見好多遊客係右邊直行直過就算，相反日本人比較願意交錢


作為一個負責任既行山人士都係選擇交錢比較好，我都想富士山繼續保護好架；交錢後會得到呢塊小木牌做證明同留念，職員建議掛係身上方便睇到；木牌由富士山木材製成，而木材係由劃界做防火線既樹木取得，係一份又環保又有意義既紀念品


我知自己體力唔好，全程都係慢慢行，每行到一間小屋盡量都休息下，中途行行下又會休息下，一路依自己最舒服既速度向上行，所以上山時間唔快，預計日落前上到住既地方就OK


由五合目去六合目初段好易行，路闊而且有小小向下斜




呢段路好大霧，睇唔到外面風景有小小可惜




沿路見到好多落山既人，好多人都冇咩表情，有啲行到一拐一拐，仲見有人要比人左右兩個攙扶落山，睇黎行山都幾辛苦？而家我仲好開心有講有笑，到聽日呢個時間可能未必笑得出啦


行左一陣開始轉入一條細路上山；由呢個位上山頂有六公里距離，六公里睇落好短，不過要上升既高度就好多，有預感上山既路將會好斜，而且係高山地方行會比係海拔低既地方行更加辛苦








穿過樹林向上行




過埋隧道就到六合目




用左大約四十分鐘時間，12:15去到六合目；六合目有間安全指導中心，職員派發吉田路線地圖，而且仲有流動廁所，過左呢道要上到七合目先再有廁所




距離山頂仲有5.2公里，近左好多啦




休息一陣再出發，由六合目去七合目將會係無窮無盡既「之」字路，已經有心理準備要不停向上行




行左唔夠十分鐘見到間冇開門既小屋，坐低拎左個飯團出黎開餐


霧中隱約見到七合目小屋，下個目標就係呢道！


繼續由「之」字路上山，還好條路鋪得靚又唔係太斜，慢慢行都算輕鬆，只係好多碎石要小心比石kick親，一路跟住前面啲人行同靠牆行條路多數都係好行啲






最後小小路要由石牆向上「爬」，呢個時候手套就有用啦；我見仲有小小路懶得拎手套出黎，快啲上去休息先算


大約1:30，上到七合目第一間小屋「花小屋」，由六合目到七合目連中間食野時候用左岩岩好一個鐘，呢個速度都OK啦，而家距離山頂仲有3.8公里咋




見到小屋第一樣要做既野就係幫金剛杖燒返個印，一個印￥300唔係平架，不過呢份將會係上富士山一樣好重要既紀念品，我會揀啲我認為重要既地方燒印，如果有錢間間比￥300燒晒啲印上去仲正


花小屋好多人，大家經過咁多「之」字路都要休息一下，等陣再挑戰更難既路


休息左八分鐘，戴返隻手套向山頂繼續前進


由七合目到八合目係呢啲好斜要手腳並用既岩石路，左手戴手套，右手拎行山杖開始一級級向上「爬」






「爬」左四分鐘已經上到另一間小屋，會唔會快左小小？由七合目到八合目之間大約十分鐘路程就會經過一間小屋，想補級同去廁所都好方便




小屋有好多野賣，係貴啲咁囉


山上廁所收費￥200，好多都係自助比錢，要去廁所就要自覺比錢


霧中向下一間小屋前進


好快就到下一個目標，霧散緊啲可以清楚睇到頭先走過既路，都唔係好難行姐？






同雲一樣咁高！




經過小屋繼續上山，繼續係呢啲石路，我幾鐘意呢種路架，爬下玩下有趣好多冇咁悶；路兩邊會有繩指示，唔洗擔心行錯，不過呢啲繩千其唔好用黎借力，咁係一件好危險既事，自己危險之餘行後面既人都好危險


