高雄。打狗鐵道故事館﹑哈瑪星台灣鐵道館﹑駁二藝術特區

< 台東﹑綠島﹑高雄5天遊 >

第一天

今次旅行原本計劃唔係咁短，會去更多地方，後來唔想搞咁多野就將行程縮短，變成今次五日旅程，冇所謂啦可以去玩就得
 


上午黎到機場，櫃台超多人排隊，職員工作效率好高，唔洗好耐就將背囊寄倉，輕輕鬆鬆四圍行


第一次坐中華航空，登機位係最方便既21號，一落電梯就到；飛機比預定時間遲左二十分鐘登機，好彩唔係遲好多




由香港去高雄好近，實際飛行時間大約一個鐘，由起飛開始空姐們好快手咁派餐派野飲，到收好所有野既時候飛機已經準備降落，慢小小都唔掂；華航連呢啲咁短既航線都一樣有飯食，開心過食包好多


過關同拎行李都好順利，大約十二點半出到黎，第一件事係買上網卡同atm拎錢，然後正式向高雄市區出發


為左方便第日坐火車，今日會住係高雄車站旁邊，而家先去hostel放低行李；高雄天氣比想像中熱，跟本就係夏天，由離開機場行去地鐵站一兩分鐘路已經出晒汗，好在只要過左中午時間天氣清涼好多


高雄車站旁邊係舊高雄車站，改建成甚麼地鐵博物館，懶行入去


係FamilyMart拎書後就去hostel放低行李；台灣出版既書係台灣買平過香港買好多，買書又方便，只要上網訂好隔日已經送到便利店，而且有啲書台灣先有香港係買唔到，今次我買左好多慢慢睇


Hostel隱藏係火車站旁邊民居之中


放低野正式出去玩啦，經過火車站先入去拎定來回台東火車票，火車票係網上訂就得好方便，不過星期六日班次係好爆，要同人搶飛，平日個啲相對比較易買，我星期五同星期一坐車唔使同人爭；拎飛時好有趣，職員對我中﹑英﹑日文都講齊，比佢搞到有啲混亂


高雄地鐵啲海報好正，岩晒我！




一出地鐵西子灣站就係「打狗鐵道故事館」，即係以前既高雄港站


可以睇到舊時蒸氣火車






室內保留舊火車站佈置，呢個係貨運站佈置上就好似辦公室咁，唔係平時見開既火車站佈局








火車模型




舊相


站外係荒廢左既路軌






打開google map見到旁邊有一個叫「哈瑪星鐵道文化園區」既地方，唔知佢有咩睇，見有時間就行去望望啦，橫掂係高雄都冇野好做


見到呢個格局都估到呢道係啲藝術區地方，我呢啲冇文化粗人同藝術點都拉唔上關係，一場黎到都入去睇睇




叫得鐵道文化園區，同鐵道都有小小關係，有呢啲小火車路軌貫通園區




原來小火車係載人架！


上下倒轉既屋




園區好多地方建築係舊時火車路軌之上，路軌上放置好多呢啲藝術品，算係一個影相打卡既好地方；我就冇咩興趣啦，是但影幾張相就走，唔係道慢慢睇lu












呢啲一睇個樣就覺得係以前既倉庫啦


又有火車經過




行行下朋友msg我介紹我去附近一間好食既麵店，黎到台灣都未食過野就去食返碗麵啦，本來諗住唔食野等到夜晚先開餐（我全日唔食野都架得，哈哈）；跟住地圖行到呢間叫「港圓」既麵店，睇落夠晒地道


舖頭門口寫住港園牛肉麵，不過朋友推薦我食豬手麵而唔係牛肉麵，咁我就食豬手麵啦；叫左麵搵個靚位坐低等麵到，豬手麵一碗台幣110，算抵食啦？


碗麵好豐富，有兩隻大豬手！豬手﹑麵同湯底都好正，差啲忍唔住飲晒啲湯！唔記得係唔係第一次係台灣食麵，印象中應該係，由呢碗麵開始對台灣麵印象非常好


麵店係住宅區之中，唔係有人介紹都唔會搵到黎呢道


食飽後去左附近一個高雄最出名既地方之一「駁二藝術特區」，話明係藝術野即係唔岩我啦，為免悶到訓著係門口望下就算，唔入去展覽地方參觀










發現有間誠品，呢道岩我多啲，話晒鐘意睇書，哈哈


係誠品行左一陣，出到黎天都黑，又係時候起程


呢個時間唔知有咩好做，又唔知去邊好，既然係咁就搵地方行下，由駁二行返去美麗島站個邊，幾公里路程相信唔難行既，呢個係消磨時間好方法


路途中有一個地方叫「愛河」，我記得呢個都係高雄景點之一，順便行去望望；呢道咩都冇，條路黑媽媽（對面咁多燈光應該熱鬧啲），其實冇咩好睇；叫得愛河呢啲咁浪漫既地方都係唔岩我，繼續向前趕路






行到黎「六合夜市」，都係一般夜市咁有野食有野買，我對呢啲冇興趣穿過就算；呢道以前都黎過，覺得冇咩特別，就係一條好多野食既街






又再黎到美麗島站，光之穹頂依然又靚又吸引，次次行過都忍唔住停低腳步，欣賞呢個咁靚既天空




原來佢地係「高捷少女」，即係高雄地鐵代言人，唔怪得四圍都見到佢地啦，雖然咁講係好毒，但唔可以否認我好鐘意佢地，哈哈哈哈哈




朋友約我係巨蛋附近食晚餐，坐地鐵去好方便；晚餐好豐富，係好正既西餐，可惜我一張相都冇影過，呢餐只好留係美好回憶之中


返hostel之前先係7-11拎書，呢盒仲大過之前個盒，又多好多本書


今次住既呢間hostel唔係好大，今晚唔多人入住，八人房只係住左兩個人咋，床同冷氣都好舒服令人訓到唔想起身，而且價錢好平只係HKD$91，我非常滿意




同房係一位來自台中既大哥，我地兩個人係房咩都講下最少傾左半個鐘，最估唔到既係佢竟然聽得明我講既野，呢件事實左太神奇啦；今晚係旅程中唯一一晚有床訓既日子，要好好珍惜，聽朝要訓耐啲！