台灣。台東﹑綠島﹑高雄5天遊。2016。冬

< 台東﹑綠島﹑高雄5天遊 >

十二月完成二零一六年最後一次旅行，今次咁岩有幾個朋友一齊放假，難得組成一個好多年都未出現過既組合，雖然大家出發時間唔一樣，最後順利係台東匯合，開始今次台東之旅；今次旅行首選地唔係台灣，只係有朋友拎唔到咁多日假，而且我又想乘機去高雄搵朋友食飯，最後決定飛去高雄；高雄感覺上冇野好玩，諗諗下就將目標放係台東，感受太平洋風光

台灣（台東﹑綠島﹑高雄）五天行程：
Day 1： 香港 - 高雄。打狗鐵道故事館﹑哈瑪星台灣鐵道館﹑駁二藝術特區
Day 2： 高雄 - 台東。海濱公園﹑台東觀光夜市﹑鐵花村
Day 3： 台東 - 綠島。浮潛﹑夜訪梅花鹿﹑朝日溫泉
Day 4： 綠島。環島遊 - 台東。知本溫泉
Day 5： 台東 - 高雄。夢時代 - 香港
高雄住宿：鳳梨背包客棧
台東住宿：羅密歐檜木民宿
綠島住宿：三悅民宿
知本住宿：知本金聯世紀酒店


 ~ 旅程簡介 ~

二零一六年十二月

第一天
 
朝早坐上華航第一班去高雄既飛機，話咁快個零鐘就到台灣，仲快過坐車去機場；前一年已經去過高雄，算係熟路啦，好快去到住既地方；台灣比香港熱好多好多，同夏天冇分別，十二月都熱到出煙


高雄冇地方特別想去，作為半個火車迷去睇下火車都唔錯，去左「打狗鐵道故事館」睇下台灣舊時既火車，可以行到去火車旁邊近距離欣賞


「打狗鐵道故事館」附近有個「哈瑪星台灣鐵道館」，呢道勉強都叫同火車有小小關係，實際佢係一個行藝術路線既地方


再行多一陣去到高雄好出名既「駁二藝術特區」，不過藝術野真係唔岩我呢個粗人


夜晚路過愛河﹑六合夜市，同朋友食飯，第一日好快就過

第二天

由高雄出發大約兩個半鐘火車，黎到台灣東岸台東


到民宿放低行李後，踩單車去海邊，前面就係一望無際既太平洋！如果好天睇到日落晚霞一定好靚，但首要條件係冇雲加好天


台灣夜市一定唔可以唔去，台東地方唔大夜市都唔係好大，食既野大同小異，樣樣都有小小咁啦，食我就冇咩興趣，作為一個景點黎見識下都值得既


台東市內另一個出名地方「鐵花村」，週末晚會有人唱歌，仲有好多呢啲熱氣球燈飾，幾靚架


台東係一個hea遊好地方，今次冇機會慢慢享受

第三天

一早坐船到綠島，網上個個都話呢程船唔易挨，事實真係好難挨


天氣好之下綠島係一個好靚既地方


日落時太陽咁岩比啲雲遮住，可惜...


夜晚一大隊車隊開上山睇動物


享受世界三個海底溫泉之一「朝日溫泉」


綠島行程好豐富，由日玩到夜，體驗左好多新嘗試，呢日好充實

第四天

朝早再次環島之旅，今日天氣冇琴日咁好，多雲冇陽光






下午離開綠島去到知本溫泉，今晚可以好好享受日式溫泉啦


第五天

今日要坐火車返高雄，再坐飛機返香港，冇咩時間去玩lu；朝早由酒店直接坐的士到火車站，離開台東呢個靚地方


留係高雄時間唔多，去夢時代行一行就要去機場


五日小旅行好快就完，唔知幾時可以再去台灣呢？再見！


~ 待續 ~