台東。美麗的綠島（上）

^^ 祝大家新年快樂﹑萬事如意﹑心想事成 ^^

< 台東﹑綠島﹑高雄5天遊 >

第三天

綠島位於台東以東太平洋之上，台東隱約可以望到綠島既高山；綠島遠離市區，又係大海之上，係我想像中係一個冇污染，空氣同水質都好好既地方，所以今次旅程決定黎呢道體驗一下



民宿包埋早餐，我揀左食蛋餅，食房慢慢嘆完之後拎好行理出發，坐船去綠島


朋友係民宿放低喼，我就咩個大背囊幫大家拎野，為左方便請老闆娘車我地去碼頭「富岡漁港」，大約二十分鐘車程車費台幣200，又係好抵


綠島民宿已經幫我地訂好船飛，到碼頭講出民宿名同自己個名就可以拎飛，船費民宿個套餐已經包左，不過因為我地仲未比民宿錢，要暫時自己出住先


富岡漁港名副其實係一個漁港，停泊左好多漁船，呢道除左有船去綠島之外仲有船去蘭嶼






今日坐9:30呢班船出發；十二月係綠島旅遊淡季，就算今日係星期六都只係得呢一班船選擇，夏天旺季會多好多班次


船倉下層係二等座，上層係闊啲既一等座，見上面舒服啲坐左上去，不過之後有小小後悔， 一陣就知味道




船離開碼頭後，行左都冇一分鐘就非常大浪，呢啲浪係香港冇可能經歷到，就算打風坐船都冇可能搖得咁勁，就好似坐係一部四面一齊搖既海盜船一樣，拋到有離心力，開始時覺得好好玩架


以前未試過暈船浪，又玩開水上活動，以為會冇事啦，不過大海唔可以睇小，開心左10分鐘後船上開始不斷有人嘔，20分鐘後我都暈暈地，30分鐘後我都有想嘔既感覺，好彩40分鐘後又出奇地冇事，只可以講啲浪係大到痴線架！


當海浪平靜返既時候，望出窗外已經見到綠島離我地好近，絕對係沙漠之中見到綠洲既感覺；以前見人話綠島好大浪，又話一定要食定暈浪藥先上船，我都冇諗過真係咁誇張，經過今次後我諗都係食定藥穩陣啲，而且揀位最好坐下層船尾，想拋得勁就上層船頭啦




落船啦！落船啦！落船啦！終於返到地球，好感動！！！




未行出碼頭就見到有人舉起民宿牌，即時上前同佢相認，好想好想好想快啲去抖抖


其實唔洗人帶我自己都識去，揀呢間民宿除左因為平之外，另一個原因係好近碼頭，就係正碼頭旁邊，唔似其實絕大部份民宿都要坐多一程車去


今日係星期六，民宿都只係得我地四個客人，成間比我地霸晒；係民宿攤左一陣之後要出動啦，首先要去拎車




係綠島如果冇車既話就邊道都唔洗去，所以個個都會開電單車，不過我地冇電單車牌緊係唔可以開正式既電單車啦，只可以開用電推動既電動單車；電動單車比電單車價錢貴一啲，而且要煩換電，但都好過冇啦，島上係冇單車租（有單車都踩唔掂山路），如果唔敢開電動單車就只可以坐車尾等人載啦；大部份人都係兩個人一部車，我練習時試過載左人既話轉灣難好多，最後都係每人一部車比較安全；雖然話電動單車感覺上安全啲，不過一樣可以行得好快，平路可以行到50KM/H，落斜可以更快，揸車時一定一定要做做安全措施，千其唔好開咁快




大家拎左車即刻開車出去玩，揸車可以話係今次旅行其中一個重要活動黎架，平時我地邊有機會開呢啲電單車，望住大海風景自由自在向前行，就係咁已經好開心


望到靚景時隨意停低慢慢欣賞，原來呢啲就係自駕遊既樂趣






無啦啦有隻羊仔係道食草？


一路開車突然見到前面有飛機起飛，唔知點解個人自自然然加速衝去睇；如果怕暈船浪又想去綠島可以選擇坐飛機，由台東飛去大約二十分鐘航程，單程票價大約台幣千一，不過每日得幾班機而每部機只有十九個座位，未必咁易買到機票




機場同馬路之間只有小小欄杆分隔


呢啲就係我地開既電動單車，停車時泊係路邊就得，係綠島已經訓練成兩步路都開車去，行都懶行，哈哈


經過大街見到呢間餐廳最多人，就入去食午餐


炒麵比想像中好食，最正係牛肉真係好有牛肉味，好少食到咁正既牛肉


朋友都話個湯好鮮甜，估唔到平價快餐都咁好食


睇到海底既玻璃船


兩點前返到民宿準備開始下午活動


我地呢間民宿外表睇落平平無奇，不過就好方便，除左近碼頭之外，佢又有電單車租（可惜冇電動款式唔岩我地），而且佢又係潛水公司，我地去浮潛咩都唔洗拎，落樓下就可以換晒全套裝備，返黎時又可以即刻上返自己房沖涼，超正！