好快又經過小屋


大家再次入返大霧之中努力爬山，向下一間小屋前進


小屋多到我都唔知過左幾多間，只知行一陣就有行一陣就有




條路睇落好驚險，慢慢小心行就冇問題


又到一間


最衰係大霧，望唔到山上仲有幾遠，只可以默默向上行


終於...真正衝出雲霧，係雲之上繼續爬升！好清楚見到一片藍天白雲，見到呢個靚景咁辛苦行到上黎都係值得架！




前路亦都清楚好多，可以望到下間小屋！不過有時睇得太清楚都未必係好事，見到小屋距離自己仲有咁遠，唯有笑一笑再努力向上行




下面好似仙境一樣，騰雲駕霧；雲海好耐之前都有見過，但靠自己雙腳一步步穿過雲霧到達雲海之上就係第一次，呢種感覺好實在又好夢幻，估唔到自己都有能力上到咁高




望住靚景，個心飄飄然之下3:00飄到上八合目，亦都突破左三千米高度啦！由七合目花小屋上到八合目大約用左九十分鐘！






終點在望！今日我唔會去山頂，會先係本八合目住一晚，仲有唔夠一公里就到，好野！


風景超超超靚，仲可以望到琴晚住過既河口湖






一定要燒個印留念


人地個枝好多印，我個枝勁少印，哈哈


係三千米高空之上對住靚景開餐，食環境都夠好味；行緊個時著件普通t-shirt都唔覺凍，係道坐得耐開始凍啦，要著返件外套


對住一片美景靚到唔想行，足足抖左半個鐘先繼續上路；下個目標係本八合目住既地方，就係相中最高個間，好似好近又好似好遙遠




八合目有救護站，要七月中先開


不停回頭望不停回頭望不停回頭望，後面太靚啦




經過小屋都唔停lu，繼續向上行






下面係山中湖




回歸「之」字路，今次呢條比之前個條更多碎石更難行，好彩我仲行到








經過八合目最後兩間小屋後下一間就係本八合目，相信只要慢慢一步一步向前行，一定會去到目的地！




5:03上到本八合目第一間小屋，由八合目太子館上到黎本八合目大約用左90分鐘，行得好慢丫；原本我係計劃根據漫畫劇情住呢間，但佢個網唔可以比外國IP預訂，我都冇辦法啦；係門口同佢地職員吹水時有講呢件事佢地知仲cap埋圖佢睇，佢都唔知點解會咁




望住頭先上山行過既路，原來自己行過咁多架！


又係欣賞靚景時間






休息完行多幾分鐘，5:25成功到達今晚住既地方，位於海拔三千四百米本八合目「トモエ館」




風景一流


大廳有食飯既地方，左邊個啲就係床位


我住二樓上面，第一次訓睡袋；而家仲未到暑假旺季未係好多人，一格五個睡袋只係訓左四個，仲有一個剩，哈哈；如果訓滿五個人會係好迫架，聽講多人時大廳都會訓滿人




到晚餐時間會開咪叫大家個名，住客輪流係大廳開餐；今晚食咖哩漢堡扒，好岩我口味，呢個可能係我食過最好食既咖哩！係呢道住一晚連晚餐收費￥7500，唔係平架


食飽冇野做出去行下，順便去廁所；原本我諗山上既廁所環境一定唔好，但我住呢間小屋既廁所比想像中好好多，地方乾淨之餘，最估唔到既係佢有暖廁版，出面咁凍我係入面坐到唔想走，哈哈




本八合目對上仲有一間吉田路線最高既山小屋「御来光館」，再高呢道50米，不過佢咁高我第一日唔想行咁多路，而且佢要用信用卡比錢所以冇揀佢，亦都好彩最初冇揀佢咋，佢要轉時間都唔知點轉


黃昏時份，見到大大個富士山倒影


天開始變色




越夜個天變得越金黃




好多人出左黎睇




買多左個飯團未食，唔想佢放得太耐都係食左佢先，食完超飽


而家得幾度，著得一件外套就算冇風都有啲凍


係床上碌到八點再出去睇風景，真係好好好凍！原來由山上望落山下夜景係咁靚架！琴晚由河口湖望上富士山見到山小屋發出點點燈光，今日終於到我企係山上望返落河口湖，感覺特別好






今日行程完滿結束，慶幸冇高山反應出現；聽日將會向更高既地方前進，目標係上富士山頂睇日出，仲要上去全日本最高既地方「劍峰」！係時候要休息啦，聽日加油！

--------------------------------------------------

PS.早兩日係東京返左黎啦，今次都算成功睇到靚紅葉，同大家分享小小相先啦！

箱根強羅


大涌谷再見富士山




蘆之湖桃源台




蘆之湖邊好多已經灰晒




蘆之湖元箱根




強羅公園




強羅路邊街景




飯能兒童森林公園






飯能東鄉公園，覺得今次旅程呢道既紅葉係最靚






高尾山






明治神宮外苑，超級金黃






日比谷公園




唔少得聖地巡禮時間啦，三葉我黎啦






今次旅行大致上算係唔錯，可惜有隻新買既公仔唔見左，唉...好唔開心，即係又要我去多次買啦？旅程中有日朝早六點搖醒左，都知道係地震啦，睇新聞先知7.3級咁嚴重，好彩震央離陸地遠，對日本冇大影響；當我離開東京幾個鐘後東京就落起大雪，唔知係好彩定唔好彩啦比我成功避開左，如果有得揀我想睇東京雪景架，唉...返到黎香港先記得有野冇買...唉......