東京。築地市場﹑上野﹑淺草寺﹑酒酒井Outlets

< 東京﹑富士山﹑飯能9天遊 >

第七天

行完富士山之後，今次黎東京既目標已經達成，冇咩特別地方想去，就係東京四圍行下；幾年前曾經黎過東京，但仲有好多地方未去，襯仲有小小時間去多啲唔同地方睇下



朝早坐地鐵到「築地站」，一出黎見到「築地本願寺」，係門口望一望繼續行


再過馬路就到築地場外市場；當時聽講築地就快搬，襯未搬前過黎朝朝聖（雖然佢搬極都未搬到）




築地市場好多人，真係好多人，之前去都係啲冷門小小既地方，好耐都未遇過咁多人，而且好多都係香港人




築地主要係賣海鮮同食海鮮，我呢啲唔食海鮮既人黎到都係得個睇字，望住啲海鮮完全冇興趣，但作為睇下日本人既街市都算係一種特別體驗                                                                                 












小食都有唔小，不過唔一定好食，而且價錢唔平，我見係貴過其他地方






去到傳說最多人排隊既壽司大，唔知要排幾耐先入到去呢？






除左呢個玉子燒之外，築地其他野都唔多岩我，買左小小手信返屋企就走lu


再次黎到秋葉原，今次唔係為左行街，係黎呢道食野


係網上見秋葉原有間平價燒肉店，午餐時段任食一個鐘只係￥1000，咁平食碗拉麵都唔只呢個價錢，一於黎玩下日本燒肉


呢邊冇人，霸晒成間房


有好多款唔同肉類選擇，係不停燒之下好快已經食飽，後來變左食沙律菜同雪糕；呢個平價燒肉好抵食，味道OK架，而且又有得玩，平靚正！




食飽後去到Sunshine City


黎呢道係為左小精靈中心，次次到日本都要朝聖一下








旁晚時份去到上野阿美橫町，又係一個好多人既地方






發現呢間鋪好多零食買，買左一大袋


行行下太得閒企係道睇個uncle玩夾公仔機，睇住佢玩左二十次以上，由咩都夾唔到去到夾左好多出黎多到送比我，只係睇都覺得開心，哈哈


朋友今晚就要去機場，係走之前搵間坐得舒服啲既餐廳食晚餐，見到有間薩莉亞就上左去


薩莉亞啲野一向都岩我食，而且日本薩莉亞比香港薩莉亞仲要又平又好食環境更舒服，一唔留意叫得太多野，飽到食唔落












食飽返到hostel拎行李，再送朋友去上野坐最後一班skyliner到成田機場，今日就係咁四圍行之下完左lu


第八天

今次住呢間係比較大型既hostel，兩層高環境又大，係走之前幫佢影下相先




走廊


一樓廚房，好大間


一樓梳洗地方


一樓大廳




望住枝氧氣唔知點處理好，帶又帶唔走，用又唔用著，比人又唔知比邊個，如果就咁掉左佢搞到爆炸就唔好啦，最後比我開左黎聞，原來係冇味又冇任何感覺，哈哈


執好行李寄存係hostel，好好利用呢個上午出去玩


一早八點幾唔知去邊好，諗諗下決定去淺草寺望望




一黎到竟然落雨！淺草寺應該係東京最出名既寺廟，一早就咁多人；六年幾前跟旅行團黎過，當年跟本就冇時間行，連大殿對出既仲見世通都唔夠時間行到一半，今次終於比我慢慢行返夠本








傳說用啲煙燻下個頭會聰明啲，即刻比佢燻下先


上次係道求左枝凶籤，今次唔求啦！


五重塔維修中


Sky Tree就係附近


沿仲見世通行出大街，順便睇睇有冇紀念品岩心水，有小小收獲






離開淺草再次去到上野，今次黎係為左買零食同去藥店買野，全日都係買野之中渡過，仲辛苦過行山...


返去hostel拎返行李，去到東京站坐車


上網睇過呢個站係有巴士去成田機場附近既酒酒井outlet，大約三點會有最後一班車，我已經預早黎，不過等到時間過晒都冇車到，到而家我都唔知班巴士去左邊？！！


等極都冇車！好彩比我見到東京站有巴士開去成田機埸，咁直接搭去機場先再算；呢部車好平車費只係￥1000，車上仲可以差電，舒舒服服坐到去機場


係機場放大背囊入locker，輕輕鬆鬆出發去outlet，機場有巴士去到




呢個outlet好冷清，可以話人影都唔多個；我自己冇特別野想買，都係想睇下有冇野可以買比屋企人，好彩都有收獲，唔洗空手而回，哈哈










Outlet八點關門，我行到岩岩好八點，已經過左返機場尾班車時間，要先坐車去JR酒酒井站再轉鐵路到機場




酒酒井站旁邊有間超級市場，把握最後機會入要買野；買買下不知不覺到左九點關門時間，未買好都要走lu




JR酒酒井站乘客少班次少，我大把時間唔怕等


夜晚機場食野冇咩選擇，得吉野家咋；亂叫叫左呢個餐，右上角個碗好似嘔吐物完全擺唔到入口，好彩冇倒佢落啲飯道，唔食飯都唔洗食...


夜晚又返到T3之前訓開既位置，今次唔知點解好好眼，寫寫下postcard頂唔順訓著左，呢道張梳化太舒服啦

第九天

準時訓醒去check in，早啲將行李送走唔洗拎住咁多野


其實今次唔算多野啦，兩個大背囊都放唔滿，細背囊入面又冇野，比起上次輕鬆好多


放晒所有野連手提行李上去先得25.8KG，等我仲買左30KG行李咁多，今次唔夠時間比我買啲無謂野返黎，唉...


呢枝金剛枚特別啲，要另外拎去大型行李個邊寄；今次職員又同我講請我坐闊啲既緊急出口位，可以坐得舒服啲當然應承




餐廳半夜就開始營業，完成check in仲有好多時間比我食早餐，又可以係道食我最鐘意既烏冬




今次係食冷烏冬，好好味


慢慢食慢慢坐，坐到夠鐘要入去lu




睇黎我好早黎到，候機室冇咩乘客；呢個時間緊係去周圍睇飛機，T3主要係捷星﹑香草﹑春秋用，望黎望去都係得呢幾款




之前check in時職員叫我早啲去候機室，我都唔知咩事？原來我個位可以優先上機，咁就唔洗怕上到去行李櫃full晒，次次係日本返都見到有人啲行李塞唔入頭頂行李櫃，哈哈


上機冇登機橋，跟住條路自己行去飛機就得




緊急出口有12個位，另外11個都係日本人，唔知點解會揀中我呢？




不過今次坐闊位未必係好事，比隻機翼頂住睇唔清楚富士山，唔可以好好同佢講再見...曾經諗過唔知可唔可以係飛機睇到山頂上既人呢？答案我都唔知...




幾個鐘之後返到香港，平安完成富士山旅程；今次旅程好順利，想去既地方都去左，玩得好開心；東京好大，仲有好多地方未去，當時諗都冇諗過好快就會再去東京；而家我又有多啲籍口去東京啦，唔知幾時可以再去呢？

< 東京﹑富士山9天遊 >

< 完 >

PS. 早排去左台灣，主要目標係去綠島同浸溫泉，同埋搵朋友食飯；台東同綠島都係一個好靚既地方（如果好天既話），望住無敵大海景加上碧海藍天更加靚得誇張（都係要好天），海水係又綠又藍好有層次，今次總算睇到靚景，而且試左好多新野，哈哈

~~~~~ Merry Christmas and Happy New Year ~~~~~