浮潛係綠島一個重要活動，我係第一次玩浮潛架；換好裝備跟教練開車出去海邊，然後衝向大海啦！今日超好天，藍天加藍色大海，絕配丫


海水清晰通透，隨意望向海底都有好多魚，仲見到海底奇兵入面既Nemo小丑魚，好靚架！就好似跳左入水族館一樣！可以同咁多魚一齊遊水，呢個機會好難我，冇污染既海洋係好靚好靚




玩完浮潛返去hea一下，再出黎時已經係黃昏時份；開車去位於綠島西北面既燈塔，見到大海又忍唔住停低




頭先咁好天，而家又咁多雲，今日個日落睇黎凍過水，算啦呢啲野冇得強求，四圍影下相已經好開心






竟然有人行過黎！好遠路架！


黎到啦






咸蛋黃比雲遮住，冇lu...




坐係燈塔下吹吹海風，等到燈塔職員話關門，唔想走都要走




係燈塔下沙灘玩到個天黑到影唔到相，開車返去搵食lu


呢條係綠島最旺既大街，六點已經變得好寧靜


見呢間餐龐靚靚地就揀左佢


係道試左綠島特產鹿肉，好似冇咩特別，都係普通既肉咁啦


其他野食都係一般












大街上有一間飲品鋪，朋友佢地飲得好開心，但今日我唔敢再飲呢啲...


島上有兩個電池站比電動車換電，最後呢個八點就關門，係佢關門前順利黎到；換電池係免費，自己拎舊電出黎再放新電入去就得，好快搞掂


返到民宿後開始下一個節目「夜間生態導賞」，一大堆人跟唔同領隊開車上山睇夜行動物；如果自己去周圍黑媽媽就咩都見唔到，領隊佢地眼力超好，見到有動物會停低指比大家睇，沿路見到好多梅花鹿


生態導賞完結後可以跟教練返轉頭，又可以自己開車行另一面環島走，我地想去浸溫泉就要自己開車去啦；山上冇路燈，夜晚就要靠自己車頭燈光向前行，最正既係成個山就得我地四個人，又上又落又唔知目的地係邊，只係見到路就不停向前行，好有探險feel，今次旅行諗都冇諗過夜晚會係荒山野嶺開車，比想像中好玩好多，如果得自己一個一定驚到出汗，有幾個朋友一齊就唔怕啦


一路行一路行，見到有光既地方就知去到，黎到綠島好重要既地方「朝日溫泉」；朝日溫泉之所以咁重要，因為佢係世界三個海底溫泉之一，溫泉水由海水經海底加熱而成，非常罕見，物以罕為貴ma


朝日溫泉收費台幣200，要著泳裝同有泳帽先可以浸，分室內同室外池，室內係熱水池，而室外大部份都係凍水，只有中間小小圓形池係熱水，所以大家都會迫晒係個圓形入面，好熱鬧；第一次浸呢種要著衫既溫泉，又咁多人一齊浸，都幾得意


呢啲相係十一點走個時影，啲人走得七七八八所以咁冷清，一去到個時周圍都迫滿人；溫泉更衣室同日本個啲溫泉差得遠，呢道就好似香港舊式泳池同運動場既更衣室咁，而且仲更加細，locker又細到放唔到咩，我地要好似其他人咁用個籃裝晒所有野放係池邊望住，為左浸溫泉危險小小都冇計，所以拎得越少野去越好




溫泉對出就係大海，面向東方可以見到好靚既日出，所以就叫朝日溫泉，一路浸溫泉一路睇日出一定好正；呢道仲可以整溫泉蛋，我地太夜就唔整啦




呢個位對住大平洋冇城市光污染，可惜月亮太光見唔到太多星星，幻想成個天都係星一定好正


浸過溫泉返到大街7-11，本來係想比錢幫車換電，但佢得返一舊換黎都冇用，咁費事換啦...即係話聽日唔可以去睇日出lu，呢個就係電動車既無奈...算啦訓耐啲仲好；電動車電池有五格，環島一次得返三格，重小小既朋友仲得返兩格，唔敢再開去玩啦，老闆娘話得三格電就一定要快啲去換，唔換好快玩完...如果兩個人一部車都唔知挨唔挨到環島一圈？


返到民宿樓下停低部車唔夠一秒即刻開始落雨，仲越落越大，岩岩好返得切；買左杯麵宵夜，就好似去camp一樣就算唔肚餓都要食返個杯麵先開心




今晚都係住四人房，房間簡簡單單乾淨企理，好滿意啦，最重要係有梳化比我訓；今日住呢間係綠島黎講算係好平，成個package每人台幣2400，包來回綠島船票﹑住宿﹑浮潛﹑半部電動車﹑早餐卷﹑夜間導賞，好抵玩


夜晚兩點幾先訓，好彩唔洗早起身睇日出咋，可以訓多陣......