台東。海濱公園﹑台東觀光夜市﹑鐵花村

< 台東﹑綠島﹑高雄5天遊 >

第二天

今日會同其他朋友匯合，兩位係高雄一位係台東，然後台東旅程就可以正式開始；由高雄去台東要兩個幾鐘，去得到時候已經唔早，冇時間係台東慢慢玩，其實只可以話係到此一遊咋



今日唔洗咁早起身，朝早都唔知有咩做好，朋友又未到，難得係床上碌到十點，以旅行黎講可能係最遲起身既一次；大約十一點佢地黎到高雄車站，係時候去食早餐啦


幾靚bor


台灣朋友推薦我食呢檔火車站附近既牛肉麵，一去到見到咁多人就知係好野，入面同出面都坐滿，咁岩見到有位即刻坐低等開餐


終於係台灣食到正宗牛肉麵！未食見到個湯底都知道正，味道都一樣好正，所以我好鐘意食台灣麵


天氣已經熱，係戶外地方食麵就更熱，食完即刻過旁邊買珍珠奶茶；明明一路行一路曬住係好熱，但飲左幾啖成個人已經清涼晒，直頭透心涼


返到火車站仲有時間，比我發現呢款咁得意既鴨仔postcard，想唔買都唔得！


如果唔係岩岩食左野應該要買返個鐵路便當上車食先有風味，車上都有便當賣，不過見佢好快賣晒，要一路坐車一路食便當都係預先準備穩陣啲


坐呢班自強號火車，12:40由高雄出發，14:59到台東，票價台幣362，感覺上好抵坐


火車座位好舒服，拎本書出黎睇下，又望下車外風景，兩個幾鐘好快就過，下次去旅行又要拎本書去睇先得，時間過得又快又充實


火車去到台灣東面之後沿海岸線北上，右邊係一望無際太平洋，坐右面座位就可以欣賞到呢片太平洋風光


係台東火車站會合另一位朋友後，一齊坐的士去民宿；台東火車站距離車區有小小遠，坐的士跳標收費台幣210，四個人坐就最抵，而且咁岩黎左部大的士，可以放好多行李




今晚住呢間「羅密歐檜木民宿」，係市中心地方算方便，而且又新價錢又平，老闆娘仲好好人，冇揀錯住呢道


房間實左太舒服，本來諗住一放低行李就出去，結果攤左半個鐘都唔捨得走，等到就快天黑終於要出去；係樓下拎單車後直接向海邊踩去，老闆娘講先知民宿有免費單車提供，真係好


由民宿踩去海邊好快，不過太遲出發，到海邊時太陽已經唔見啦，其實一早見咁多雲都預左今日睇唔到日落，所以冇失望




前面係太平洋，風超級大，就好似不停比三號風球風力既大風吹住一樣，風好溫暖唔會好凍，係好舒服架






行到出海邊繼續吹風，出面海浪好大，一路聽住海浪聲一路影相，好快玩到天黑




等到天太黑影唔到相，係時候撤退


一路吹風一路踩單車好舒服，都唔知有幾耐冇踩過單車；一路沿海邊繼續踩，踩踩下黎左呢道，算係台中一個文青好鐘意既影相位，可惜我唔係文青，天咁黑更加影唔到相，落車望望之後就返轉頭lu；夜晚海邊好多人捉魚，唔知佢地捉咩呢？


除左海邊有單車路，其他地方都要踩馬路，一定要注意安全，以前我都習慣係馬路踩單車問題不大，今次仲因為踩得太開心踩過左民宿都唔知


係民宿放低單車後直接出去搵食，老闆介紹左兩間好食既餐廳，第一間「米苔目」咁岩今日冇開食唔多，另一間就係呢間「藍蜻蜓」


真係估唔到快餐店都咁多人掛隊，既然老闆介紹得都試一試佢啦


排左好耐先買到野，再要等好耐先有得食，不過樓上又唔係好多人食緊野，證明佢炸得好慢好慢


就係類似KFC既快餐，我啲朋友話佢好食過KFC，話啲雞炸得好正，咁佢又真係好食既


食完繼續向「台東觀光夜市」行去，由民宿行去唔係好遠




呢個夜市同高雄台南個啲比細好多好多，始終台東相對係個小城市，市民同遊客都唔係咁多，就算而家呢個食飯時間黎到都唔會好迫人，行得好舒服




十二月頭咁快就有人報聖誕佳音


食野我就冇咩興趣，朋友就食得好開心，一見到大大隻魷魚即刻買左




見到啲鹵味都驚驚地，肉就唔食啦，豆腐係幾好味




可能太少人買，啲炸雞粒放到硬晒


唔知同香港個間有冇分別呢？朋友見到即刻忍唔住買左黎食




佢地都話呢個好好食




黎到台灣夜市一定要食炸雞扒先得既，行晒成個夜市就只係得呢一檔，想唔食佢都唔得，不過啲雞扒又係放到硬晒，都唔好食...以前食新鮮炸既雞扒不知幾正




除左食野外，呢道一樣有野玩，不過呢啲小朋友玩意就唔岩我地啦








咁平？


夜市就只係一條銜仔，食物種類唔多而且好多時都係得一檔，想揀都冇得揀；行完夜市後向台東舊火車站行去，行行下突然落雨，冇帶遮唯有淋下雨啦，有朋友好醒目竟然拎左把遮出黎，我完全冇諗過會落雨呢個問題，哈哈




舊火車站旁邊係一個叫「鐵花村」既地方，有市集，有音樂聽，仲有好多熱氣球燈飾，現埸睇好靚架，加埋落雨仲好浪漫，哈哈（可惜部傻瓜機影得唔靚）










周末時間有人表演音樂，只要買杯野飲就可以坐低慢慢聽，不過音樂唔岩我


市集都係唔岩我


行左好耐都冇坐低過，見到誠品即刻入去休息下，順便避雨；作為誠哥fans，呢幾本書一早睇晒，哈哈


行左陣誠品，起程返去民宿lu，順便係超級市場買野，我啲朋友可以全日不停飲唔同飲品，我就唔敢飲太多買水飲算


今日住既呢間民宿算係好大，地方乾淨




我地間四人房幾好架，又新又乾淨，老闆娘好好人仲比我地揀唔同既房，我地第一間入左呢道都懶再揀，就住呢間；今晚呢間房大約港幣六百，我覺得好抵


記唔記得我講過之後幾晚都冇床訓？今晚我就訓係條柱後面既地下，冷氣開得大又冇被冚係有啲凍，不過冇計啦呢個位最好架啦，至於點解要訓地下都係唔好提......


聽日就到今次旅行最重要既綠島旅程，其實一個月之前我發夢都估唔到自己會去綠島，因為我一向都冇特別興趣去呢啲小島，直頭諗都冇諗過，係緣份引領之下聽日就會去啦